Read Termanu AMSAL 25 Bible Online

AMSAL 25 - Termanu bible

AMSAL 25

¹Manamaik ia, hapu Salomo nanoli-nafa'da fe'en de'ubee, fo hataholi mana'a ngga'di-la nai Hizkia, fo manek Yehuda, uma manen-na, nde salin-nana.

²Manetualain nananamatutua-namadedemak, hu kande hata fo nafunin; manek-ka nanafe ha'da-holomata, hu kande hata fo, nafa'da mangalele'don.

³Sama leo tasi maloaina madema, ma lalai madema, leondiak boeo, manek-ka dudu'a-aafin, ta hapu neuk nala fan.

⁴Tao balisi makahuluk lilofulak-ka neme manggenggeon-na mai dei, besak-ka tuka lilofulak-ka, bisa taon-nan mana'ahiik

⁵Usi madook manamanoli-mafa'da mangalauk-kala, leme uma manek-ka mai, besak-ka, ndoos ma matetuk-ka, tao natea-nahele manapaleta.

⁶ Metema, muu leo manek-ka muu soona, boso tao nono'kabai, hataholi matua-madema.

⁷Malole lenak, loke o kae leo mamanak fo ha'da-holomatan lena, neme ladenu o, fo o fe mamanam-ma leo hataholi fo, nagatutuun-na nai o lain.

⁸Boso makalupu kalaak dede'ak leo manakee-manafulu neu; nana, metema neu fai makabuin, fo hapu buti nae, o masalak soona, o bisa tao beek bai?

⁹Metema, o male'a moo o tia-laim soona, ka'da emi dua mesam-ma, maketu dede'a ndia, tehu boso po'a hataholi fe'ek, dede'a bibila-babaan.

¹⁰Nana, mahani te, neukose ala de'dek o, da'di leo hataholi bafa manasondaik, fo o na'dem-ma nanggenggeo, nai o fai maso'dam-ma dalek.

¹¹Hahapuk fo, nananafa'dak nandaa no fain-na, sama leo lilopilas boak-ka, nai pinga lilofulak dale.

¹²Hataholi dodole maneu-a, kekena-kaka'in neu hataholi fo ana nau namanene, sama leo ndeli lilopilas, do bua-lo'a lilopilas-sa.

¹³Hataholi nadedenuk fo manalilinekak-ka, tao namahoko hataholi manamadenuk-ka, sama leo oe makasufuk ba'eneu hataholi, fo manaketu-kolu manai tina.

¹⁴Hala hehelu pepekok-ka, sama leo ko'as-sa, ma anin-na ta fe u'dan-na mai fa.

¹⁵Ta haelai namanasa, sama-sama no hala-kokola mangana'uk-ka, taon-na hataholi manakoasa, namahele, ma tao nakalulutuk basa lena-la'bak lala'en-na.

¹⁶Boso minu fanioe ba'uk-ka; nana mahani te, neukose o malua.

¹⁷Boso muu tataas esa, leo o uma titia-tataim muu, nana mahani te, neukose ana malua, fo nakamuu-nakadau o.

¹⁸Kalaa pepekok-ka, bisa neni mamates, sama leo tafaina, ai papaluk do kokou isi matane.

¹⁹Mamahele hataholi malelesik-ka, nai fai toto'a-tataak-ka, nde been-na, sama leo aale nenik nisi manggolek-ka, do la'ok nenik ei do'oeik.

²⁰Hataholi fo nakamee soaneu hataholi mana teisusa dale he'dik-ka, sama leo hataholi ta pake bua-lo'as nai fai makalinik-ka, ma sama leo ana po'a dosa neu bisun-na.

²¹ Metema, o musu noom-ma namala'a soona, fen na'a; ma metema, ana maa ma'da soona, fen ninu.

²²No enok ndia, o makamamaek-kana, de neukose, MANETUALAIN ba'e-pala o.

²³Tao leo bee-o, ani kiis-sa neni u'dan, leondiak boe, kokolak namakukutuk-ka, nakadada'dik nasa-meluk.

²⁴Leo nai uma hunuk-ka bu'un-na, malole lena neme leo uma esa no saoinak fo, ana nau ka'da nale'a-napilik.

²⁵Sipo hala malole neme nusa dook mai, sama leo minu oe makasufuk, nai lelek maa ma'da.

²⁶Hataholi malole-a, ta nau nale'a no hataholi malelesik-ka fa, sama leo oemata kelupuak-ka, do oedolu manggengeok-ka.

²⁷Metema minu fanioe lena-lenak soona, ta malole fa, leondiak boe, metema kokolak dede'a kokoa-kikiok ba'uk-ka soona, ta malole fa.

²⁸Hataholi fo, ta nakatatakak nala aoinan-na fa sama leo kota fo, ndefa heni kota musun-na so.