Read Termanu MAZMUR 49 Bible Online

MAZMUR 49 - Termanu bible

MAZMUR 49

¹Teidalek Korah kokoa-kikion-na. Soaneu mauli-malanga nakameek.

²Mamanene leon, hai basa leoina-la lemin, pasak di'idoom-mala, hai laun daebafak-kala lemin,

³nau hataholi taidaek do hataholi nananita-nalelak boe, nau hataholi nuu-taa hata-taak do hataholi kamasu'i-makabetek boe.

⁴Neukose au kokolak dede'a-kokolak manatee-tenok, au dudu'a-aafing deman-na seli.

⁵Neukose au taoafik neu dede'a lasik-ka, fo afa'da mangalele'do sosoa-ndandaan boema akaminak kecapi.

⁶Au tabii-amata'u nai lelek au nai toto'a-tataak-ka dalek, ma nai lelek musu mangalauk-ka nakahapi-na au.

⁷Sila lasalai dean-nala neu su'i-beten-nala, ma ala koao-ndaeao lenik hata-heton-nala.

⁸Tete'ek-ka, ta hapu hataholi esa boen, bisa soi-tefa-na tolanoon-na fa, do ana bae doi sosoin-na leo Manetualain neu.

⁹Ana fe beek ndia boe, neukose ta dai fa; belin-na ba'un-na seli, soaneu soi samanen-na,

¹⁰fo ela nala mamates-sa deak, fo ana hapu naso'da losa dodoon-na.

¹¹Ta, neukose nita nae hataholi manatee-tenok-ka boeo maten. Hataholi panganaa ma nggoak-ka, sama-sama mopo-mate, fo ala la'oela hata-heton-nala neu hataholi fe'ek.

¹²Neukose ala leo lai lates-sala dalek, losa dodoon-na; sila mamana leleon-na nde ndia, losa dodoon-na, leomae makahulun-na, lanuu dae makadotok.

¹³Hataholi daebafak-ka, ta hapu naso'da nakandoo nai tetu-temak-ka dalek fa; ndia boeo neukose mopo-mate sama leo bana-manu-a boe.

¹⁴Hataholi fo, nasalai dean-na neu aoinan-na, ua-nalen leondiak, ma hataholi fo name'da hala-kokolan dai soa, maso'dan nai fai manamaik-ka leondiak boe.

¹⁵Sila nananaketuk soaneu mate, sama leo bi'ilopo-a; neukose mamates-sa da'di sila manafoon. Fafai-fafain-na hataholi ndoos-sa sengis; aopaan-nala naboo no lai-laik nai hataholi manamatek-ka daebafan-na, fo dook-ka neme mamana leleo tetu-temak-ka mai.

¹⁶Tehu neukose Manetualain soi-po'i au, Neukose Ana se'i-po'i au neme mamates-sa koasan-na mai.

¹⁷Boso bii-mamata'u, metema hataholi esa, da'di hataholi kamasu'ik, ma hata-heton, boetai lamaba'uk-ka

¹⁸Nana nai lelek ana mate, ana ta hapu neni hata esa boen, neukose ta latoin sama-sama no hata-heton leo bolok dale neu fa.

¹⁹Nakalenak, metema hataholi esa, ua-nalen malole nai maso'dan-na dalek, fo nanakoa-nanakiok nanahu ua-nale malolen-na soona,

²⁰neukose ndia boeo tunga bei-ba'i kain-nala leo mamana makahatuk-ka, losa dodoon-na.

²¹Hataholi daebafak-ka, ta hapu naso'da nakandoo nai tetu-temak-ka dalek fa, ndia boeo, neukose mopo-mate sama leo bana-manu boe.