Read Termanu MAZMUR 77 Bible Online

MAZMUR 77 - Termanu bible

MAZMUR 77

¹Soaneu mauli-malana nakameek-ka. Tunga Yedutun. Asaf Kokoa-kikion.

²Au aloo bou-bou no hala napane'ek neu Manetualain; au aloo bou-bou no hala napane'ek, de namanene au.

³Nai fai toto'a-tataak-ka, au hule-haladoi neu MANETUALAIN; le'odae katemak esa dalen-na, au so'uk au limang-nga neun no ta sota-mangu fa, tehu au daleng-nga, ta nau nanakokoe-nanasik fa.

⁴Metema, au afandele Manetualain soona, au ahoo, metema au tai-dodoo soona, au daleng-nga, boetai sota-mangu.

⁵MANETUALAIN taon-na au, ta bisa sungu nai fai le'odaen-na, au hela-hae, nalosa au ta hapu kokolak fa.

⁶Au dudu'a-dodoo, fai-fai maneuk-kala, au afandendele, ma au tai-dodoo teu-teuk maneuk-kala.

⁷Nai fai le'odaen-na, au dudu'a-dodoo, ma au tane-tane nai au daleng dale ae,

⁸“Losa dodoon-na, MANETUALAIN tipa ma dalen-na ta nahiik so'on do?

⁹Ade, Ana hahae sue-lai ami so do? Ade, Ana ta tao natetu hehelu-balataan so'on do?

¹⁰Ade, Manetualain nafandele henin, de Ana ta sue-lai so'on do? Ade Ana namanasa, de nalosa ta nanuu dale kasian so'on do?”

¹¹Boema au afa'da ae, “Ia nde nakahehe'dik au daleng-nga, nde nae Fo Mademaina, ta koasa so'on.”

¹²Au nau afandele O tatao-nono'im MANETUALAIN, tai-dodoo O manada'di beum-mala nai tepo lelek makahulun-na.

¹³Au nau tai-dodoo, O tao basa hata lala'ena, ma dudu'a-dodoo O tatao-nono'im fo matuainam-mala.

¹⁴Ou Manetualain, basa O tatao-nono'im lala'ena, malalao-malalafuk, see kande ba'u ami Manetualaim-ma?

¹⁵O nde Manetualain, fo manatao manada'di beuk-kala, O mafa'da basa O koasam-ma, nai leoina-la, tala'da so.

¹⁶No O be'i-balakaim, de O soi-po'i O anam-mala fo, Yakob ma Yusuf tititi-nonosin-nala.

¹⁷Ou Manetualain, oe nita O boema nako'ba, hei, tasi buin-na boeo, ana dele.

¹⁸Ko'as-sa fe u'dan, ma mangguluk-ka nanggunggulu; Ndelas-sa tuti nato leo basa mamanak lala'ena.

¹⁹Mangguluk-ka nanggunggulu, ndelas-sa pila beelo'a, daebafak-ka nanggengo ma ana dele.

²⁰O la'ok tunga lii lain, O la'ok feo tasi maloaina, tehu O ei mamanam-ma, ta nananitak fa.

²¹O hela-nole O anam-mala, sama leo manafoo, tunga Musa ma Harun hele-nolen.