Read Termanu AMSAL 24 Bible Online

AMSAL 24 - Termanu bible

AMSAL 24

¹Boso mape'da dalek neu hataholi mangalauk-ka, ma boso tao tia-laik moos.

²Sila ka'da dudu'a-dodoo naseti-nalakak, ma kokolak hata fo neni soe fe hataholi.

³Mafofo'a uma-loo-a, nenik dudu'a-aafi manatee-tenok ma dudu'a manadaik

⁴Ma metema hapu malelak, soona kaman-nala, neukose henuk no bua-lo'a mabelik ma manahiik-kala.

⁵Hataholi manatee-tenok-ka, koasan-na ba'u lena neme hataholi mabe'i-balakaik-ka mai; ma hataholi malelak-ka, nananita-nalelak lena neme hataholi balakaik-ka mai.

⁶Nanahu muse tutu'u nakahuluk enon-na no malole, fo besak-ka natee-nata'ti, ma manamanoli-mafa'dak boetai lamaba'uk-ka, soona boetai hapu enok soaneu sengi musu-a.

⁷Hataholi nggoak-ka, ta nalelak matalolole manatee-tenok-ka fa. Metema, hataholi kokolak dede'a nanapaluuk nanseli soona, bafan poo-poo.

⁸Hataholi fo, ana tutu'u eno mangalauk tataas esa, neukose loken lae, hataholi manatao tasi'bu.

⁹Hataholi nggoak-ka, malela tipu-dain-na nde been-na sala-singok. Hataholi fo, nakamuu-nakadau hataholi fe'ek tataas esa, su'di see boe, nape'da dale nasak-kana fa.

¹⁰Metema ketu o namahehenam-ma nai toto'a-tataak-ka, soona o hataholi tapandoes.

¹¹Dalem-ma boso naba'e, soaneu po'i hataholi fo, nananaketu basak, soaneu huku nisan so; soi-tefa-ma, hataholi fo, nanahelak leo mamanak lolonak-ka neu.

¹²O bole mafa'da mae, “Au ta nai dede'ak ndia dalek fa.” Tehu, Manetualain taoafik neu o. Ana bubuluk, de naketu-nala'di o dudu'a-aafim. Ana balas hataholi daebafak-ka nandaa no tatao-nono'in.

¹³Anang-ngonei, minu fanioe, nana ndia malole. Sama leo fanioe maneme fani popolan-na mai, metema ninun soona makeek,

¹⁴leondiak boe manatee-tenok-ka, malole soaneu o samanem-ma. Metema, o manatee-tenok soona, o so'da fai manamaim-ma, neuanak.

¹⁵Boso sama leo hataholi mangalauk-ka, fo lalahalak lamanako hataholi dale ndoos-sa, fo latona-la uman-na.

¹⁶Nana leomae hataholi dale ndoos-sa, ana la'o la'di nahenik la'i nono'ik boe, tehu ana fo'a seluk tatas esa. Tehu nasafalin-na, hataholi mangalauk-ka, neukose nakalulutuk, hu kande susa-soe-a.

¹⁷Metema, o musum-ma hapu soe soona, boso mamahoko, ma metema ana tu'da soona, boso mamahoko-setelee.

¹⁸Nana, tao leo bee-o, neukose MANETUALAIN nita o tatao-nono'im ndia, fo nafa'da nae, mangalauk ndia, boema Ana ta huku o musum ndia so'on.

¹⁹Boso mamanasa, do mape'da dalek neu hataholi mangalauk-ka.

²⁰Hataholi mangalauk-ka, so'da fai manamain ta, ma namahehenan ta.

²¹Anang-ngonei, bii-mamata'u neu MANETUALAIN, ma fe ha'da-holomata neu manek-ka. Boso tunga hataholi, fo ana la'ban-nasa.

²²Hataholi matak leondiak-ka, nakalulutuk ka'da nai hatematak esa mesak-kana, hu kande Manetualain, do manek-ka fe soe-a, dede'a anak ta ndia fa.

²³Hataholi manatee-tenok-kala, lafa'da hai lae leo ia: Manakee-manafula, ta bole namabela seselik fa.

²⁴Metema nafa'da nae, hataholi sala taak-ka, masalak, soona neukose basa hataholi-la soo-supa, ma dodoki-aali manakee-manafula ndia.

²⁵Tehu manakee-manafula, fo ana huku hataholi masalak-ka soona, neukose naua-nanale, ma nanafe ha'da-holomata.

²⁶Natataak ndoos-sa nde been-na, ta'du-tana tia-lai matetuk.

²⁷Metema, o tina-osim, ma o tutunga-sasangam beita soona, boso mapadedeik uma-loom.

²⁸Metema, o ne'ek ta soona, boso sakasii hataholi fe'ek dede'an; boeo, boso masapepeko-masandandali neun.

²⁹Boso mafa'da mae, “neukose au balas hata fo, ana taon soaneu au so!”

³⁰Au la'ok hai tunga, hataholi pelatua maisik nggoak esa tinan, ma osi angol-la so.

³¹De au ita ka'da makatema dila-nggauk, ma fii, nai ndia. Pa'a papala nanadaman-na boeo, ndefa henin so.

³²Lelek au taoafik, ma au tai-dodoo dede'ak ndia boema, au hapu nanolik-ka nde ia nae,

³³ No tekauk de sungu dodoo faa, no nangatuuk fo ifa liman-na, fo hahaeaon-na,

³⁴toto'a-tataak ma nuu-taa hata-taak-ka, ana mai sapu, sama leo nakodaa manaho'u tafa-sisilo.