Read Termanu AMSAL 10 Bible Online

AMSAL 10 - Termanu bible

AMSAL 10

¹Salomo nanoli-nafa'dan-nala nde ia: Ni'iana manatee-tenok-ka neni namahokok fe aman; tehu ni'iana nggoak-ka, tao susa inan dalen-na.

²Su'i-betes fo hapun neme enok tipu-daik-ka mai, ta neni nanalak fa; nasafalin-na, ndoos-sa, neukose neni maso'dak.

³Neukose MANETUALAIN ta po'ilotak hataholi malole-a hapu la'a-ndoes fa; tehu napanggengge hataholi mangalauk-ka fo ela hataholi ndia, ta hapu hata fo, nahiik-kana fa.

⁴Hataholi pelatua, neukose ana tu'da leo nuu taa-hata taak-ka dalek neu; hataholi manggatek-ka, neukose ana da'di kamasu'ik.

⁵Hataholi manatee-tenok-ka, nakaduduluk nana'ak neu fain-na, tehu hataholi fo, ka'da ana sungu nai fai keketu-kokolun-na, neni mamaek fe aoinan-na.

⁶Hataholi malole-a, neukose ana hapu baba'e-papalak Tatao-nono'i ha'da hataholi taak-ka, nafuni nai hataholi mangalauk-ka hala-kokolan-na dalek.

⁷Mafandele hataholi malole-a soona, ndia nalupa baba'e-papalak, tehu hataholi mangalauk-ka, nana nafandele henik no lai-laik.

⁸Hataholi malelak-ka, ana hii sipo nanoli-nafa'dak hataholi kokolan-na nggoak, neukose natofa-natalak.

⁹Hataholi manatao ndoos-sa, so'dan-na nee-nee lino-linok; hataholi manake'di-ndiuk-ka, neukose nanabubuluk.

¹⁰See nafuni ndoos-sa soona, nakadada'dik toto'a-tataak; see nde fe salak neu hataholi no mangale'dok soona, ana tao susa tetu-temak-ka.

¹¹Hataholi malole-a hala-kokolan, nakadada'dik so'da maua-manalek, tehu hataholi mangalauk-ka hala-kokolan nafuni dale manggenggeok

¹² Nape'da dalek-ka neninin-na, nale'a-napilik; susue-lalaik-ka fe do'o do ampon neu basa salak-kala.

¹³Hataholi dudu'a-aafi matane-a, kokolak dede'a-kokolak manatee-tenok; hataholi nggoak-ka, paluu filuk-kana nenik ue.

¹⁴Hataholi manatee-tenok-ka, nape'da malelak; metema hataholi nggoak-ka kokolak soona, ana dolu soe-a.

¹⁵Su'i-betes-sa, nasulu-nahapa tou kamasu'ik-ka, naleu-nalaak-ka, tao nakalulutuk hataholi nuu taa-hata taak-ka.

¹⁶Metema tao malole soona, ngga'din-na nde so'da maua-manalek-ka; metema tao sala-singok soona, neninin-na, sala-singok-ka boetai namaba'uk-ka.

¹⁷See taoafik neu nanoli-nafa'dak-ka soona, neukose naso'da no tetu-temak, see dalen-na belak, manaku salak-ka soona, nai soe dale.

¹⁸Hataholi mananafuni nape'da dalek-ka nde been-na, manake'di-ndiuk. Hataholi manakokolak nanggenggeo hataholi na'den-na nde been-na, hataholi nggoak.

¹⁹Boetai kokolak soona, boetai tao sala-singok; hataholi fo nakatatakak-na maan-na nde been-na, hataholi manatee-tenok.

²⁰Hataholi malole-a hala-kokolan, da'di leo lilofula isik; hataholi mangalauk-ka dudu'a-aafin, sosoa-ndandaan ta.

²¹Hataholi malole-a dede'a-kokolan, nalupa baba'e-papalak ba'eneu hataholi makadotok; hataholi nggoak-ka, nggoan-na taonisa seluk aoinan-na.

²²Ka'da hu kande MANETUALAIN baba'e-papalan, de hataholi-a da'di kamasu'ik; ue-le'di no puse-laipanak-ka, ta hapu popo-tama hata-heto fa.

²³Hataholi nggoak-ka, namahoko tao salak; hataholi manatee-tenok-ka hii sanga malelak.

²⁴Hataholi dale ndoos-sa, hapu hata fo nahiik-kana; hataholi mangalauk-ka, hapu hata fo, ana bii-namata'u nanseli neun.

²⁵Metema ani-sangu-a mai soona, hataholi mangalauk-ka mopok-kana; tehu hataholi manatao ndoos-sa, natea nahele losa dodoon-na.

²⁶Boso madenu hataholi pelatua, te ana tao ka'da botolii makasese'ek mesak-kana, sama leo dosa, tao makei nisik-ka, do ha'imasuk-ka, taon-na matak-ka nakete.

²⁷Fe ha'da-holomata neu MANETUALAIN soona, neukose o maso'da maladook-ka; hataholi mangalauk-ka maten, te fain-na beita losa fa.

²⁸Hataholi malole-a namahehenan-na, taon-nan da'di naua-nanale; hataholi mangalauk-ka namahehenan-na, louk mesak-kana.

²⁹MANETUALAIN nasulu-nahapa hataholi manatao ndoos-sa, tehu Ana tao namopo-namate hataholi manatao tatao-nono'i mangalauk-ka.

³⁰Hataholi dale ndoos-sa, neukose naso'da nee-nee lino-linok, ma tetu-temak; hataholi mangalauk-ka, neukose ta leo dae pusaka fa.

³¹Hataholi dale ndoos-sa, kokolak dede'a-kokolak manatee-tenok; hataholi mangalauk-ka bafan-na, neukose nanako'o ketuk.

³²Hataholi dale ndoos-sa, hala-kokolan nandaa dale; hataholi mangalauk-ka hala-kokolan, neni dale he'dik tataas esa.