Read Termanu MAZMUR 78 Bible Online

MAZMUR 78 - Termanu bible

MAZMUR 78

¹Asaf nakamee nanolin-na. Hai au leoina-la lemin, mamanene au nanoling-nga, ma taoafik neu au dede'a-kokolang.

² Au nau kokolak dede'a lasik ma nakandandaak, ma au afa'da mangalele'do, neneuk tepo lelek makahulun-na,

³ma dede'ak fo, ami mamanenen ma ami sipon, fo ami bei-ba'i kaim-mala tuin.

⁴Ami tan au mafuni, soaneu ami anam-mala fa; ami nau tui-bengan neu bobongik makabuik-kala la'eneu MANETUALAIN koasan-na, ma tatao-nono'i matuainan-nala, boema tatao-nono'i matabeun-nala.

⁵Ana fe hoholo-lalanen neu leoina Israel-la, ma Ana fe paletan-na, neu Yakob tititi-nonosin. Ana nadenu ita bei-ba'i kain-nala lanolin neu sila anan-nala,

⁶fo ela bobongik manamaik-ka, lalelak-kana, boema ala tui seluk-kana neu sila anan-nala.

⁷No enok ndia, neukose sila boeo, tao sila namahehenan-na, neu Manetualain, fo ta lafandele heni tatao-nono'in fa, tehu ala tunga paletan-na, tataas esa,

⁸fo ela sila boso sama leo sila bei-ba'i kain-nala fo ala hii lalena langa-lasa'ba soo, ma manamalelesik; bobongik fo namahehelen-na, ta matea-mahelek, ma ta lilineka leu Manetualain fa.

⁹Leo Efraim fo tee-tafan nde, kokou isaik ma kokouk, tehu lalai, nai lelek latee-latati.

¹⁰Ala la'olena Manetualain hehelu-balataan no sila, ma ala ta nau tunga hoholo-lalanen fa.

¹¹Ala lafandele heni, Manetualain tatao-nono'in, ma dede'a matabeuk, fo nafa'da neus.

¹² Nai sila bei-ba'i kain-nala matan, Manetualain tao manada'di beuk-kala, neme nusa Masir-ra, fo nai masadokek Zoan-na.

¹³ Ana fa'a ba'e tasi-a, boema nakalelenak-kasa; oe-a nanabakatetek sama leo te'te-a.

¹⁴ Ana hela-noles nenik dii ko'as-sa, nai fai lele'don-na, ma nenik dii ha'ik-ka, nai fai le'odaen-na.

¹⁵ Ana fa'a ba'e lete batu-a neme moo solokaek-ka, de Ana fes linu losa lakabete

¹⁶Nadenu pupuku batu-a, fo ana kalua oe, boema oe faa, sama leo lee-a.

¹⁷Tehu lasala-lasingo lakandoo neu Manetualain, ala lalena langa-lasa'ba soo neu Manetualain Fo Mademaina neme moo solokaek-ka.

¹⁸ Ala so'ba Manetualain, nai dalen-nala dalek, no nakasetik, fo fes nana'ak fo, sila lahiik-kana.

¹⁹Ala la'ban Manetualain, nenik lafa'da lae, “Ade, Manetualainnapalani fe ita ta'a nai moo solokaek-ka do?

²⁰Memak Ana fepa lete batu mateaina, de oe faa bako-bako. Tehu, ade Ana bisa sadia loti boe, ma Ana fe anan-nala paa do?”

²¹Manetualain namanene dede'ak ndia boema namansa, de Ana sapu-na anan-nala nenik ha'i; nasa-melun soaneu anan-nala, boetai namatuak-ka,

²²nana, ala ta lamahele neu Manetualain, ma neu koasan fo manasoi-tefan-nala fas.

²³Leomae leondiak boe, Ana paleta lalai fo ana soi heni lelesun-nala.

²⁴ Ana nakona gandum neme nusa so'dak-ka mai, manna fo da'di sila nana'an-na.

²⁵Ana fes nana'ak makadotok; ala la'a loti ata nusa so'dak.

²⁶Boeo nadenu ani timu-a fo'a; hu kande koasan-na, de ani konas-sa filo-filo.

²⁷Ana nakona fe anan-nala, manupui, dede'un-na, sama leo solokaek-ka, de ta hapu leke nala fan.

²⁸Ana fe manupui sila-la tu'da lai lalaa temak-ka, nai sila mamana leleon-na boboa-kaisun.

²⁹Boema ala la'a losa lakabete, nana Manetualain fes hata fo, sila lahiik-kana.

³⁰Tehu beita dai sila dale hihiin-na fa; da'di, nai lelek ala bei la'a,

³¹Manetualain namanasa, de Ana la'ban-nasa; Ana taonisa hataholi Israel muli-soluk fo, ao makadelek-kala.

³²Leomae leondiak boe, anan-nala lasala-lasingo lakandoo, Ana tao manada'di beuk-kala, tehu ta lamahele fa.

³³Boema Manetualain tao nate'e so'dan-nala, sama leo ani hahaek-ka, sila teun-nala basan nai bibii-namata'uk-ka dalek.

³⁴Metema, Manetualain taonisa, hataholi de'ubee nai sila dalek soona, fe'ek-kala lasasale dale, fo ala fali ma'is leo Manetualain mai.

³⁵Ala lafandele, lae sila masulu-mahapan nde Manetualain, ma lae sila manasoi-manatefan nde Manetualain Fo Mademaina.

³⁶Tehu ala ke'di-la, Manetualain, nana sila hala-kokolan-nala ka'da masapepeko-masandandalik mesan.

