Read Termanu MAZMUR 72 Bible Online

MAZMUR 72 - Termanu bible

MAZMUR 72

¹Neme Salomo mai. Ou Manetualain, manoli O hoholo-lalanem neu manek-ka, fe O ndoom-ma matetum-ma neu manek-ka anamanen-na.

²Ela leo been-na, naketu-nala'di O anam-mala tunga hoholo-lalanek, ma ana tao hataholi nanatuni-ndenik-ka no ndoos ma matetuk.

³Ela leo been-na, ami nusam-ma tetu-temak ma so'da-molek, ma hapu ndoos ma matetuk ba'eneu leoina lala'ena.

⁴Ela leo been-na, manek-ka nasala'e laun nuu ta-hata tak-ka, haak-ka, tulu-fali hataholi nuu ta-hata tak-kala ma tao namopo-namate manatuni-ndenis-sala.

⁵Ela leo been-na, nakatatakak neme bobongik leo bobongik neu, nai lelek le'do no bulak-ka bei lai lalai-a.

⁶Ela leo been-na, ana sama leo u'dan-na nai mook-ka sama leo u'daina, ana faa nai tina-la.

⁷Ela leo been-na, ndoos ma matetuk-ka nakapela nai tepo lelen-na, ma tetu-temak-ka sasi kao-kao nai lelek bulak-ka bei nai lalai.

⁸ Neukose nusan-na, namaloa neme tasi leo tasi neu, natabaa neme dulu losa muli.

⁹Laun manai moo solokaek-ka, neukose lakatele neun ma musu-a, sene-do'ok nai ei tata'bu daen-na.

¹⁰Mane-manek Tarsis-sala ma pulu-pulu-la leni tunu-hotuk soaneun Mane-manek Arab ma Etiopia-la ala mai fo leni bea.

¹¹Basa manek-kala, neukose ala sene-do'ok nai matan-na, basa leoina lala'ena, da'di atan-na.

¹²Nana ana soi-po'i hataholi nanatuni-ndenik, fo ta lanuu manatulu-fali fa, ma hataholi nuu ta-hata tak, fo laloo bou-bou neun.

¹³Anasue-lai hataholi nuu ta-hata tak-ka, ma laun fo matasi'da-matasaek-kala, ma ana soi-tefa-na hataholi manamaleu-malaak-kala, so'dan-na.

¹⁴Ana soi-po'is leme tuni-ndenik ma laka-nakasetik-ka mai, nana hataholi sila so'dan-na belin-na, ba'un-na seli ba'eneun.

¹⁵So'da-molek ba'eneu ama manek! Ela leo been-na, tunu-hotu fen lilopilas neme Arab mai, Ela leo been-na, nanahule-haladoik tunga faik, ma nanaba'e-palak tataas esa.

¹⁶Ela leo been-na, gadum-ma sasi kao-kao nai nusak-ka lala'ena, ma pupukun-nala henuk no daebafak-ka buna-boan. Ela leo been-na daen-na nalole sama leo Letelepak Libanon-na, ma laun manai kotan-na lamaba'u sama leo na'u manai mook-ka.

¹⁷Ela leo been-na, na'de manen-na nananafandendelek losa dodoon-na, ma ela leo been-na, na'den-na boetai nanakoa-kiok nai lelek le'do bei nai lalai-a. Ela leo been-na, leoina-la loke, fo fes baba'e-papalak sama leo ndia, ma basa hataholi-la loken soona lae, maua-manalek.

¹⁸Kokoa-kikiok ba'eneu Amak, fo Israel MANETUALAIN! Ka'da Ndia nde manatao dede'a matuaina-la.

¹⁹Kokoa-kikiok ba'eneu na'den fo matua-madema losa dodoon-na; ela leo been-na, daebafak-ka lalaena, henuk no mandela-masa'an! Da'di leondiak leona. Amin! (Tete'ek-ka)

²⁰Dauk fo Isai anan-na, huhule-haladoin ba'u ka'da ndia.