Read Termanu MAZMUR 35 Bible Online

MAZMUR 35 - Termanu bible

MAZMUR 35

¹Dauk kokoa-kikiok. MANETUALAIN la'ban hataholi manala'ban au-a, matee-matati no hataholi fo, nasuu natee-natati no au.

²Ho'i-ma O ba'du musum-ma, ma O babaa fanam-ma, boema fo'a fo tulu-fali au leona.

³Fe'a-ma O tee-ma, ma O dongim-ma, fo la'ban hataholi manausi au-a. Mafa'da au, mae au manasoi-manatefang nde O.

⁴Nemen-na fo, hataholi fo ana nau taonisa au-a, ana kala ma nananakamamaek. Nemen-na fo manalalahalak la'ban au-a, lakadedeak no lapangamak.

⁵Nemen-na fo, MANETUALAIN ata nusa so'dan-na usis, sama leo anin-na, fuu tapasasala ha'deuk-ka.

⁶Nemen-na fo, MANETUALAIN ata nusa so'dan-na usis, nai eno makahatuk ma talimo'dis-sa.

⁷Palsuma la'iesak-kana, ala lona hihi'ik ba'eneu au, do ala kali bolok fo, ala ho'u-la au.

⁸Nemen-na fo, mamate-momopok-ka, tuni-nalas no kaiboik. Nemen-na fo, sila hihi'in-na, nala seluk-kasa, boema ala tu'da fo, mate-mopos.

⁹Boema au eeki-latadale, nanahu MANETUALAIN, au daleng-nga namahoko, nana Ana soi-tefa-nala au.

¹⁰Au afa'da no au dale katema tuang-nga ae, “MANETUALAIN, See kande sama leo O! O soi-po'i tapandoes-sa neme mabe'i-balakaik-ka, nuu ta-hata taak ma doidosok-ka, neme tuni-ndenik-ka mai.”

¹¹Sakasii mangalauk-kala, ala fo'a fo la'ban au, ma ala kalaak au tao, dede'a-dede'ak fo au ta bubuluk-kana fa.

¹²Au maloleng-nga, ala balas-sana nenik mangalauk; au bolo nai, ketu namahehenak-ka dalek.

¹³Lelek sila lamahe'di, au daleng-nga he'dis-sa ma au ta u'a-inu fa; au akatele, fo au hule-haladoi,

¹⁴sama leo au hule-haladoi fe tolanook esa, do tia-laik esa. Au akatele fo, au kii soaneus, nono'kabai, au susa soaneu au ina bonging-nga.

¹⁵Tehu nai lelek au susa, sila lamahoko, ma lakamomotu-la au, fo ala la'ban au. Ala la'ok sama leo hataholi ei helak-ka, fo lakamumulu-lakamamaek au.

¹⁶Ala hakinonoli lakandoo au, ma ala mete au no nakamuu-nakadauk.

¹⁷Losa faihi'da, ou MANETUALAIN, ka'da O mete leondiak losa fa'ihi'da? Soi-tefa-mala au, neme sila mamain-na, Soi-tefa-mala au, neme singa sila-la mai.

¹⁸Soona neukose, au oke makasi neu O, nai O anam-mala tala'da, ma koa-kio O na'dem-ma nai sila masene-do'ok dale.

¹⁹ Boso po'ilotak au nananakamiminak neme hataholi fo manamusu loo au-a no sosoa-taak. Boso po'ilotak au nanaeki-natadalek, neme hataholi fo lakamuu-lakadau au ta no enon-na fa.

²⁰Sila hala-kokolan ta mangana'uk fa; ala tutu'u eno ke'di-ndiuk soaneu hataholi fo, so'dan-na mole-dame.

²¹Ala eki ma lafa'da au, lae sila lita basa au tatao-nono'ing so.

²²Tehu O MANETUALAIN, O mitan so; boso denge-denge, ou MANETUALAIN boso dook-ka meme au mai.

²³Fo'a leona, fo masala'e au dede'ang-nga, ou au MANETUALAINGma au Amang-nga, tulu-fali au leona!

²⁴Masala'e au, nana O ndoos ma matetuk, ou au MANETUALAIN, boso po'ilotak musu-a eeki-natadale au.

²⁵Boso po'ilotak, ala lafa'da lai dalen-nala dalek lae, “Makasi, ita taotisan so Ita hihii-nanaun nanatao natetuk so!”

²⁶Nemen-na fo, hataholi fo namahoko nita au doi-dosong-nga, da'di napangamak, ma ana hapu mamaek Nemen-na fo, hataholi fo ana koao-ndaeao soaneu au-a, nananakadadaek ma nananakamumulu-nakamamaek.

²⁷Ela leo been-na, hataholi fo ana hii nita au nananafa'dak ndoos-sa, ana eki ma namahoko. Ela leo been-na, ala lafa'da fali-fali lae, “Tete'ek-ka, MANETUALAIN matua-madema! Ana nahiik antan-na, so'da-molen!”

²⁸Hu ndia de, neukose au tui-benga, O ndoo-matetum ma koa-kio O tunga faik.