Read Termanu MAZMUR 32 Bible Online

MAZMUR 32 - Termanu bible

MAZMUR 32

¹ Dauk kokoa-kikiok. Nakamee nanoli-nafa'dak. Mua-manalek ba'eneu hataholi fo, sala-singon nanafe do'o do ampon, ma salan-na nanafe ampon.

²Maua-manalek ba'eneu hataholi fo, tatao-nono'i mangalaun-na, MANETUALAIN ta leke fan, ma hataholi fo, ana ta nau tipu-dai fa.

³Nai lelek au ta manaku au sala-singong fa, au doi-doso nanahu au ahoo tunga faik.

⁴Lele'do-le'odaen, O ne'e au, MANETUALAIN, basa au be'i-balakaing, sama leo le'do haan-na, nakamusi-nan.

⁵ Boema, au manaku au sala-singong neu O, ma au ta afuni au salang esa boen. Au ho'i nakeketuk, soaneu au manakun neu O, de O fe do'o do ampon neu basa au sala-singong-ngala.

⁶Hu ndia de, basa hataholi kamahehelek-kala muse hule-haladoi nai lelek ala la'ola'di to'a-taak-ka, nalosa metema faa susa-soe-a ana mai soona, ta la'e fan.

⁷O nde, au mamana nafuning-nga, O soi-po'i au neme toto'a-tataak-ka mai. Boema au eki ma amahoko-setelee, nana O soi-tefa-mala au so.

⁸MANETUALAIN nae, “Neukose Au atu'du o enok fo, o muse la'ok tungan, neukose Au hela-nole o, ma Au anoli-afa'da o.

⁹Boso sama leo ndala kanenis-sa, fo muse helan nenik lapa ma tali, soona besak-ka ana tunga.”

¹⁰Hataholi masala-masingok-ka, susa-soe makadotok, tuni-ndeni la'en; tehu hataholi fo, namahena neu MANETUALAIN-na, Manetualain susue-lalain nasulu-nahapa nahelen.

¹¹Hai hataholi kamahehelek-kala lemin, mamahoko ma setelee Leona, nanahu hata fo MANETUALAIN tao-no'i basan so. Hai basa hataholi fo, dale ndoos-sala lemin! Eki ma matadale leona!