Read Termanu MAZMUR 85 Bible Online

MAZMUR 85 - Termanu bible

MAZMUR 85

¹Soaneu mauli-malanga nakameek-ka. Teidalek Korah Kokoa-kikion-na.

²O matetu-mandaa neu O daem-ma, ou MANETUALAIN, O tao mabebeu Israel so'dan-na so.

³O fe basa do'o do ampon neu O anam-mala sala-singon-nala so; O poti ketu salan-nala so.

⁴O ta mamanasas so'on; O hela falik, O nasa-melum matuainam-ma.

⁵Tao mabebeu ami, Ou Manetualain, fo ami manasoi-manatefam-ma, boso mamanasa seluk ami bai.

⁶Losa dodoon-na, O mamanasa ami, de O mamanasa mahele neme bobongik leo bobongik neu do?

⁷Matetea-mahehele falik ami, fo ela ami, fo anam-mala mamahoko-setelee nanahu O tutulu-fafalim.

⁸Matu'du leon, mae O sue-lai mahele ami, ou MANETUALAIN, fe ami so'da-molek, neme O mai.

⁹Au nau amanene Amak MANETUALAIN dede'a-kokolan; Ana helu fe ita fo anan-nala, tetu-temak, sa'di ita boso boe, tao seluk sala-singok bai.

¹⁰Tete'ek-ka, naheheleaon soaneu soi-tefa hataholi fo, ana bii-namata'u neun, Manetualain fo matua-mademaina, neukose Ana leo nai ita nusan-na.

¹¹Susue-lalaik ma lilinekak-ka, neukose latongo, ndoos ma matetuk-ka, ma mole-dame-a, neukose lahoholuao.

¹²Hataholi daebafak-ka lilinekan, neukose ana moli neme daebafak-ka mai, ma Manetualain ndoon ma matetun-na neukose ana titino neme lalai mai.

¹³MANETUALAIN ba'e-bati, hata fo malole, de neukose ita daen-na ana fe buna-boan.

¹⁴Ndoos ma matetuk-ka, neukose ana mai nakahuluk neme MANETUALAIN mai, fo ana sadia enok ba'eneun.