Read Termanu MAZMUR 61 Bible Online

MAZMUR 61 - Termanu bible

MAZMUR 61

¹Soenau mauli-malangan nakameek. Nenik nakamina kecapi. Neme Dauk mai.

²Mamanene au dokodoeng-nga leon, ou Manetualain, taoafik neu au huhule-haladoing.

³Dook-ka neme uma mai, au aloo bou-bou neu O, nanahu ketu au namahehenang-nga. Neukose O moo au leo mamana nalaik fo nee-nee lino-linok, mamanak fo mademaina nanseli ba'eneu au;

⁴nana O nde au manamasulu-mahapang, kota musu fo matea-mahelek soaneu au musung-nga.

⁵Nemen-na fo nai au fai maso'dang-nga dalek, au leo nai O lalaa temam-ma, fo ela nee-nee lino-linok nai O li'da kapam dale.

⁶Nana O mamanene basa au hala hehelung-nga so, ou Manetualain, ma O fe au, hataholi kamahehelek-ka pusakan-na.

⁷Sa'di leo been-na, manek-ka fai-naluk le'do-loak, nalosa naso'da neme bobongik leo bobongik neu.

⁸Sa'di leo been-na ana paleta losa dodoon-na da'di leo manek fo O helen, ou Manetualain, masulu-mahapan nenik O susue-lalaim ma O lilinekam.

⁹Ma neukose au akamee koa-kio O nadema, boema au ho'u ahele Au hala-hehelung-nga neme faiknalosa faik.