Read Termanu MAZMUR 52 Bible Online

MAZMUR 52 - Termanu bible

MAZMUR 52

¹Soaneu mauli-malanga nakameek. Dauk nakamee nanolin-na,

² ndek lelek Doëg fo hataholi Edom-ma mai nafa'da Saul, nae Dauk losa nai Ahimelekh uman so.

³Hai hataholi balakaik-konei, tao le'e de, o koao-ndaeao menik o tatao-nono'i mangalaum-ma, soaneu hataholi fo Manetualain sue-lain?

⁴Fai katemak esa dalen-na, o ke'di-ndiu ma o tutu'u eno mangalauk; o maam-ma, sama leo dope nggenggeuk matane.

⁵O sue-lai tatao-nono'i mangalauk-ka neme tatao-nono'i malole-a mai, o hii masapepeko-masandandali neme o mafa'da tunga ndoon-na.

⁶O ke'di-ndiu menik o hala-kokolam ma o tao makahehe'dik hataholi dalen!

⁷Tehu neukose, Manetualain tao namopo-namate o, losa dodoon-na; o nanaho'u-nak ma nanalele'a-lolosok neme o umam mai, ma nanatao namopo-namatek neme hataholi maso'dak-ka, daebafan-na mai.

⁸Hataholi manatao malole-a, nita ndia soona, neukose ana bii-namata'u, boema ana hika-hume o ma nafa'da nae,

⁹“Hataholi-a nde ndia, fo ta nasulu-nahapa neu Manetualain fa, tehu namahena neu su'i-beten fo, manasasi kao-kaok-ka, ma ana nasulu-nahapa neu hata-heton fo naseti-nalaka na-kala.”

¹⁰Tehu au sama leo ai setun fo, doon-na momo'dok nai Manetualain Uman dale. Au amahele, ae Manetualain sue-lai nahele losa dodoon-na.

¹¹Au nau oke makasi neu O tataas esa, au tui-benga O dale malolem-ma, nai O anam-mala matan.