Read Termanu MAZMUR 27 Bible Online

MAZMUR 27 - Termanu bible

MAZMUR 27

¹Dauk kokoa-kikion-na. MANETUALAIN nde been-na, au mangale'dong ma au so'da-moleng, au ta bii-amata'u neu hata esa boen. MANETUALAIN nde been-na, au kota musu masulu-mahapang, neukose au ta anggengo fa.

²Metema hataholi mangalauk-ka sapu-na au, fo ana nau taonisa au soona, sila nde lakatunu fo ala tu'u leu.

³Leomae solda'du bubua matuaina esa, nakahapi-na au boe, neukose au ta bii-amata'u fa. Leomae natee-natatik da'di, fo la'ban au boe, au amahena ahele.

⁴Au oke dede'ak ka'da esa neme MANETUALAIN mai, ka'da ia nde au ahiik-kana: au leo nai MANETUALAIN Uman nai au fai maso'dan-nga dalek, soaneu au hapu ame'da ita MANETUALAIN dale malolen-na, ma au dokodoe hehela-nonolen.

⁵MANETUALAIN nasulu-nahapa au nai au fai toto'a-tataang-nga; nafuni au nai Uman dale, ma Ana so'u neni au leo lete batu lain neu.

⁶Besak ia, au sengi musu manai au boboa-kaisung-nga; boema no eeki-natadalek, au tunu-hotu tutunu-hohotu makasi nai Uman; au nau akamee, ma koa-kio MANETUALAIN.

⁷Ou MANETUALAIN mamanene leona, metema au aloo bou-bou neu O, sue-lai au ma mataa au leona!

⁸O mafa'da mae, “Mai leona fo sene-do'ok Au.” Au ataa ae, “Au mai no lai-laik, ou MANETUALAIN;

⁹boso mafuni meme au mai.” Boso mamanasa, ma tipa O atam-ma, nana O nde tulu-fali basa au so. Boso tu'u-tapa do la'oela au, ou MANETUALAIN, fo au manasoi-manatefang-nga.

¹⁰Leomae ama ma ina la'oela au boe, neukose Manetualain nakaboboi au.

¹¹Matu'du au, O hihii-nanaum, ou MANETUALAIN, hela-nole au, leo eno ndoos-sa neu, nana au musung-ngala makadotok nanseli.

¹²Boso fe au leo au musung-nga nasa-melun dalek neu, fo ana sapu-na au no masapepeko-masandandalik ma no dodoki-aalik.

¹³Au amahele, neukose au la'ola'di MANETUALAIN dale malolen-na, nai au maso'dang-nga dalek, nai daebafak ia.

¹⁴Mamahena neu MANETUALAIN, matetea-mahehele o dalem-ma; hei, mamahena neu MANETUALAIN leona!