Read Termanu MAZMUR 38 Bible Online

MAZMUR 38 - Termanu bible

MAZMUR 38

¹Dauk kokoa-kikiok, nai lelek ana tunu-hotu, tutunu-hohotu nasanene'dak.

²MANETUALAIN, boso huku au nai O nasa-melun dale, boso fepa-li'u au nai O nasa-melum dale.

³O kou-kou isim-ma, ana tola de ana hina au aopaang-nga, au ame'da O lima belam-ma, ne'e au.

⁴Au amahe'di belak, nanahu O nasa-melum; ta hapu so'da-la'dak nai au aopaang-na fa, nanahu au sala-singong.

⁵Au bolo nai faa, sala-singok-ka dalek au lelepa sala-singong-nga, belan-na seli ba'eneu au.

⁶Au bisung-ngala nanak mesa-mesan, ma laboo pulu, nanahu au tao nono'kabai, au amanggoa.

⁷Au akatele ma akabuku, tunga faik, au la'ok no dale he'dik.

⁸Sumaik-ka, ana hotu au aopaang-nga, ta hapu so'da-la'dak nai au aopaang-nga fa.

⁹Au akalulutuk, de mopo au balakaing-nga, au ahoo nanahu, au daleng-nga he'dis-sa.

¹⁰MANETUALAIN, O bubuluk basa au hihii-nanaung lala'ena, au hoo-nggu'ung, ta nananafunik ba'eneu O fa.

¹¹Au bade'eng-nga delengge'be-ngge'be, mopo au be'i-balakaing au matang-nga keluha'buk-ka so.

¹²Au tia-laing-ngala la'o lali'a au, nanahu au he'di-laung, lena-lenak au teidale-bobongging-ngala, ladook aoinan-nala, leme au mai.

¹³Hataholi fo, ana nau taonisa au-a, ana lona hihi'ik ba'eneu au, hataholi fo, ana nau tao susa-soe au-a, ana fe nasanene'da mahelek sanga tao namopo-namate au.

¹⁴Tehu au sama leo hataholi pakek fo, ta namanene fa, sama leo hataholi hala tak, fo ta kokolak fa.

¹⁵Tete'ek-ka, au sama leo hataholi fo, ta namanene fa, hu ndia de, ta nase'i fa.

¹⁶Tehu au amahena neu O'ou MANETUALAIN, ma O, fo au Manetualaing-nga, nataa au.

¹⁷Boso po'ilotak au musung-nga namahoko nita au susang-nga, boso po'ilotak ala kokolak bafalouk metema lita au kosik.

¹⁸Isabai-na, au tu'u u, au ame'da he'dis, nakandondoo henin.

¹⁹Au manaku au sala-singong; au daleng-nga ta tesa-tama no dudu'a-dodoo au salang-nga.

²⁰Hataholi manamusu loo au-a, makadotok ma balakaik mesa-mesan, ala ta lahiik au so'dang-nga, eno-dalan fa.

²¹Hataholi fo, ana balas malole nenik mangalauk-ka, ana musu no au, nanahu au tao malole.

²²Ou MANETUALAIN, boso la'oela au, boso dook-ka meme au mai, ou au Manetualaing-nga.

²³Mai lai-lai, fo tulu-fali au, ou MANETUALAIN, fo au manasoi-manatefang-nga.