Read Termanu AMSAL 1 Bible Online

AMSAL 1 - Termanu bible

AMSAL 1

¹ Salomo, fo Dauk anamanen-na, ma mane Israel-la, nanoli-nafa'dan nde ia.

²Tetee-tutu'dan nde bee soona, soaneu tulu-fali hataholi manabubuluk tao leo beek fo, da'di hataholi manatee-tenok, ma manabubuluk maso'dak-ka eno-ma'an, boema ana bisa nalelak matalolole hala-kokolak fo nanuu sosoa-ndandaa mademaina.

³Nanoli-nafa'dak ia-la, lanoli tao leo beek, fo hataholi-a hapu naso'da da'di leo manatee-tenok, tao tunga ka'da ndoon-na, ndoos ma matetuk.

⁴Nanoli hataholi dudu'a-aafi taak-ka, nalosa nanuu dudu'a-aafi matane, ma nanoli hataholi muli-soluk-ka, fo ana da'di hataholi malelak, ma ana bisa dudu'a-dodoo sama leo hataholi touinak-ka.

⁵No nanoli-nafa'dak ia-la, de hataholi manatee-tenok-ka boeo, neukose malelan-na boe tama, ma hataholi manasakola basak-ka, neukose ana hapu hehela-nonolek.

⁶No enok ndia, ala hapu lalelak besa-besa loo sosoa-ndandaak, fo nananafunik nai nanoli-nafa'dak-ka dalek, ma ala hapu lalelak besa-besa loo hataholi manatee-tenok-ka hala-kokolan, boema hataholi manatee-tenok-ka fe dede'a mateaina-la.

⁷ Soaneu hapu malelak-ka huun-na, makasososan-na hataholi-a muse nanuu dudu'a-aafi ha'da-holomata ma bibii-namata'uk neu MANETUALAIN. Hataholi nggoak-ka, ana ta taoafik neu manatee-tenok-ka, ma ana tanau nanoli fan.

⁸Anang-ngonei, taoafik neu ina-amam hala-kokolan,

⁹nana nanoli-nafa'dan-nala, popo-tama o dale malolem-ma, sama leo bulamolik-ka nai o langam-ma, ma henu-a tao nalole-nanapu o mata-panam.

¹⁰Anang-ngonei, metema hataholi fufu'di-oo'dok o soona, boso tunga sila fufu'di-oo'don ndia.

¹¹Metema lafa'da lae, “Ayo, mai fo ata teu sanga hataholi, fo ata tutu-fepan. Mai fo ata teu sapu-ta, hataholi sala taak-ka.

¹²Besak ia, so'dan-nala malole, ma so'da-la'dak-kala, tehu mahani te, neukose ala da'di sama leo hataholi manasapala'ok-ka.

¹³Ata ho'i-ta, bua-lo'a kabelin-nala, fo ela ita uman-na, henuk no bua-lo'a kakalok.

¹⁴Mai fo tunga leona! Mahani te, ata ba'e bua-lo'a nakok-kala, fo beke baba'uk!”

¹⁵Anang-ngonei, boso tunga hataholi matak leo silak-kala! Madook aoinam-ma, neme hataholi sila-la mai.

¹⁶Metema ala beita tao tatao-nono'i mangalauk fa soona, ala ta sungu-la matan-nala fa. Dalen-nala lahiik, no lai-laik lanisa.

¹⁷Te se'kona, manupui-a boeo, neukose ana ta masok leo dala fo nanapasak nai matan-na dalek neu fa,

¹⁸tehu hataholi mangalauk sila-la, lakahihi'ik seluk aoinan-nala — hihi'ik-ka nde, neukose tao namopo-namates-sala.

¹⁹Memak hataholi fo, ana sanga so'dan-na nenik eno naseti-nalakak-ka, neukose ana baen nenik so'dan-na mesak-kana.

²⁰ Mamanene leon-na, te manatee-tenok-ka naloo nai enok-kala lain, ma ana nggasi nai mook-kala!

²¹Ana naloo bou-bou nai lelesuina-nala, ma nai mamana makalupu-makaseek-ka nae:

²²“Hai, hataholi nggoak-panganaa-la lemin! Emi nau leondiak mahele, losa faihi'da? Faihi'da, besak-ka fain-na losa, soaneu emi hahae makadadaek manatee-tenok-ka, ma tipa nanolik-ka?

²³Metema au kena-ka'i emi, fo emi mamanene au, soona neukose au afa'da au daleng-nga oe-isin neu emi, ma au anoli au malelang-nga neu emi.

²⁴Au aloo basa emi so, tehu emi tipa au hala naloloong-nga, ma emi ta nau taoafik neu fan.

²⁵Emi ta taoafik neu basa au nanoli-nafa'dang-ngala, ma emi tipa au kekena-kaka'ing.

²⁶Hu ndia de, emi hapu soe soona, neukose au hika emi. Metema emi bii-mamata'u soona, neukose au hakinonoli emi.

²⁷Hei, neukose au hakinonoli emi, metema emi dalem-ma ta tesa-tama fa, ma doidoso, nanahu soe-a ana mai sama leo ani-sangu, fo ana tuni-na emi.

²⁸Nai lelek ndia, neukose emi maloo au, tehu neukose, au ta ataa fa. Neukose emi sanga au nai basa mamanak lala'ena, tehu emi ta matongo moo au fa.

²⁹Emi sama leo hataholi fo, ta la'i esa boen, fo ana nau hapu malelak, ma ana ta nau tunga MANETUALAIN fa.

³⁰Ta la'iesa boen, fo emi nau sipok au nanoli-nafa'dang-ngala, do taoafik neu au kekena-kaka'ing-ngala fa.

³¹Hu ndia de, neukose emi mame'da mita, emi tatao-nono'im ma emi dale tutu'u mangalaum-mala buna-boan.

³²Hataholi fo malelan-na ta dai fa, neukose maten, ma hataholi dudu'a-aafi taak-ka, neukose nakalulutuk, nanahu ana ta taoafik neu fa.

³³Tehu hataholi fo mana mamanene au-a, neukose nananakaboboik. Naso'da no nee-nee lino-linok, ma ana ta paluu bii-namata'u fa.”