Read Termanu MAZMUR 88 Bible Online

MAZMUR 88 - Termanu bible

MAZMUR 88

¹Nakameek. Tei dalek Korah Kokoa-kikion. Soaneu mauli-malanga nakameek-ka. Tunga nakameek: Mahalat Leanot. Heman fo hataholi Ezrahi, nakamee nanolin-nafa'da.

²Ou Amak MANETUALAIN fo, manasoi-tefa au-a, nai fai lele'don-na, au aloo bou-bou neu O, ma nai fai le'odaen-na, au mai ataa O.

³Ela leo bee-na, au huhule-haladoing losa O, fo O mamanene au hala naloloong-nga.

⁴Susa makadotok tuni-nala au; mamates-sa nai lelesu bafan-na so.

⁵Au sama leo hataholi fo, neukose ana kona leo bolo mamates dale neu, hataholi fo mopo be'i-balakain.

⁶Au nanala'oelak nai hataholi manamatek-ka tala'da, sama leo hataholi nanataonisak, fo nakandondoo nai lates dale, sama leo hataholi fo, O mafandele henin makandondook, hataholi fo, O ta tulu-falin so'on.

⁷O tapa au leo, bolo madema dale neu, leo bolo mamates madema, ma makahatuk dale neu.

⁸O nasa-melum ne'e au no belak, de O nasa-melum tuni-na au, de au lutu-lutu.

⁹O fe au hataholi nalelelang-ngala, dook-ka leme au mai, de O tao-ma au, da'di nanamaluak ba'eneus, au nanalongak, de au ta hapu kalua fa.

¹⁰Au matang-nga ma'u-ma'u, nanahu doidosok-ka. Tunga faik, au aloo bou-bou neu O, MANETUALAIN, ma hule-haladoi no lima nakapelak.

¹¹Ade, O tao manada'di beuk soaneu hataholi mates-sa do? Ade, ala fo'a falik, fo ala koa-kio O da?

¹²Ade, O susue-lalaim, nanatui-bengak nai lates dale, ma O lilinekam nai mamana momopo-mamatek-ka do?

¹³Ade, hapu hataholi bubuluk, O tao manada'di beuk-ka, nai makahatuk dale, do O dale malolem-ma, nai nusak fo mamanak, hataholi-a nafandele henin do?

¹⁴Tehu, au dokodoe O tutulu-fafalim, ou MANETUALAIN, tunga-tunga fafain-na, au ini au huhule-haladoing leo O neu.

¹⁵Ou MANETUALAIN, tao le'e de, O ta sipok au fa? Tao le'e de, O lepos O mata-panam neme au mai?

¹⁶Au doi-doso, ma mamates-sa maku au, neme au anang mai au sota-mangu no lu'a-lepa O huhukum-ma.

¹⁷O nasa-melum matuainam-ma, ana tao nakalulutuk au; O sapu-ma au, de O tao mamopo-mamate au.

¹⁸Nai fai katemak esa dalek, O nasa-melum sama leo faa, ana okofefeon-na au, nakahapi-na au, neme basa mamanak lala'ena mai.

¹⁹O tao ma'dook au tia-lai maloleng-ngala, neme au mai, de ela ka'da makahatuk-ka, ana da'di au nonoong.