Read Termanu AMSAL 16 Bible Online

AMSAL 16 - Termanu bible

AMSAL 16

¹Hataholi daebafak-ka, bole tutu'u enok, tehu Manetualain nde fe nakeketuk-ka.

²Fafa'kama nai hataholi-a mata memeten-na dalek, basa tatao-nono'in malole, tehu MANETUALAIN nde fola dale tutu'un-na.

³Fe la'iesak o dale tutu'um-ma neu MANETUALAIN, soona neukose o makalala'ok-kana te, neni buna-boak.

⁴MANETUALAIN tao basa hata lala'en-na, nanuu tetee-tutu'dan; fo tetee-tutu'dan ba'eneu hataholi mangalauk-ka nde been-na, momopo-mamatek-ka.

⁵MANETUALAIN ta hii basa hataholi manakoao-ndaeaok lala'en-na fa; Ana ta po'ilotak-kasa, lala huhukuk-ka deak fa.

⁶Hataholi manalilinekak neu Manetualain-na, neukose ana hapu do'o do ampon; ma hataholi kamahehelek-ka, neukose nadook aoinan-na neme tatao-nono'i mangalauk lala'en-na mai.

⁷Metema o mandaa moo MANETUALAIN dalen-na soona, Ana tao o musum-mala da'di tia-laik.

⁸Malole lenak hapu-dai faaanak, tehu hapun tunga eno ndoos-sa, neme hapu-dai makadotok, tehu ta hapun tunga eno ndoos ma matetuk-ka fa.

⁹Hataholi daebafak-ka bole tutu'u enok, tehu Manetualain nde naketu, so'dan-na eno-dalan.

¹⁰Manek-ka sipo koasa neme Manetualain mai, da'di, salan ta, nai nakeketun-na dalek.

¹¹MANETUALAIN nau hataholi manadangan-na, tao tunga ndoos ma matetuk-ka, boeo nai pake uuku-dodouk ma tatais-sa dalek.

¹²Ba'eneu manakoasa, tatao-nono'i mangalauk-ka nde been-na, ta malole ndia fa, nana paletan-na natea-nahele, nanahu ndoos ma matetuk-ka.

¹³Kokolak ndoos-sa, nandaa no manakoasa dalen-na, ana sue-lai hataholi fo, manakokolak tunga ndoon-na.

¹⁴Manek-ka nasa-melun nde been-na, sama leo hala nafa'dak la'eneu huhuku nisak-ka; tehu hataholi manatee-tenok-ka, neukose ana sanga enok fo tao natenak henin!

¹⁵Manek-ka dale malolen-na, neni maso'da tetu-temak, sama leo ko'a u'dak-ka nai fai hanan-na.

¹⁶Hapu manatee-tenook-ka soona, malolen-na lena heni hapu lilopilas-sa; ma hapu malelak-ka soona, malolen-na lena heni hapu lilofulak-ka.

¹⁷Hataholi malole-a, dook-ka neme mangalauk-ka mai; ma hataholi fo ana taoafik neu maso'dan-na eno-dalan-na, nasulu-nahapa aoinan-na.

¹⁸Koao-ndaeaok-ka neninin-na nde nakalulutuk-ka; namatutua-namadedema aoinak-ka, neninin-na nde tutu'dak-ka.

¹⁹Malole lenak makaloe-makadae aoinam-ma moo hataholi dale taidaek-ka, neme maba'e bua kakalok moo hataholi manakoao-ndaeaok-ka.

²⁰Taoafik neu hata fo, lanolin neu o, soona neukose o hapu hata fo, malole. Mamahele neu MANETUALAIN, soona neukose o maua-manale.

²¹Hataholi manatee-tenok-ka, nananita-nalelak neme dudu'a-aafi matanen-na mai; hala-kokolan-na, eno-dalan nadoe dale, de ana taon-na dede'a-kokolan boetai nananamahelek.

²²Manatee-tenok-ka nde been-na, oemata ua-nalek ba'eneu hataholi dale malole-a so'dan-na; tehu hataholi nggoak-ka, nggoan-na tao doi-doso seluk-kana.

²³Hataholi dale malole-a dudu'a-aafin, taon-na dede'a-kokolan da'di manatee-tenok, ma nanolin-na, boetai nananamahelek.

²⁴Hala-kokola mangana'uk-ka, nalupa fanioe; makeen-na seli, de neni so'da-la'dak fe aopaak-ka.

²⁵ Hapu enok fo meten soona ndoos, tehu mate'en-na, enok ndia leo mamates-sa neu.

²⁶Dale hihiik soaneu na'a-ninu-a, nakatutuluk hataholi-a naue-nale'di; hu kande tein-na, de no nakasetik, muse naue-nale'di.

²⁷Hataholi mangalauk-ka, sanga enok tao soe nonoo hataholin-na; dede'a-kokolan mangalauk, sama leo ha'ikaa manapila lo'a-lo'ak-ka.

²⁸Hataholi fo ana ta tao tunga ndoon-na, neni nale'a-napilik; manatao nanggenggeo hataholi na'den-na, neni nasi'da-naba'ek ba'eneu tia-lai malole-a.

²⁹Hataholi nasa-melu mangalauk-ka, ke'di-ndiu nonoon-nala, fo nos leo soe dale neu.

³⁰Manea matalolole soaneu hataholi manahika-humek ma manamakahehe'de matak-ka, nana ana tutu'u eno mangalauk, nai dalen dale.

³¹Hataholi manatao tunga ndoon-na, neukose ana hapu teu naluk; langadoo mofan-na, sama leo ti'ilanga mana'ahiik-ka.

³²Hataholi fo, ana ta haelai namanasa fa, malole lena heni palani tatibatu esa; hataholi fo, ana paletan-na aoinan-na, malole lena heni hataholi manaloso-na kota.

³³Hataholi daebafak-ka tu'u batu, fo ana bubuluk ua-nalen, tehu ka'da MANETUALAIN mesak-kana, nde naketu natataan-na.