Read Termanu MAZMUR 31 Bible Online

MAZMUR 31 - Termanu bible

MAZMUR 31

¹Soaneu mauli-malanga nakameek-ka. Dauk kokoa-kikiok.

²Ou MANETUALAIN, au asulu-ahapa neu O, boso po'ilotak, hataholi tao ba'ihana au daleng-nga. Hu kande O ndoo-matetum-ma, de soi-tefa-mala au

³mamanene au, ma soi-po'i au no lai-laik. Da'di sama leo lete batu, ba'eneu au ma mamanak fo au asulu-ahapa, sama leo kota musu matea-mahelek, fo nai bee, au hapu so'da-molek.

⁴Hei, O sama leo lete batu ma kota musu matea-mahelek ba'eneu au! Hela-nole au, nandaa no O hala hehelum-ma.

⁵Soi-po'i au neme hihi'ik fo, nanalonak ba'eneu au, nana, O nde au mamana nasulu-nahapang-nga.

⁶ Au fe au aoinang-nga, leo O limam dale neu; O soi-po'i au, Ou Amak, MANETUALAIN fo manalilinekak.

⁷Hataholi manasene-do'ok neu sosongo-tatangok-ka, O ta mahiik-kasa fa; tehu au amahele neu MANETUALAIN.

⁸Neukose au amahoko ma setelee, nana O sue-lai mahele au. O mita au doi-dosong ma O taoafik neu au toto'a-tataang.

⁹O ta po'ilotak musu-a, tao au da'di hataholi nanafook fa, tehu O fe au loak, fo la'ok no ao loak.

¹⁰Ou MANETUALAIN, sue-lai au, nana au ai toto'a-tataak-ka dalek; au matang-nga nake'te, nanahu au kii, au samanen-nga male-tale

¹¹Basa au so'dang-nga, nai doidosok-ka dalek, au teung-ngala sapu-lalo, nai hoo-nggu'uk-ka dalek. Au balakaing loe, nanahu au tatao-nono'i mangalaung-nga, lena-lenak au duing-ngala, ala po'o.

¹²Au da'di nanahika-humek, ba'eneu basa au musung-ngala, lena-lenak, ba'eneu basa au uma titia-tataing-ngala. Metema basa au hataholi nalelang-ngala lita au soona ala nggenge, metema latongo loo au nai enok soona lalai.

¹³Au nananafandele henik, sama leo hataholi manamatek-ka, ma au da'di sama leo, buas fo nanatapa henik-ka.

¹⁴Nai mamanak lala'ena, hapu bibii-namata'u matuaina; au amanene dede'a anin, la'eneu au musung-nga. Ala lalahalak, soaneu la'ban au, ma ala sanga enok fo taolisa au.

¹⁵Tehu au amahena neu O, ou MANETUALAIN, nana O nde, au Manetualaing-nga.

¹⁶O makaboboi au tataas esa; soi-tefa-mala au neme au musun-ngala mai, ma neme hataholi-hataholi manausi au-a mai.

¹⁷Ela leo been-na O atam-ma, nandaa no O dalem-ma; soi-tefa-mala au, nanahu O susue-lalaim.

¹⁸Ou lamatua daebafak, boso po'ilotak au hapu mamaek, o Manetualain, nana au aloo bou-bou neu O. Nemen-na fo hataholi mangalauk-ka nananakamamaek, ma no denge-dengek, ana kona leo hataholi manamatek-ka, daebafan-na neu.

¹⁹Sule ketu basa masapepeko-masandandalik-kala bafan-na, nana noo koao-ndaeaok ala hakinonoli hataholi manatao tunga ndoon-na.

²⁰O dale malolem-ma, ba'uk-ka nanseli, de O sadian ba'eneu hataholi kamahehelek-ka! Basa hataholi-la lita tatao-nono'i malole, fo O taon ba'eneu sila fo manamasulu-mahapa neu O-a.

²¹O mafunis lai O li'da susuem-ma dalek neme hataholi mangalauk-ka, ke'di-ndiun mai; O maneas lai O nasulu-nahapam-ma dalek neme musu-a kalaan-na mai.

²²Kokoa-kikiok ba'eneu MANETUALAIN! Susue-lalain ba'un-na seli ba'eneu au, nai lelek au nananakahapik ma nanasapu-nak.

²³Nai au napangamang-nga dalek, au aedaenga, MANETUALAIN tu'u-tapa heni au, neme matan-na mai so. Tehu Ana namanene au dokodoeng-nga, nai lelek au aloo bou-bou neun.

²⁴Hai basa MANETUALAIN, anan-nala lemin, sue-lai Manetualain, nana MANETUALAIN nasulu-nahapa hataholi manalilinekak-ka. Tehu Ana ta dudu'a-dodoo ba'u-ba'uk, soaneu Ana huku hataholi manakoao-ndaeaok-ka.

²⁵Basa emi fo mamahena neu MANETUALAIN-na, matetea-mahehele emi dalem-ma!