Read Termanu MAZMUR 97 Bible Online

MAZMUR 97 - Termanu bible

MAZMUR 97

¹MANETUALAIN nde bee-na, Manek! Ela leo bee-na, daebafak-ka eeki-latadale, ma pulu-pulu-la lamahoko-setelee.

²Ko'as-sa ma makahatuk-ka okofeo lalan; paletan-na napadeik nai ndoos ma matetuk-ka, ma hoholo-lalanek-ka lain.

³Ha'i-a pila nasalolo'de nai matan-na, fo ana hotu naputu musu manai boboa-kaisun-na.

⁴Mandelan-na, nangale'do-na daebafak-ka, daebafak-ka nitan, de ana dele ngge'be-ngge'be.

⁵Letek-kala, noehenis de ala faa sama leo lilik-ka, nai MANETUALAIN matan-na, nai MANETUALAIN fo, manakoasa daebafak-ka lala'ena, matan.

⁶Lalai tui-benga ndoos ma matetun-na, ma basa leoina-la lita mandela-masa'an.

⁷Basa hataholi fo, manasene-do'ok neu sosongo-tatangok-ka, neukose nananakamumulu-nakamamaek, ma hataholi fo, dalen-na namatua neu bua-lo'as fo sosoa-ndandaan tak-kala; basa lamatua daebafak-kala, neukose ala sene-do'ok nai MANETUALAIN matan.

⁸Laun Sion-na, ma kota-kota Yehuda-la lamahoko, nai lelek lamanene MANETUALAIN nakeketun-na.

⁹Nana O, ou MANETUALAIN, fo manakoasa daebafak-ka lala'ena; O matua-madema, lena heni basa lamatua daebafak lala'ena.

¹⁰Hai emi fo, manasue-lai MANETUALAIN-na lemin, boso mahiik tatao-nono'i mangalauk-ka! Nana MANETUALAIN nasulu-nahapa anan-nala maso'dan-na, Ana soi-po'is leme hataholi malelesik-ka, koasan-na mai.

¹¹Mangale'dok-ka, ana tii mai so, ba'eneu hataholi dale ndoos-sa, ma namahokok, soaneu hataholi, manatao tunga ndoon-na.

¹²Mamahoko-setelee leona, hai hataholi dale ndoos-sala lemin, nanahu hata fo, MANETUALAIN tao basan so, ma moke makasi neu Manetualain, fo malalao-malalafuk-ka.