Read Termanu MAZMUR 66 Bible Online

MAZMUR 66 - Termanu bible

MAZMUR 66

¹Soaneu mauli-malanga nakameek-ka. Nakameek esa. Eeki-matadale soaneu Manetualain leona, hai basa daebafak-ka lala'ena lemin!

²Makamee ma mamatutua-mamadedema na'den-na, Koa-kion nenik kokoa-kikiok.

³Mafa'da Manetualain leon mae, “Tete'ek-ka, O tatao-nono'im, matua-madema! Musu-a, nakatele neu O no bibii-namata'u matuaina, nana O koasam-ma, ba'un-na seli.

⁴Daebafak-ka lala'ena, sene-do'ok neu O, ala lakamee koa-kio O na'dem-ma.

⁵Mai leona, fo mete Manetualain tatao-nono'in, tete'ek-ka, tatao-nono'in matua-madema nai hataholi daebafak-ka tala'da!

⁶ Ana tao nasafali tasi da'di dae ma'dak, de ami bei-ba'i kaim-mala la'o eik leo selik leu. Hu ndia de, ami mamahoko-setelee, nanahu tatao-nono'in.

⁷Ana paleta no makadelek losa dodoon-na. Ana maku leoina-kala, fo ela malena langa-masa'ba sook-kala ta hapu koao-ndaeao soaneun fa

⁸Koa-kio ami Manetualaim-ma Leona, hai leoina-la lemin, manduku-malosak emi kokoa-kikiom soaneun.

⁹Ana nanea basa ami so, fo ela ami maso'da mahele, ma Ana ta po'ilotak ami tu'u meu fa.

¹⁰Ou Manetualain, O fola basa ami so, sama leo hataholi-a natanoe lilofulak-ka nai ha'i dale.

¹¹O po'ilotak ami tu'da leo, hihi'ik dale meu, ma O fe lelepak fo,, mabelaina nanseli.

¹²O po'ilotak musu-a heheta-aa'i ami; ami la'ok tunga faa, ma ha'i-a tala'da. Tehu besak ia, O moo ami leo mamana tetu-temak-ka neu.

¹³Neukose au uni tutunu-hohotu nanatunuk leo O Umam neu fo au tao atetu, au hehelu-balataang neu O,,

¹⁴hehelu-balataak fo, au afa'dan, nai lelek au nai toto'a-tataak-ka dalek.

¹⁵Au tunu-hotu fe O, tutunu-hohotu nanatunuk, neme bana nanahelek-ka mai, bi'hiik bi'ilopo ma sapi mane fo ha'i masun-na, masu-masu leo lalai neu.

¹⁶Mai leona, fo mamanene hai basa hataholi kamahehelek-kala lemin, fo au tui hata fo, Manetualain taon soaneu au.

¹⁷Au aloo bou-bou, fo oke tutulu-fafalik neun, de besak ia, au akamee nakamee kokoa-kikiok ba'eneun.

¹⁸Metema au nau dudu'a-dodoo mangalauk nai au daleng dale soona, tao leo bee-o, MANETUALAIN ta nau namanene fan.

¹⁹Tehu Manetualain namanene basa au so, de Ana taoafik neu au dokodoeng-nga.

²⁰Au koa-kio Manetualain, nana Ana sipok au huhule-haladoing, ma Ana ta hahae sue-lai au fa.