Read Termanu MAZMUR 25 Bible Online

MAZMUR 25 - Termanu bible

MAZMUR 25

¹Dauk kokoa-kikion-na. Ou MANETUALAIN, au uni au huhule-haladoing neu O,

²ou au Manetualaing, au amahele neu O! Boso po'ilotak au nananakamumulu-nakamamaek, ma au musung-ngala eeki-latadale au.

³Hataholi fo nalelesi O-a, neukose nananakamumulu-nakamamaek, tehu hataholi fo namahele neu O-a, neukose dalen-na ta ba'ihana fa.

⁴Matu'du O hihii-nanaum neu au, ou MANETUALAIN, mafa'da hata fo au muse taon.

⁵Manoli ma hela-nole au, fo au aso'da tunga O hihii-nanaum, nana O nde Manetualain fo manasoi-tefa au, au amahena tataas esa neu O.

⁶Mafandendelek O dale malolem-ma, ma O susue-lalaim ou MANETUALAIN, fo O matu'dun neme makasososan-na mai.

⁷Fe do'o do ampon neu sala-singok ma salak fo au taon nai tepo-lelek au muli-solung-nga, mafandendelek au, nandaa no O susue-lalaim ma O dale malolem-ma.

⁸Nana MANETUALAIN malole, ma ndoos ma matetuk, Ana natu'du enok soaneu hataholi manala'ok sala enok-ka.

⁹MANETUALAIN hela-nole hataholi manamakaloe-makadae aok-ka, ma nanolis hihii-nanaun-na neus.

¹⁰Hataholi fo ana tunga hehelu-balataan ma hoholo-lalanen-na, Ana taon no susue-lalaik ma lilinekak.

¹¹MANETUALAIN, fe do'o do ampon neu au, nandaa no O hala hehelu-balatam-ma, nana au salang-nga ba'un-na seli.

¹²MANETUALAIN nanoli hataholi kamahehelek-ka enok fo ala muse la'ok tungan.

¹³Neukose laso'da no tetu-temak lahele, Upu-anan-nala neukose lanuu dae pusaka.

¹⁴MANETUALAIN nde been-na, hataholi kamahehelek-ka tia-lain, nafa'da dudu'a-aafin neus.

¹⁵Au matang-nga mete nahele leo MANETUALAIN neu, nana Ana soi-tefa-na au neme soe-a mai.

¹⁶Mete au, ma sue-lai au, nana au mesa-mesang-nga, ma au doi-doso.

¹⁷Au dale manasusang-nga, boetai namatuak-ka, se'i-po'i au neme toto'a-tataak-ka dalek-ka mai.

¹⁸Taoafik neu au doi-dosong, ma au toto'a-tataang, ma fe do'o do ampon neu basa au sala-sinong-ngala.

¹⁹Mitak au musung-ngala, makadotok nanseli; ala lakamuu-lakadau au mangalalau.

²⁰Manea ma soi-tefa-ma au, fo ela au boso hapu mamaek, nana au asulu-ahapa neu O.

²¹Ela leo been-na, dale malole-a no dale ndoos-sa lanea au, nana au amahena neu O.

²²Ou Manetualain, soi-po'i O anam-mala neme basa sila toto'a-tataan-na lala'ena mai.