Read Termanu MAZMUR 56 Bible Online

MAZMUR 56 - Termanu bible

MAZMUR 56

¹ Soaneu mauli-malanga nakameek. Tunga nakameek: Manupui kalua denge-denge, neme nusa dook mai. Dauk kokoa-kikion-na nai lelek hataholi Filistin-nala ho'u-lan neme Gat.

²Sue-lai au, ou Manetualain, nana musu sapu-na au, au musung-ngala tuni-ndeni au nakandondoo henin.

³Fai katemak esa dalen-na, au musu noong-nga heheta-aa'i au; ba'uk-ka musu loo au, ou Manetualain Fo Mademaina.

⁴Lelek au bii-amata'u-a, au amahena neu O.

⁵Au koa-kio Manetualain nanahu hata fo Ana helun; au amahele neun, de au tabii-amata'u fa, hataholi daebafak-ka be'i-balakain ta soaneu au.

⁶Fai katemak esa dalen-na, musu-a tao tasi'bu au dede'ang-nga, ala sanga enok lakandondoo henin fo tao soe au.

⁷Ala tao nakabua makahatuk nai mamana nafunik, ala taoafik besa-besa neu hata lala'en fo au tao-no'in, ma ala sanga fai lelak soaneu taolisa au.

⁸Ade, hapu so'da-molek ba'eneu sila tatao-nono'i mangalaun-na do ta? Tao mamopo-mamates, lai O nasa-melum dalek, ou Manetualain.

⁹O leke au leu-laang, fain-nala, ma O bubuluk au luu oeng-nga baba'un-na; ade, O ta hinga-leke fan do?

¹⁰Nai faik fo, au aloo bou-bou neu O, neukose musu-a nakadedeak, nana au bubuluk, Manetualain nook au.

¹¹Au koa-kio MANETUALAIN fo Manetualain Manakoasa, nanahu hata fo, Ana helun.

¹²Au amahele neun, de au ta bii-amata'u fa, hataholi daebafak-ka, ta hapu tao hata esa boen soaneu au fa.

¹³Neukose au tao atetu au hehelu-balataang neu O, ou Manetualain, ma au tunu-hotu tutunu-hohotu makasi soaneu O.

¹⁴Nana O fe au ala deak neme mamates-sa mai, O manea au, fo ela au boso tu'u u. Boema au bole aso'da nai Manetualain nasulu-nahapam dale, nai mangale'dok fo nasalaa-na basa maso'dak lala'ena dalek.