Read Termanu AMSAL 12 Bible Online

AMSAL 12 - Termanu bible

AMSAL 12

¹Hataholi fo ana sue malelak-ka, ana hii ka'in; tehu hataholi fo ana ta nau ka'i fan-na, nde been-na hataholi nggoak.

²Hataholi malole-a, MANETUALAIN nahiik-kana; tehu hataholi manatutu'u eno mangalauk-ka, neukose ana sipo huhukuk.

³Ta hapu hataholi esa boen, fo ua-nalen malole nahele, hu kande tatao-nono'i mangalauk-ka; tehu hataholi manatao tunga ndoon-na, natea nahele, de ta nanggengo fa.

⁴Saoinak fo malole-a nde been-na, ana da'di saotoun-na dale namatutuan ma ua-nalen, tehu saoinak fo nakamamaek saotoun-na nde been-na, nono'kabai he'di-laus fo ana tao napulu-napo'o saotoun-na duin-nala.

⁵Hataholi manatao tunga ndoon-na, dudu'a-dodoo dede'a malole; tehu hataholi mangalauk-ka, tutu'u eno tipu-daik.

⁶Hataholi mangalauk-ka dede'a-kokolan nanisa; tehu hataholi manatao tunga ndoon-na, dede'a-kokolan neni so'da-molek.

⁷Hataholi mangalauk-ka, neukose ana tu'da, fo mate-mopon; tehu hataholi malole-a, neukose natea nehele, neme bobongik leo bobongik neu.

⁸Hataholi-a nanakoa-nanakiok, nandaa no manatee-tenon-na; hataholi nananakadadaek-ka, nandaa no nggoa-panganan-na.

⁹Malole lenak da'di laun matasi'da-matasaek tehu nanuu ue-le'dis, neme hataholi fo ta'ko ndia hataholi matua-madema, te se'kona, ana to'a-taa nana'a-nininuk.

¹⁰Hataholi malole-a, ana taoafik bana-manun; tehu hataholi mangalauk-ka, ana tao doi-doso bana-manun.

¹¹Hataholi manatao tina-osi, fo naue-nale'di puselaipana, nanuu nana'ak makadotok; tehu hataholi fo nabasa le'do-fain, soaneu dede'a manada'di tak-ka nde been-na, hataholi nggoak,

¹²hataholi mangalauk-ka, nahiik hapu nanalak neme hataholi malelesik-ka mai; hataholi malole-a, nono'kabai ai maboak-ka.

¹³Hataholi mangalauk-ka nala hihi'ik dale, hu kande dede'a-kokola manggenggeok fo ana kokolak-kana; tehu hataholi malole-a, nala toto'a-tataak-ka deak.

¹⁴Hataholi-a esa-esak hapu huhukuk, nandaa no dede'a-kokolan ma tatao-nono'in; esa-esak hapu sese'ba-babaek fo kandaak.

¹⁵Hataholi nggoak-ka, ana dodoo nae, ana beita tao nita salak fa, tehu hataholi manatee-tenok-ka, ana hii namanene nanoli-nafa'dak.

¹⁶Metema hataholi nggoak-ka dalen-na he'dis-sa soona, nai hatematak ndia boe, nafa'da dale he'din-na; tehu metema hataholi manatee-tenok-ka, nananakamumulu-nakamamaek soona, ta nafaduli fa.

¹⁷See kokolak ndoos-sa soona, nafa'da hata fo ndoos ma matetuk; tehu sakasii pepekok-ka, nafa'da tipu-daik.

¹⁸Kokola huu-pe'da taak-ka, bisa nakahehe'dik hataholi dalen, sama leo tafaina paun; tehu dede'a-kokolak manatee-tenok-ka, nono'kabai mo'do-akidook fo nakahahaik.

¹⁹Masapepeko-masandandalik-ka, neukose nanabubuluk nai hatematak esa mesak-kana tehu dede'a-kokolak ndoos-sa, neukose nahele losa dodoon-na.

²⁰Hataholi manatutu'u mangalauk-ka, ana ta hii ndoos ma matetuk-ka fa; hataholi fo ana sanga enok fo hapu tatao-nono'i malole-a, neukose naua-nanale.

²¹Hataholi malole-a, neukose soe ta la'e fan; tehu hataholi mangalauk-ka, neukose susa la'en tataas esa.

²²MANETUALAIN ta hii masapepeko-masandandalik-ka fa; tehu hataholi manatao tunga ndoon-na, nandaa no dalen-na.

²³Hataholi manatee-tenok-ka, ta natu'du malelan-na fa; tehu hataholi nggoak-ka, nase'o nggoan-na.

²⁴Hataholi manggatek-ka, da'di manakoasa; tehu pelatua neninin-na da'di ata.

²⁵Bibii-namata'uk-ka, tao namopo manggatek-ka; tehu hala-kokola mangana'uk-ka, namatutua dalek-ka.

²⁶Hataholi malole-a, naua-nanale lena heni uma titia-tatain-na; hataholi mangalauk-ka natofa-natalak, nanahu tatao-nono'i mangalaun-na.

²⁷Hataholi pelatua, ta hapu hata fo nahiik-kana fa; tehu hataholi manggatek-ka, neukose ana hapu hata kabelik-ka.

²⁸Hataholi fo, ana tunga eno ndoos-sa, neukose so'dan-na naua-nanale; tehu hataholi fo, ana tunga eno mangalauk-ka, neu leo mamates-sa neu.