Read Termanu MAZMUR 9 Bible Online

MAZMUR 9 - Termanu bible

MAZMUR 9

¹Soaneu mauli-malanga nakameek-ka. Tunga Mut-Laben nakameen-na. Dauk kokoa-kikiok.

²No dale katematuak, au nau oke makasi neu O, MANETUALAIN, ma tui-benga O tatao-nono'im fo, dodoo doak-kana ndia.

³Au nau amahoko-setelee, ma hika-latadale, nanahu O, ma koa-kio O na'dem-ma MANETUALAIN Fo Mademaina.

⁴Au musung-nga lepos nasafali, de nalai neme O matam-ma mai; ala lakatunu, de ala tu'u leu, boema mates.

⁵Nana O paleta, da'di leo manakee-manafula, fo ndoos ma matetuk; O masala'e basa au dede'ang-nga so.

⁶O huku basa leoina-la so, ma tao mamate-mamopo hataholi fo manatao tatao-nono'i mangalauk-kala; sila na'den-nala nananasanggango henik losa dodoon-na.

⁷Ami musum-ma, mopo makamdondook-kana so, O tao makalulutuk sila kotan-nala; ta hapu hataholi nafandeles so'on.

⁸MANETUALAIN paleta losa dodoon-na; Ana napadedeik kandela manen-na, fo naketu-nala'di daebafak-ka

⁹Ana paleta leoina-la, no ndoos ma matetuk ma naketu-nala'dis tunga ndoon-na.

¹⁰MANETUALAIN ndia, mamana nasulu-nahapak, ba'eneu hataholi nanatuni-ndenik-ka, mamana hahaeaok, nai fai toto'a-tataak-ka dalek.

¹¹Hataholi fo nalelak O-a, namahena neu O, ou MANETUALAIN hataholi fo manasene-do'ok neu O-a, O ta la'oela fan.

¹²Koa-kio MANETUALAIN fo manapaleta nai Sion-na! Tui tatao-nono'in neu leoina-la!

¹³Nana nafandele neu hataholi manadoi-dosok-ka ma ta nafandele heni, hoo-nggu'un-nala fa. Ana huku, hataholi fo manatao no laka-nakasetik.

¹⁴Mitak, musu-a tao-na au doi-doso; sue-lai au, ou MANETUALAIN matapo'i au neme mamates-sa mai,

¹⁵fo ela au koa-kio O nai laun Yerusalem-ma matan. Neukose au eeki-latadale nanahu O soi-tefa-mala au.

¹⁶Nggileo-bobongik fo, ta lalelak O-a fa, ala tu'da leo bolok fo sila kaliaon-na dalek leu; sila hihi'in-nala, nala seluk-kasa.

¹⁷MANETUALAIN natu'du aoinan-na nanahu nakeketun-na ndoos ma matetuk. Hataholi mangalauk-ka, tatao-nono'in nakahihi'ik-na seluk-kana.

¹⁸Mamates-sa nde been-na, mamana mate'ek ba'eneu hataholi mangalauk-kala, ma leoina fo, ta taoafik neu Manetualain-na fa.

¹⁹Hataholi nuu ta-hata tak-ka, ta nananafandele henik losa dodoon-na fa; hataholi fo ana doi-doso, boema ketu namahehena-na, ana ta doi-doso nakandondoo henin fa.

²⁰Fo'a leon MANETUALAIN fo maketu-mala'di leoina-la, boso po'ilotak hataholi daebafak-ka koao-ndaeao.

²¹Ou MANETUALAIN, nemen-na fo ala da'di manabiik, ma lame'da aon lae sila ka'da hataholi daebafak.