Read Termanu MAZMUR 60 Bible Online

MAZMUR 60 - Termanu bible

MAZMUR 60

¹Soaneu mauli-malanga nakameek. Tunga nakameek: Bunga bakung manatui-bengak. Kokoa-kikiok nanolik neme Dauk,

² nai lelek natee-nata'ti no hataholi Aram-Mesopotamia, ma hataholi Aram-Zoba-la, ma nai lelek Yoab fali de ana sengi hataholi Edom 12.000 neme Bafak Asin-na.

³O tipa ami, ou Manetualain, ma O po'ilotak ami kala. O mamanasa ami, de besak ia, tao mabebeu ami.

⁴O taom-ma daebafak-ka nanggengo, nalosa natandala; tao mahii matandalak-kala, nana daebafak-ka nanggengo.

⁵O po'ilotak O anam-mala la'ola'di doi-doso mabelaina; ami masoo-penok, sama leo hataholi manamafuk-ka.

⁶O fe hataholi kamahehelek-ka nasanene'dak, fo ela ala lala huhukuk-ka deak.

⁷ Soi-tefa-ma ami nenik O koasam-ma, mataa ami huhule-haladoim leona, fo ela O sue-lai hataholi-la, nanasoi-tefak.

⁸Manetualain kokolak neme mamana leleon malalao-malalafun-na mai, nae, “Au nau eeki-latadale ma baba'e dae Sikhem-ma; neukose Au tu'u batu soaneu Bafak Sukot-ta.

⁹Gilead ma Manasye nde been-na, Au nuung, Efraim nde Au ti'ilanga baing-nga, ma Yehuda nde au nusang-nga aitete'en-na.

¹⁰Tehu Moab nde been-na, Au mamana sasafe eing-nga; Au koak kokoa sesengik neu Filistea. Au tapa Au ta'bueing-nga neu Edom, da'di leo ta'du-tana nae Au nuung ndia.”

¹¹Neukose, see kande noo au leo Edom neu? See kande hela-nole au leo kota makota musu ndia neu?

¹²Ou Manetualain, ade O ta tunga sama-sama moo ami fa do? Ade O ta tutulumatak sama-sama moo ami solda'dum-mala fa do?

¹³Tulu-fali ami neme musu-a mai, nana hataholi daebafak-ka tutulu-fafalin sosoa-ndandaan ta.

¹⁴Ita sama-sama too Manetualain de neukose ita makadelek, ma balakaik, Ndia nde sengi ita musun-na.