Read Termanu MAZMUR 96 Bible Online

MAZMUR 96 - Termanu bible

MAZMUR 96

¹Makamee nakamee beuk ba'eneu MANETUALAIN leona! Makamee ba'eneu MANETUALAIN leona, hai basa daebafak-ka lala'ena lemin!

²Makamee ba'eneu MANETUALAIN ma koa-kion leona; tunga faik, tui-benga hala namahoko-seteleek-ka, mae Ana soi-tefa basa ita so.

³Tui matua-mademan neu leoina-la, ma tatao-nono'in fo, makadelen-na neu hataholi daebafak-ka.

⁴Nana MANETUALAIN matuina, ma nanakoa-nanakiok nanseli, muse bii-namata'u neun, lena heni basa lamatua daebafak lala'ena.

⁵Leoina fe'ek-kala, lamatua daebafan-nala ka'da dodoki-dudula sosongo-tatangok mesan, tehu MANETUALAIN nde bee-na, manamakadada'dik lalai maloaina.

⁶Matua-madema ma mandela-ma'ak-ka, poti nalan, koasa ma lole-napuk henu Uman-na.

⁷ Koa-kio MANETUALAIN, hai hataholi daebafak-kala lemin, koa-kio matua-mademan, ma be'i-balakain-na!

⁸Koa-kio na'de mandela-masa'an-na, ma meni tutunu-hohotuk leo Uman dale neu.

⁹Sene-do'ok neu MANETUALAIN nenik pake papake-ngganggao nakaluku-nakatele! Dele ngge'be-ngge'be nai matan-na, hai basa daebafak-ka lala'ena lemin!

¹⁰Tui-benga neu leoina-la mae, “MANETUALAIN ndia Manek! Daebafak-ka, matea-mahelek, de ta naggengo fa; Neukose Ana naketu-nala'di leoina-la no ndoos ma matetuk.”

¹¹Mamahoko-setelee leona, hai lalai ma daebafak-ka! Mangguu leona, hai tasi no basa oe-isin lala'ena!

¹²Mamahoko leona, hai mook-ka no basa bubu'u-palusan lala'ena! Ai nula dalek-kala, neukose ala eeki-latadale.

¹³Nana MANETUALAIN mai paleta nai daebafak-ka, Neukose Ana naketu-nala'di leoina-la no ndoos ma matetuk, ma tunga ndoo-na.