Read Termanu MAZMUR 69 Bible Online

MAZMUR 69 - Termanu bible

MAZMUR 69

¹Soaneu mauli-malanga nakameek-ka. Tunga nakameek: Laisona Se'ba. Neme Dauk mai.

²Soi-tefa-mala au, ou Manetualain, nana oe-a losa nai au botoliing-nga so.

³Au kosik leo oe madema dale u, ta hapu mamanak fo au apadeik fa. Au bolo nai oe madema dale, lii matuaina tao-na au bolo.

⁴Au aloo bou-bou, losa au sota-mangu ma au botolii koko'dong-nga, namatuu. Au matang-nga nakete nana au ahani, au Manetualaing-nga, tutulu-fafalin.

⁵ Hataholi fo, manamakamuu-makadau au-a, tehu ne'ek ta, dede'u lena heni langa dook manai au langang lain-na. Hataholi mabe'i-balakaik-kala, nau tao lamopo-lamate au; ala sapu-la au, nenik ala tao langgenggeo au na'deng-nga. Lakaseti au, fo fe falik hata-heto fo, au ta atona ala fas.

⁶Ou Manetualain, O bubuluk au salang-ngala au sala-singong, ta nananafunik ba'eneu O fa.

⁷Boso po'ilotak au eni mamaek fe hataholi fo namahena neu O, ou Amak, MANETUALAIN Fo Manakoasa. Boso po'ilotak au eni nakadadaek fe hataholi fo, manasene-do'ok neu O, ou Israel Manetualain-na!

⁸Nana, hu kande O, de au nananakamumulu-nakamamaek, nanahu O, de au nananakadadaek

⁹Au da'di sama leo, hataholi nusa dea ba'eneu au tolanoo-ka'a-fa'ding, sama leo hataholi deak ba'eneu au ka'a-fa'ding.

¹⁰ Au manggateng-nga lua ponu-ponu, nanahu au sue-lai O umam-ma, hataholi fo lakamumulu-lakamamaek O-a, hakinonolin-nala tuni-la au aoinang-nga.

¹¹Au kii, ma au okaaong, tehu lakamumulu-lakamamaek au.

¹²Au pake si'di kalong, fo da'di ta'du-tana manasusak, tehu ala kokolak holo au.

¹³Ala kokolak au na'deng-na nai mamana nakabuak, ma hataholi manamafuk-kala nakameen-na, nde bee-na la'eneu au.

¹⁴Tehu au hule-haladoi neu O, ou MANETUALAIN, ou Manetualain, mataa au la'e fai malole. Tulu-fali au, nanahu O susue-lalai matuainam-ma ma nanahu O lilinekam.

¹⁵Boso po'ilotak au bolo nai puuk dale, soi-tefa-mala au, neme hataholi fo, ta lahiik au fa, ma neme oe madema dale mai.

¹⁶Boso po'ilotak lii matuaina tao-na au bolo, fo au bolo leo tasi buin-na neu do nananatoik nai bolok dale.

¹⁷Mataa au, ou MANETUALAIN, nana O malole ma O sue-lai mahele. Sa'di leo bee-na lepos o langam-ma leo au mai, nana O dale kasiam-ma, ba'un-na seli.

¹⁸Boso ke'ke meme O atam ia mai, nana au to'a-ta, de tulu-fali au lai-lai leona.

¹⁹Mai leona, fo soi-tefa-ma au, ma soi-po'i au, neme au musung-ngala mai.

²⁰O bubuluk, au nananakadadaek nanseli, nananakamumulu-nakamamaek ma nananakamuu-nakadauk, O mita la'iesak au musung-ngala.

²¹Nakamumulu-nakamamaek-ka, tao nakalulutuk au daleng-nga, ma ketu au namahehenang-nga. Au sanga susue-lalaik, tehu manada'di tak, au sanga kokoe-nanasik, tehu au ta hapu fa.

²² Nakalenak, ala fe au laso fo da'di nana'ak; lelek au maa ma'da, ala fe au dosa, fo da'di nininuk.

²³ Nemen-na fo, sila fetan-na, neni soe ma ana da'di hihi'ik ba'eneu sila fui-nala.

²⁴Nemen-na fo, poke matan-nala, ma muliha'in-nala he'dis-sa.

²⁵Po'a O nasa-melum neu sila, ma nemen-na fo, O nasa-melum fo, manapila lo'a-lo'am-ma, ana tuni nalas.

²⁶ Nemen-na fo, sila lalaa teman-na, da'di nee-nee lino-linok ma hataholi ta leo nai sila lalaa teman dale fa.

²⁷Nana ala fepa-li'u hataholi fo, O hukuk-kala, ma ala kokolak hataholi fo, O fepa-li'uk-kala.

²⁸Nemen-na fo, sila salan-na, boetai lamaba'uk-ka; boso mafa'da mae, sila ndoos.

²⁹ Nemen-na fo, sila na'den-na nanakoka henik neme susulak maso'dak-ka, dale mai; ma ta nanasulak nai hataholi manatao tunga ndoon-na, susulan dale fa.

³⁰Tehu au ia, nananakanetek, de au ame'da he'dis, so'u-ma au leona, ou Manetualain, ma soi-tefa-ma au.

³¹Soona neukose, au koa-kio Manetualain nenik nakameek, au amatutua-amadedeman nenik nakameek makasi.

³²Nai MANETUALAIN mata memeten-na ndia nde malole lena tutunu-hohotu sapi mane, ma tutunu-hohotu sapi mane anak.

³³Hataholi nanatuni-ndenik-ka, nita ndia, boema namahoko-setelaa, ma hataholi manasene-do'ok neu Manetualain-na, lamatutua dalen-nala.

³⁴Nana MANETUALAIN namanene hataholi nuu ta-hata tak-ka; Ana ta nakadadaek anan manai bui dale-la.

³⁵Koa-kio Manetualain, hai lalai ma daebafak-ka, tasi no basa mahahaek manai dalek-ka.

³⁶Neukose Ana soi-tefa-na Yerusalem, ma nafofo'a falik Yehuda kotan-nala. Neukose MANETUALAIN anan-nala leo lai naa; fo dae ndia, da'di sila nuun.

³⁷Neukose upu-anan-nala lanuun; hataholi fo, manasue-lai MANETUALAIN-na, neukose ala leo nai ndia.