Read Termanu MAZMUR 94 Bible Online

MAZMUR 94 - Termanu bible

MAZMUR 94

¹Ou Manetualain, O nde Manetualain fo manabalas matu'du O babalam-ma, ou MANETUALAIN.

²Fo'a leon, ou Manakee-manafula daebafak-ka lala'ena, huku hataholi manakoao-ndaeaok-ka, nandaa no sila tatao-nono'in.

³Ou MANETUALAIN, hataholi mangalauk-ka, namahoko-setelee losa fa'ihi'da? Losa faihi'da, ou MANETUALAIN?

⁴Ala kokolak dede'a manggenggeok, ma ala koao-ndaeao lenik sila tatao-nono'i mangalaun-na.

⁵Ou MANETUALAIN, ala tuni-ndeni O anam-mala, ma ala tao lakalulutuk hataholi fo O helek-kala.

⁶Ala taolisa faluina anamaak-kala, ma ala tuni-ndeni hataholi nusa dea fo, manaleo nai nusak ia.

⁷Lafa'da lae, “MANETUALAIN ta nita fas, Yakob Manetualain-na, ta taoafik neu fas.”

⁸Hai au leoinang-ngala lemin, boso mamanggoa ba'u basa ndia, manoli pake emi dudu'a-aafim.

⁹Manetualain nde tao di'idook-ka, ade ta namanene fa do? Ndia nde tao matak-ka, ade ta nita fa do?

¹⁰Ndia nde nanoli leoina-la, ade Ana ta huku fa do? Ndia nde da'di basa hataholi-la mesen-na, ade ta nalelak fa do?

¹¹ MANETUALAIN bubuluk matalolole, hataholi daebafak-ka dudu'a-aafin, Ana bubuluk basa-basan manada'di tak.

¹²Ou MANETUALAIN, maua-manalek ba'eneu hataholi fo O manolin, hataholi fo, O manolin O hoholo-lalanem-mala.

¹³O makatetesa-makatatamak dalen-na, nai fai-faik susa-soe-a,, losa ana kali bolok fo ana ho'u-na, hataholi mangalauk-ka.

¹⁴Nana, neukose MANETUALAIN ta la'oela anan-nala fa; ma Ana ta tapa heni pusakan-na fa.

¹⁵De neukose, napadedeik natetu seluk, hoholo-lalanek-ka, nai uma manakee-manafula, neukose basa hataholi manatao tunga ndoon-na, neukose ala sipok-kana.

¹⁶See nasala'e au, neme hataholi malelesik-ka mai? See nook au, fo la'ban hataholi manatao tatao-nono'i mangalauk-ka?

¹⁷Leo uni'ka, MANETUALAIN ta tulu-fali au fa soona, tao leo bee-o, au lali leo hataholi manamatek-ka daebafan-na neu.

¹⁸Lelek au dudu'a-dodoo, ae neukose au tu'da, ou MANETUALAIN, O susue-lalaim tao-na au apadeik atea-ahele.

¹⁹Metema, au daleng-nga ta tesa-tama fa soona, O kokoe-nanasi au, ma O tao-ma au amahoko-setelee.

²⁰O ta dalek esa moo, manakee-manafula mangalauk fo, ala tutu'u eno mangalauk tunga hoholo-lalanek.

²¹Ala lalahalak, fo la'ban hataholi manatao tunga ndoon-na, ma ala hukulisa hataholi fo sala tak-ka.

²²Tehu MANETUALAIN nde bee-na, au manamasala'eng-nga, au Manetualaing-nga, Ana da'di au manamasulu-mahapang.

²³Ana huku hataholi mangalauk-ka, nandaa no tatao-nono'in, ma Ana tao namopo-namates nanahu sala-singon-nala. Ita Aman MANETUALAIN neukose Ana hukus.