Read Termanu MAZMUR 44 Bible Online

MAZMUR 44 - Termanu bible

MAZMUR 44

¹Teidalek Korah kokoa-kikion-na. Nakamee nanolik-ka. Soaneu mauli-malanga manakameek-kala.

²Ou Manetualain, ami mamanene matam, tutuik fo ami bei-ba'i kaim-mala tuin la'eneu tatao-nono'i matuaina fo O taon nai tepo lelek makahulun-na so.

³O mesam-ma usi heni leoina-la fo ela O anam-mala leo lahele nai sila nusan-na. O fe leoina fe'ek-kala hapu soe, tehu O po'ilotak O anam-mala lamade'u.

⁴Ala ta loso-la dae ndia nenik tafaina fa; ala ta sengi lenik sila be'i-balakai mesan-na fa, tehu nenik koasa ma O mamaim-ma sa'an-na, nana O dalem-ma natetu-nandaa neu O anam-mala.

⁵O nde au Maneng ma au Manetualaing-nga, fo manafe sesengik neu O anam-mala.

⁶No O koasam-ma, de ami sengi ami musum-ma, ma hataholi manasapu-la ami-a, lakatele neu ami.

⁷Nana au ta amahena neu au kou-kou ising-nga fa, au tafainang-nga boeo, neukose ana ta soi-tefa-na au fa.

⁸Tehu O nde soi-tefa-ma ami neme musu nook-ka mai, ma O sengi hataholi fo manamakamuu-makadau ami-a.

⁹Hu ndia de, neukose ami koa-kio O tataas esa, ma ami moke makasi nakandondoo henin neu O.

¹⁰Tehu besak ia, O la'oela ami, ma O po'ilotak ami kala. O ta tutulumatak seluk sama-sama moo ami fa.

¹¹O po'ilotak ami malai neme ami musum-ma mai, de ala kalo leni ami hata-hetom-mala.

¹²O po'ilotak ami nanado'do-pauk sama leo bi'ilopo-a, ma O tao tapasasala ami leo leoina-la tala'da meu.

¹³O mase'o O anam-mala nenik belik fo ta kandaak fa, ma ta hapu nanalak hata-hata fa.

¹⁴O tao ami da'di uma titia-taik-kala kuku'e-koko'don, ala hakinonoli ma ala hika ami.

¹⁵O tao ami da'di leoina-la hala-kokola muu-daun; lakakale langa, ma lakadadaek ami.

¹⁶Nai fai katemak esa dalen-na, au nananakamuu-nakadauk, au lu'a-lepa mamaek, ma au ta ato'dak au mata-panang fa,

¹⁷nanahu au amanene hakinonolik ma nakamumulu-nakamamaek neme musu-a, ma manamape'da dalek-ka bafan-na mai.

¹⁸Basa sila-la, tuni-ndeni-la ami so, leomae ami ta mafandele heni O do malelesi O hehelu-balatam moo ami-a fa.

¹⁹Ami dalem-ma ta nalelesi O fa; ami ta mafandele heni O paletam esa boen.

²⁰Tehu O la'oela ami, nai makiu-makahatuk dale; ami be'i-balakaim ta, nai bana makaa-makisuk-kala tala'da.

²¹Leounik-ka, ami ta sene-do'ok seluk neu Manetualain fa, te ami hule-haladoi neu lamatua daebafak fa'ek soona,

²²tao leo bee-o, neukose Ana bubuluk-kana, nana Ana bubuluk dede'a nananafunik manai ami dalem dale-a.

²³ Hu kande O de, mamates-sa tunga nahele ami, de ana tao ami da'di bi'ilopo nanado'do-pauk.

²⁴Fo'a leon, ou MANETUALAIN! Tao le'e de, O sungu? Fo'a leona! Boso tipa ami losa dodoon-na.

²⁵Tao le'e de O ke'ke, ma O mafandele heni ami doidosom ma ami susam-ma?

²⁶Ami tu'da, de ami lutu-lutu nai dae lain, ami makandondoo nai daesopuk dale, nanahu ami kala.

²⁷Fo'a, fo mai tulu-fali amii leona, soi-tefa-mala ami, nanahu O susue-lalaim.