Read Termanu MAZMUR 64 Bible Online

MAZMUR 64 - Termanu bible

MAZMUR 64

¹Soaneu mauli-malanga nakameek-ka. Dauk kokoa-kikiok.

²Ou Manetualain, mamanene au huhule-haladoing, nai lelek au susa, soi-tefa-ma, au samaneng-nga neme musu fo, maneni bibii-namata'uk-ka mai.

³Masulu-mahapa au, neme hataholi malelesik-kala nakabubuan-na mai, neme hataholi mangalauk-kala, dale tutu'u mangalaun-na mai.

⁴Ala taola maan-nala, namatane sama leo tafaina tanen-na, ma ala tapa dede'a-kokolak, fo ta pake ha'da hataholik fa soona nasan-na, sama leo kokou isik-ka.

⁵Ala tui-benga tutui pepekok, neme sila mamana nafunin-na mai, ala ta bii-lamata'u, soaneu tao langgenggeo hataholi sala tak-ka, na'den-na.

⁶Ala ho'u lahele dale tutu'u mangalaun-nala, ma lakokolaok, fo ala sanga lona hihi'ik; laedaenga, hataholi ta nita fa.

⁷Ala tutu'u eno mangalauk, de lafa'da lae, “Ami tutu'u eno mangalauk matuaina.” Hataholi daebafak-ka dalen-na, ma dudu'a-aafin, deman-na seli, de ta hapu neuk nala fan.

⁸Tehu Manetualain kou, kokou isin-na neus, de nggenge te, lakahina so.

⁹Mopo-mates, nanahu hala-kokolan-nala, basa hataholi fo, manalitas-sala, lakakale langa.

¹⁰Boema basa hataholi-la, neukose bii-lamata'u; ala dudu'a-dodoo Manetualain tatao-nono'in boema ala tui-benga hata fo, Ana tao-no'i basan so.

¹¹Boema basa hataholi malole-la, neukose lamahoko-setelee nanahu hata fo MANETUALAIN tao-no'in. Neukose ala lasulu-lahapa neun; boema basa hataholi fo manatao tunga ndoon-na, neukose lamahoko.