Read Termanu MAZMUR 89 Bible Online

MAZMUR 89 - Termanu bible

MAZMUR 89

¹ Etan fo hataholi Ezrahi, nakamee nanolin-na.

²MANETUALAIN, Au sanga akamee O susue-lalaim, losa dodo-na, neukose au tui-benga O manalilinekam-ma, neme bobongik leo bobongik neu.

³Nana au bubuluk, O susue-lalaim manaketu-basa tak, losa dodo-na, O lilinekam matea-mahelek sama leo lalai-a.

⁴O mafa'da mae, “Au tao basa hehelu-balataak o hataholi fo Au helek-ka so; Au soo-supa basa neu Au atang Dauk ae:

⁵ ‘Au akataka ahele o kandela manem-ma, losa dodoon-na, o upu-anam, neme bobongik leo bobongik neu, neukose langatuu o kandela manem-ma.’ ”

⁶Nakabuak manai nusa so'dak-ka, koa-kio O tatao-nono'im fo matabeuk, ma lakamee O lilinekam, MANETUALAIN.

⁷Nai lalai, ta hapu hata fo, sama leo O fa, ou MANETUALAIN, ta hapu mahahaek nusa so'dak fo, sama leo O fa.

⁸O nanafe ha'da-holomata nai basa hataholi malalao-malalafuk-kala dalek nanabii-naata'uk, neme basa hata manai O boboa-kaisum-ma.

⁹Amak MANETUALAIN Fo Manakoasa, see kande be'i-balakain sama leo O? O lilineka nai basa hata-hata lala'en-na dalek ou MANETUALAIN

¹⁰O koasa tasi fo, lii manaponu-ponuk-ka, ma O tao-ma, lii matuainan-na, naloe.

¹¹Rahab, fo buta tasi-a, O fefepa-popokon, ma O tao misan, O sengi O musum-mala nenik O lima mabe'i-balakaim.

¹²Lalai ma daebafak-ka nde bee-na, O nuum, O nde makadada'dik daebafak-ka no basa oe-isin lala'ena.

¹³O nde makadada'dik kii ma kona, Letek Tabor ma Hermon-na, eeki-latadale ba'eneu O.

¹⁴O koasam-ma, ba'un-na seli, ma O be'i-balakaim anseli nanseli!

¹⁵Ndoos ma matetuk, ma hoholo-lalanek nde bee-na, da'di netes neu O nusam-ma. Susue-lalaik ma manalilinekak-ka, nananitak nai O tatao-nono'im lala'ena dalek.

¹⁶Maua-manalek, ba'eneu leoina-la fo, ana lakaluku-lakatele no namahoko-seteleek, ma naso'da nai O mamaim-ma, mandela-masa'an dale, MANETUALAIN.

¹⁷Nai fai katemak esa dalek, ala lamahoko ma latea-lahele, nanahu O dale malolem-ma.

¹⁸O fe ami sesengik matuaina, hu kande O dale malolem-ma, de ami sengi.

¹⁹Nana ami manamasulu-mahapam nde bee-na, nde hataholi fo O helek-ka, ou MANETUALAIN; ami manem-ma nde bee-na, Israel Manetualain fo Malalao-malalafuk-ka, nuun.

²⁰Makahulun eli, fo nai ninitak esa dalek, O mafa'da neu O atam fo, manalilinekak mae, “Au tulu-fali basa palani tatibatu esa so, Au hele hataholi esa neme laun-na mai, de Au tao amadedeman so.

²¹ Au hapu Au atang Dauk so, de Au ndo ein-na nenik mina feta.

²²Neukose Au be'i-balakaing nasulu-nahapan tataas esa, neukose Au koasang-nga fen be'i-balakaik.

²³Neukose musu-a, ta sengi fan, ma neukose hataholi mangalauk-ka, ta tuni-ndeni fan.

²⁴Neukose Au tao amopo-amate musun-na, Au taoisa su'di see-a fo, nakamuu-nakadaun.

²⁵Neukose Au sue-lai ahelen, ma lilineka neun, ma Au tao-alan, koasan-na boetai namatuak-ka.

²⁶Neukose Au tao amaloa nusan-na, neme Tasi Tala'dak losa Lee Efrat-ta.

