Read Termanu MAZMUR 50 Bible Online

MAZMUR 50 - Termanu bible

MAZMUR 50

¹Asaf kokoa-kikion. MANETUALAIN Fo Manakoasa, kokolak nae, Naloo bou-bou neu daebafak-ka lala'ena, neme dulu losa muli.

²Neme Sion, kota fo mana'ahiik nanseli, Manetualain to'da mai no nandela-nasa'a.

³Ita Manetualain-na, Ana mai te Ana ta pe'dak lima-ein fa, Ha'i manapila masalolo'dek-ka, ana mai nakahuluk-kana, ma ani-sangu matuaina, okofefeo-nan.

⁴Naloo lalai-a ma daebafak-ka, fo ala sakasii, naketu-nala'di anan-nala.

⁵Ana nafa'da nae, “Tao makabubua Au anang-ngala lala'en-na fo manatao basa hehelu-balataak loo Au, ma nanatao natea-nahelek nenik tutunu-hohotu nanado'dok.”

⁶Lalai tui-benga nae Manetualain naketu-nala'di anan-nala, ma nae Ndia mesak-kana nde manakee-manafulan-na.

⁷“Mamanene leon anang-ngala lemin, te Au nau kokolak, Israel, Au nau tui-benga soaneu emi; Au ia Manetualain, fo emi Manetualaim-ma.

⁸Te hu kande emi tutunu-hohotum fa de Au kalaak emi; emi tutunu-hohotu nanatunum-ma, nai Au matang-nga tataas esa.

⁹Au ta paluu sapi neme emi lalaem-ma mai fa, do bi'ihiik neme emi bana-manum mai fa;

¹⁰nana basa bana-manu manai nula dale-a nde been-na, Au nuung sila, ma basa bana-manu lifu-lifun manai letelepak-kala.

¹¹Basa manupui manai letelepak-kala, Au nuung sila boe, ma basa mahahaek lala'en-na fo laso'da nai moo maloa dalek.

¹²Metema Au amala'a soona, ta paluu Au afa'dan neu emi fa, nana daebafak-ka no oe-isin lala'ena, Au nuung.

¹³Au ta u'a paa sapi mane fa, boeo Au ta inu bi'ihii mane-a daan-na fa.

¹⁴Tunu-hotu tutunu-hohotu makasi neu Manetualain leona, tao matetu emi hehelu-balataam neu Manetualain Fo Mademaina.

¹⁵Maloo bou-bou neu Au, nai lelek fai toto'a-tataak-ka, neukose Au soi-po'i emi, ma neukose emi koa-kio Au.”

¹⁶Tehu soaneu hataholi mangalauk-ka, MANETUALAIN nafa'da nae, “O ta manuu haak kokolak Au hoholo-lalaneng fa, ma kokolak la'eneu Au hehelu-balataang fa.

¹⁷Nana o ta nau sipok Au hala kekena-kaka'ing-nga fa, ma o tipa Au paletang-ngala.

¹⁸Metema o mita hataholi nakodaa esa soona, o tunga moon, ma o leo-mapalasa moo hataholi manahohongek-kala.

¹⁹O kokolak dede'a mangalauk tataas esa, ma o maheheleaom tataas esa, nenik eno ke'di-ndiuk-ka.

²⁰O makasasa'ek dede'ak nakandoo neu o tolanoom-ma, ma o kokolak dede'a ta malole neu o tolanoo bongim-ma.

²¹Ndia nde o taon, tehu Au ka'da denge-denge, da'di tunga o dale dodoom-ma, Au sama leo o. Tehu besak ia, Au akamuu-akadau o, ma basa sila-la, Au taos da'di mangale'dok ba'eneu o.

²²Taoafik leona, emi fo mafandele heni Manetualain-na; manea leona, fo boso nalosak Au tao amopo-amate emi, fo ta hapu manasoi-manatefa fa.

²³Hataholi fo, ana tunu-hotu tutunu-hohotu makasi da'di leo ndia tutunu-hohotun soona, ndia nde fe ha'da-holomata neu Au; ma ba'eneu hataholi fo manasadia enok-ka neukose Au atu'dun so'da-molek-ka neme Au mai.”