³⁷ Ala ta lilineka neu fan, ma ala ta ho'u lahele, hehelu-balataan fa.

³⁸Tehu Manetualain sue-lai, ma fe do'o do ampon neu anan-nala, de Ana ta tao namopo-namate fas. La'i ba'uk-ka, nakatatakak nasa-melun, ma ta nafofo'a nasa-melun fa.

³⁹Ana nafandele, nae sila ka'da mahahaek fo, manasapu-manalalok, sama leo anin-na fuu nenin, fo neukose, ana ta fali ma'in so'on.

⁴⁰Ala lalena langa-lasa'ba soo neun, la'i de'u bee, ma ala tao lakahehe'dik dalen-na, neme moo solokaek-ka.

⁴¹Ala so'ba Manetualain la'i ba'uk-ka, ala tao susa Israel Manetualain Fo Malalao-malalafuk-ka.

⁴²Ala ta lafandele neu koasan-na fa, ma neu faik fo, Ana soi-po'is leme musu noon-nala mai,

⁴³lelek Ana tao manada'di beuk-kala neme Masir, ma manada'di beuk-kala neme mook Zoan-na.

⁴⁴ Ana tao nasafali sila leen-nala oen-na, da'di daak, nalosa ala ta linu oen-na fa.

⁴⁵ Ana fepa-li'us nenik pena makadotok, ma ana po'ilotak lo'donggelek-kala, tao lalutu sila daen-na.

⁴⁶ Ana fe ulek-kala ma lamak-kala, la'a heni sila daen-na buna-boan ma tinan-nala buna-boan.

⁴⁷ Ana tao nalutu sila ai angol-la, nenik u'da batu, ma sila ai kaan-nala nenik dinis makabatuk.

⁴⁸Ana po'ilotak u'da eis-sa, tuni-nala sila bana-manun, ma ta'tas-sa tee-nala sila bana-manun-nala.

⁴⁹Ana po'ilotak nasa-melun fo, manalua ponu-ponun-na, nenik nadenu solda'du, ata nusa so'dak bubuak esa, fo ala tao lalas, ketu namahehenan-nala.

⁵⁰Ana ta nakatatakak nasan-na fa, do Ana sue-lai so'dan-nala tehu Ana tao namopo-namates nenik he'di sarampa.

⁵¹ Ana taonisa hataholi Masir-rala anatou ulun-na nai esa-esak uma loon.

⁵² Boema Ana hela-nole anan-nala, sama leo bi'ilopo bubuak-ka, ma Ana hela-noles tunga moo solokaek-ka.

⁵³ Nai hehela-nonolen-na dalek, ala nee-nee lino-lino ma ta bii lamata'u fa, tehu sila musun-na soona, bolo lai tasi dale.

⁵⁴ Boema noo anan-nala leo Ndia daen fo, malalao-malalafuk-ka, leo letelepak fo, Ndia nde loso-na ka.

⁵⁵ Ana usi heni laun manai sila-la, nai anan-nala matan, boema Ana baba'e dae ndia, neu basa anan-nala, fo leo Israel-la, nalosa ala leo musu-a lalaa teman-nala.

⁵⁶ Tehu lalena langa-lasa'ba soo ma ala fola Manetualain Fo Mademaina, nenik ala ta tunga paletan-nala fa.

⁵⁷Ala lalelesi sama leo bei-ba'i kain-nala de ta bisa namahele fas, sama leo kokouk fo, ana peko so.

⁵⁸Ala tao lakahehe'dik Manetualain dalen-na, nenik mamana sosongo-tatangok, ma ala tao-la dalen-na susa nenik sila dodoki-dudulan.

⁵⁹Manetualain nita boema, namanasa nanseli, de Ana ta sipok-kasa, makandondook fa.

⁶⁰ Ana la'oela lalaa teman mania Silo, fo mamana leleon manai hataholi daebafak-ka tala'da.

⁶¹ Ana po'ilotak, musu nook-ka loso neni Peti Hehelu-balataan; ma Ana po'ilotak musu nook-ka loso-na ta'du-tana mandela-masa'an-na.

⁶²Ana namanasa anan-nala, fo Ndia pusakan-na de Ana po'ilotak-kasa nanatao nisak nenik tafaina.

⁶³Ha'i na'aheni touana muli-solun-nala; ma hataholi ta sao anafe'oanan-nala fa.

⁶⁴Sila imam-mala, nanatao nisak nenik tafaina, inafalun-nala ta hapu kii-makaleleu fa.

⁶⁵Boema MANETUALAIN fo'a, sama leo hataholi fo ana fo'a neme susungun-na mai, sama leo hataholi balakaik-ka, besak-ka ninu basa angol.

⁶⁶Ana tao-na musu noon-na nakadedeak, de Ana sengis losa dodoon-na.

⁶⁷Tehu Ana ta sipok Yusuf tititi-nonosin fa, ma Ana ta hele leo Efraim-ma fa,

⁶⁸Fo Ana helek-ka nde, leo Yehuda, ma Ana sue-laik-ka nde, Pupukuk Sion-na.

⁶⁹Ana nafofo'a Uman-na, sama leo mamana leleon manai nusa so'dak-ka, ma sama leo daebafak-ka, fo matea-mahelek losa dodoon-na.

⁷⁰ Ana hele atan, Dauk, de Ana ho'in neme bana-manu bubuak-kala tala'da mai,

⁷¹neme mamanak fo, ana nakaboboi bi'ilopo ina-la mai, soaneu ana foo Israel, fo anan-nala.

⁷²Dauk nakabobois no dale katematuak, ma ana hela-noles nenik malelan-na.