Read Termanu AMSAL 20 Bible Online

AMSAL 20 - Termanu bible

AMSAL 20

¹Ala-lalu-a, taon-na hataholi-a da'di malela ha'da tak ma manatao tasi'bu. Hataholi fo ninu losa ana mafuk soona, hataholi nggoak ndia.

²Manek-ka nasa-melun, sama leo singa nangao; hataholi fo, nafofo'a nasa-melun-na, sosoan-na nae, ana tao soe aoinan-na mesak-kana.

³Ka'da hataholi dudu'a-aafi taak-ka, nde ana nau nale'a-napilik; heheo-hihiluk fo nanakoa-kiok-ka nde, dook-ka neme nale'a-napilik-ka mai.

⁴Hataholi manatao tina-osi pelatua, ana sele-nggali tina-osin, ta la'e fain-na fa; mate'en-na, neu fai keketu-kokolun te, ana ta ketu-kolu fa.

⁵Hataholi-a dale bobongoanan-na, sama leo oedolu madema; tehu, hataholi dudu'a manadaik-ka, ta bisa hela oen-na fa.

⁶Hataholi ba'uk-ka manaku aoinan-na nde been-na, tia-laik, tehu susa la'iesak-kana, hapu manalilinekak no te'e-te'ek-ka.

⁷Ni'iana-la laua-lanale, metema lanuu amak, fo malole ma naso'da tunga ndoon-na.

⁸Metema, manek-ka nangatuuk nai kandela manakee-manafula lain soona, nita basa tatao-nono'i mangalauk lala'en-na.

⁹Ade, hapu hataholi bisa nafa'da nae, “Au daleng-nga malalaok, nana au atapo'i eme sala-singok-ka mai so do?”

¹⁰Tatais ma uukuk fo ta matetuk-ka fa, MANETUALAIN ta hii fan.

¹¹Neme ni'iana tatao-nono'in mai-a, bisa bubuluk, ade, ha'da-tataon malole ma ndoos do ta.

¹²Di'idook-ka, soaneu namanene, ma matak-ka, soaneu mete, MANETUALAIN nde nakadada'dik duas-sala.

¹³Hataholi fo, ana hii ka'da sungu-sungu mesan-na, neukose ana da'di hataholi nuu-taa hata-taak.

¹⁴Hataholi manaasak-ka, ana haladoi tataas esa, la'eneu bua-lo'as belin-na seli. Tehu, ana asa basa soona namahoko, nana nabe'i buas ndia belin-na.

¹⁵Hala-kokolak fo naisi malelak-ka, belin-na lena heni lilopilas-sa ma poemata.

¹⁶See nau lu'a-lepa hataholi fe'ek huta-bu'un soona, nandaa ana ho'i-na hataholi ndia hata-heton, da'di neu bua pepe'dak esa, soaneu hala hehelun-na.

¹⁷Hata-heto fo hapun neme tipu-daik-ka mai, makasososan-na la'dan-na seli, tehu makabuin-na, name'dan sama leo batulutu-a.

¹⁸Dale tutu'uk-ka neni buna-boak, neme tatai-dodook-ka mai; hu ndia de, boso puselaipana no ta tutu'u matalolole fan.

¹⁹Hataholi fo, ana hii kokolak hataholi fe'ek-ka, ta nape'da dede'a nafufunik fa; boso leo-mapalasa mo hataholi bafa maloa.

²⁰Hataholi fo, ana soo-supa ina-aman-na, neukose mopo-mates, sama leo banuk-ka maten, nai fai makahatun-na.

²¹Hata-heto fo makasososan-na, hapun no lai-laik, neu mate'en-na, te se'kona baba'e-papalak ta ndia fa.

²²Boso balas mangalauk no mangalauk; mamahele neu MANETUALAIN, te neukose Ndia nde tulu-fali.

²³MANETUALAIN ta hii tatais-sa no anan fo ta matetuk-ka fa.

²⁴MANETUALAIN naketu basa, hataholi daebafak-ka maso'dan-na eno-dalan nai daebafak ia so; hu ndia de, hataholi daebafak-ka, ta bubuluk maso'dan-na, eno-dalan fa.

²⁵Beita maheluk fe MANETUALAIN tutunu-hohotuk fa te, dodoo matalololen dei. Bole da'di, neu fai makabuin te, neukose o masasale dale.

²⁶Manek fo manatee-tenok-ka, ana bubuluk, see kande hataholi mangalauk-ka; neukose ana hukus, ta pake do'o do ampon fa.

²⁷Hataholi daebafak-ka dale bobongoanan-na, nalupa mangale'dok neme MANETUALAIN mai, fo nasalaa-na, basa dalen-na lala'en-na,

²⁸Metema, manek-ka paleta no susue-lalaik, tao tunga ndoon-na ma ndoos ma matetuk, soona neukose, ana koasa nahele.

²⁹Lasamana hataholi muli-soluk-ka, hu kande be'i-balakain, ma hataholi lasik-ka, nanafe ha'da-holomata, hu kande langa mofan-na.

³⁰Bisu pii madaak-ka, lose heni mangalauk-ka, ma ana tao balisi hataholi daebafak-ka dalen-na.