Read Termanu MAZMUR 54 Bible Online

MAZMUR 54 - Termanu bible

MAZMUR 54

¹Soaneu mauli-malanga nakameek. Nenik nakaminak kacapi. Dauk nakamee nanolin-na,

² ndek lelek hataholi Zifi-la mai lafa'da Saul lae, “Dauk ke'ke nai ami nggolom dale.”

³Ou Manetualain, soi-tefa-ma au, nanahu O koasam-ma, fe ndoos ma matetuk-ka neu au, nanahu O be'i-balakaim.

⁴Mamanene au dokodoeng-nga, ou Manetualain, sa'di leo been-na, O taoafik neu au hala-kokolang.

⁵Nana hataholi nusa dea-la fo'a fo ala sapu-la au, hataholi manakoao-ndaeaok-ka, nahiik taonisa au, ala ta taoafik neu Manetualain fa.

⁶Tehu Manetualain nde been-na, au manatulu-manafaling; MANETUALAIN nde been-na, au manamasala'eng-nga.

⁷Neukose Ana huku au musung-nga nenik sila tatao-nono'i mangalau mesan-na, ma tao mamopo-mamates, nana Ana lilineka neu au.

⁸No au dale hihii-nanau mesang-nga, Au tunu-hotu tutunu-hohotuk ba'eneu O, ma au oke makasi neu O, nana O malole, ou MANETUALAIN.

⁹O soi-po'i au neme toto'a-tataak lala'ena mai, de au ita au musung-nga, ana kala.