²⁷Neukose nafa'da Au nae, ‘Au Amang nde O, au Manetualaing-nga, au manamasulu-mahapang, ma au manasoi-manatefang.’

²⁸ Neukose Au taon da'di, Au ana tou ulung, fo matua-madema nanseli, nai basa mane-manek-kala tala'da.

²⁹Neukose Au sue-lai ahelen, neme doon losa dodoo-na, Au hehelu-balataang, matea-mahelek ba'eneun

³⁰Au akataka ahele kandela manen-na, nai lelek lalai-a, bei nai daebafak-ka lain upu-anan neme bobongik leo bobongik neu, neukose langatuu kandela manen-na.

³¹Tehu, metema tititi-nonosin, la'olena Au hoholo-lalaneng-nga, ma ta laso'da tunga Au paletang-nga fa,

³²metema ala ta taoafik neu, Au nakeketung-nga, ma ala ta ho'u lahele, Au nakaneneteng-nga fa soona,

³³Au hukus nenik ue, nanahu la'olenan-nala, ma Au fe soe-a, tuni-nalas, nanahu sala-singon-nala.

³⁴Tehu neukose, Au sue-lai ahele Dauk, ma neukose, Au ta alelesi Au lilinekang fa.

³⁵Au ta la'olena Au hehelu-balataang no fan, neme basa Au hehelu-balataang-ngala mai, Au ta hela falik esa boen.

³⁶La'i esa losa dodoon-na, Au soo-supa nenik Au na'de malalao-malalafung-nga; neukose Au ta asapepeko-asandandali neu Dauk fa.

³⁷Neukose Au akataka ahele kandela manen-na, nai lelek le'do-a, bei nai lalai, upu-anan, neme bobongik leo bobongik neu-a, neukose langatuu kandela manen-na.

³⁸Nusan-na nahele, sama leo bulak-ka, fo sakasii manalilinekak nai ko'as-sa.”

³⁹Tehu besak ia, O mamanasa neu manek-ka, O tapa heni, ma O ta sipok O hele hataholi-a fa.

⁴⁰O tao ketu O hehelu-balataam moo O atam-ma, O tapa heni ti'ilanga manen-na, leo tane dale neu,

⁴¹O ta matu'u kotan-na, papala nanadaman-nala, O tao-ma kota musun-nala, da'di batu madodouk.

⁴²Basa hataholi manala'ok tunga ndia, ala kalo leni hata-heton, ana da'di nakamuu-nakadauk, neme uma titia-tatain-nala.

⁴³O fe sesengik neu musun-nala, ma O tao-ma musu noon-na, namahoko-setelee.

⁴⁴Nakalenak, O tao-ma tafa-sisilon da'di sosoa-ndandaa tak, O ta tulu-falin nai netee-natatik-ka dalek fa.

⁴⁵O tao mete'e koasan-na lole-napun, O tapa kandela manen-na, neu dae lain.

⁴⁶O tao keke'u, fai muli-solun-na, ma O poti ketun, nenik mamaek.

⁴⁷Ou MANETUALAIN, O mafuni losa faihi'da? O nasa-melum lua ponu-ponu, sama leo ha'i-a, losa faihi'da?

⁴⁸Mafandele au, te au so'dang ia, keke'uanak nanseli, O makadada'dik hataholi daebafak-ka, da'di leo mahahaek fo, manasapu-manalalok.

⁴⁹See kande, bisa naso'da nehele, fo ta mate fan? See kande bisa nala bolo mamates-sa deak?

⁵⁰Ou MANETUALAIN, O ta'du-tana susue-lalaim makasososan, fo O helun neu Dauk, nenik O lilinekam-ma, nai bee?

⁵¹Ou MANETUALAIN, mafandele, tao leo beek de, O atam ia, nananakamuu-nakadauk, au lu'a-lepa nakamumulu-nakamamaek neme leoina makadotok mai.

⁵²Ou MANETUALAIN, O musum-mala, lakamumulu-lakamamaek manek fo O helek-ka. Neu su'di leo bee neu boe, ala hakinonolin.

⁵³Koa-kio MANETUALAIN, soaneu losa dodoon-na. Da'di tao leondiak! Amin! (Tete'ek-ka!)