Read Termanu MAZMUR 55 Bible Online

MAZMUR 55 - Termanu bible

MAZMUR 55

¹Soaneu mauli-malanga nakameek. Nenik nakaminak kacapi. Dauk nakamee nanolin-na.

²Ou Manetualain, mamanene au huhule-haladoing leona, boso lepos masadea au dokodoeng-nga.

³Taoafik neu au, ma mataa au, au akalulutuk nanahu au toto'a-tataang.

⁴Au daleng-nga ta tesa-tama fa, nanahu musu-a fe au nasanene'dak mahelek, ma hataholi mangalauk-ka tuni-ndenin. Nana ala tao lakatoto'a-lakatataak so'dang-nga, ma ala musu loo au no nasa-meluk.

⁵Au daleng-nga ta tesa-tama nanseli fa, mamates fo maneni bibii-namata'u matuaina, nakatata'u au.

⁶Dedelek-ka, ma bibii-namata'uk-ka poti-na au, bibii-namata'u matuaina, tuni-na au.

⁷Ah, leouni'ka au mali'dak sama leo manupui kalua soona, neukose au laa fo au u sanga mamana nee-nee lino-linok.

⁸Hei, neukose au laa leo dook-ka nanseli u, fo au leo nai moo solokaek-ka.

⁹Neukose no lai-laik, au u sanga mamana nasulu-nahapak, neme ani-sangu ma ani matuaina mai.

¹⁰Ou MANETUALAIN, taom-ma au musung-ngala lapangamak, tao tasi'bu hala-kokolan-nala, nana au ita naseti-nalakak, ma natutu-nafepak nai kota dale.

¹¹Lele'do-le'odaen, ala la'ok okofefeo, fo tao tatao-nono'i mangalauk, ma lakadada'dik tasi'bu.

¹²Nai mamanak lala'ena, hapu nakalulutuk-ka, tuni-ndenik ma ke'di-ndiuk-ka, da'di nai pasak-ka.

¹³Sa'di leo been-na, musu fo nakamuu-nakadau au, au bei bisa akatatakak. Sa'di leo been-na, musu nok fo nakamumulu-nakamamaek au, au bei bisa ke'ke neme musu nok ndia mai.

¹⁴Tehu, hu kande o, fo au nonoong ma au tia-laing-nga, au tia-laing fo manadeka no au-a, nalelesi au.

¹⁵Makahulun-na, ita leo-tapalasa no malole, ma biasa sene-do'ok sama-sama nai MANETUALAIN Uman.

¹⁶Nemen-na fo au musung-nga, maten no kaiboik ma no ao holi-holik, ana kona leo hataholi manamatek-ka daebafan-na neu, nana tatao-nono'i mangalauk-ka nai sila uman, nai sila tala'da heon.

¹⁷Tehu au aloo bou-bou neu Manetualain, neukose MANETUALAIN soi-tefa-na au.

¹⁸Lele'do-le'odaen, au hoo-nggu'u ma kii, de namanene au halang-nga.

¹⁹Ana soi-tefa-na au neme musu mamain-na, fo beenongo mai la'ban au.

²⁰Manetualain fo Ana paleta neme dodoon-na losa dodoon-na, neukose namanene au, fo Ana sengis. Nana ala ta nau tuka-tei sale-dale fa, ma ala ta bii-lamata'u neu Manetualain fa.

²¹Au tia-lai makahulung-nga, sapu-na tia-lain-nala, nalelesi hehelu-balataan.

²²Hala-kokolan mangana'uk ma nadoe dale tehu nai dalen dale, hapu nakamuu-nakadauk. Hala-kokolan mangana'uanak, tehu ana papau sama leo tafaina matane.

²³Fe o dale manaba'ihanam-ma neu MANETUALAIN, soona neukose Ana tia-to'ba o; nana hataholi dale ndoos-sa, Ana ta po'ilotak-kana kala fa.

²⁴Tehu O, ou Manetualain, neukose O tu'us neo bolo mademaina dale leu. Basa manatipu-daik-kala, ma kanisak-kala, neukose teu-fain-nala keke'uk. Tehu au amahele neu O.