Read Termanu MAZMUR 26 Bible Online

MAZMUR 26 - Termanu bible

MAZMUR 26

¹Dauk kokoa-kikion-na. Fe au ndoos ma matetuk-ka, ou MANETUALAIN, nana au aso'da no dale ndoos. Au amahena neu MANETUALAIN, de au daleng-nga ta naba'e faaanak boen.

²Palisak matalolole au, ou MANETUALAIN, ma fola au leona, palisak au hihii-nanaung ma au dudu'a-aafing leona.

³Au afandele O susue-lalaim tataas esa, ma au lilineka ahele neu O.

⁴Au ta nau akabubua o hataholi manatipu-daik fa, do leo-apalasa o hataholi manadea-dalek fa.

⁵Au ta ahiik hataholi manatao tatao-nono'i mangalauk-ka nakabubuan-na fa, au la'ok ali'a hataholi mangalauk-ka.

⁶Au safe au liman-nga, fo da'di ta'du-tana nae, au salang ta, ma au la'ok okofefeok O mei tunu-hotum, ou MANETUALAIN,

⁷boema au akamee nakamee makasi, ma tui-benga O tatao-nono'i matua-mademam-ma.

⁸Au sue-lai O Umam-ma, ou MANETUALAIN, mamanak fo O leok-ka, henuk no matua-madema.

⁹Boso taomisa au, sama-sama no hataholi masala-masingok-ka, do ho'i-ma au samaneng-nga sama-sama no kanisak-kala.

¹⁰Ala tao tatao-nono'i mangalauk nakandondoo henin, ma laheheleaon tataas esa, sipo doi sosolo dalek.

¹¹Tehu au aso'da no dale ndoos, sue-lai ma soi-po'i au leona.

¹²Boema soe lala'en-na dook-ka neme au mai, neukose au koa-kio MANETUALAIN nai anan-nala nakabubuan dale.