Read Termanu AMSAL 3 Bible Online

AMSAL 3 - Termanu bible

AMSAL 3

¹Anang-ngonei, boso mafandele heni hata fo au anolin neu o so. Mafandendelek tataas esa neu au paletang-nga,

²fo ela o hapu teu naluk, ma o so'dam-ma tetu-temak.

³Ela leo been-na, o mamahele mahele, ma lilineka neu Manetualain ma o nonoo hataholim-ma. Mafandendelek basa sila-la, fo pe'dan nai o dalem dale,

⁴ fo ela Manetualain ma hataholi daebafak-ka, dalen-na nahiik ma fe o ha'da-holomata.

⁵Mamahele MANETUALAIN, no o dale katema tuam-ma, ma boso masalai o deam-ma neu o dudu'a manadaim-ma mesak-kana.

⁶Mafandendelek MANETUALAIN nai basa hata lala'en fo o tao-no'ik-ka dalek, soona neukose natu'du fe o, so'dak malole-a eno-dalan.

⁷ Boso mafa'da mae o malelam-ma lena neme ai uku-a mai; tunga MANETUALAIN ma madook o aoinam-ma neme tatao-nono'i mangalauk-ka mai.

⁸O tatao-nono'im ndia, neukose ana da'di mo'do-akidok ba'eneu o, fo nakahahaik o aopaam-ma, ma ana tao namaloloa o dalem-ma.

⁹Fe ha'da-holomata neu MANETUALAIN nenik tunu-hotu fen hata fo malole, neme basa o hata-hetom, ma o dae-oem oe-isin lala'en-na,

¹⁰soona neukose o sokam-mala, henus no gandum-ma, ma neukose o angom-mala oen-nala sasi beekao, nalosa ta hapu mamanak soaneu pe'da-fua fas.

¹¹ Anang-ngonei, metema MANETUALAIN nanoli o soona, sipok nanolik ndia, da'di leo nasanene'dak esa, ma o dalem-ma boso ba'ihana, la'eneu nanolin ndia.

¹² MANETUALAIN nanoli hataholi fo, Ana sue-lain, sama-na leo amak esa, nanoli anan fo ana sue-lain.

¹³Nanalak ba'eneu hataholi fo, ana da'di hataholi manatee-tenok, ma ana hapu dudu'a manadaik.

¹⁴Nanalan-na ba'u lena heni, hata fo ana hapun neme lilofulak-ka mai, ma belin-na lena heni lilopilas-sa.

¹⁵Manatee-tenok-ka, belin-na lena heni batu poemata; o mahiik basa hata lala'en-na, ta sama no fan.

¹⁶Manatee-tenok-ka, ana fe o teu naluk, su'i-betes ma ha'da-holomata.

¹⁷Manatee-tenok-ka taon-na o mamahoko, ma tetu-temak.

¹⁸Hataholi fo, ana ho'u nahele manatee-tenok-ka, neukose ana hapu so'da matetuk ma maua-manalek-ka.

¹⁹No manatee-tenok-ka, de MANETUALAIN nakadada'dik daebafak-ka; no dudu'a-aafi matanen-na, de nakapepela lalai neu mamanan-na.

²⁰No malelan-na, de Ana tao oemata-la nai dae matanggak-ka dae, fo oen-na faa boema ko'as-sa nai lalai, fo ana po'a oe-a leo daebafak-ka mai.

²¹Hu ndia de anang-ngonei, ho'u mahele manatee-tenok-ka, ma tai-dodook-ka! Boso po'in makandondook,

²²soona neukose o so'dam-ma nananakaboboik — mana'ahiik ma nandaa dale.

²³Neukose o la'ok no nee-nee lino-linok, ma neukose o ta makatunu fa.

²⁴Neukose o muu sungu no ta bii-mamata'u fa, de o sungu mamanee le'odae katemak esa dalen-na.

²⁵Ta paluu o bii-mamata'u neu soe fo ana mai no kaiboik, sama leo ani-sangu, fo ana tuni la'e hataholi manatao tatao-nono'i mangalauk-kala.

²⁶Neukose MANETUALAIN nanea o. Neukose Ana ta po'ilotak o tu'da leo hihi'ik dale muu fa.

²⁷Metema o dudu'a-aafim dai, soaneu tao malole neu hataholi fo, ana paluu o malolem-ma soona, boso tipa tao dede'ak ndia.

²⁸Boso madenu o nonoo hataholim-ma nahani losa balahaa, metema nai hatematak ndia boe, o bisa tulu-falin.

²⁹Boso tutu'u hata esa fo nakatutu'dak o nonoo hataholim fo, ana leo deka no o, ma namahele o.

³⁰Boso male'a-mapilik moo hataholi esa no enon ta, te se'kona hataholi ndia beita tao mangalauk la'iesa boen soaneu o fa.

³¹Boso mape'da dalek neu hataholi maseti-malakak, ma boso tunga hataholi sila ha'da-tataon.

³²Nana, MANETUALAIN ta hii hataholi manatao tatao-nono'i mangalauk-ka fa, tehu Ana dalek esa no hataholi fo so'dan-na ndoos.

³³MANETUALAIN supa-soo hataholi mangalauk-ka uman-na, tehu Ana ba'e-pala hataholi manatungan-nana, uman-na.

³⁴ MANETUALAIN ta hii hataholi fo namatutua-namadedema aoinan-na fa, tehu Ana ba'e-pala hataholi fo nakaloe-nakadae aon-na.

³⁵Neukose hataholi manatee-tenok-ka na'den-na boetai naboomeni, tehu hataholi nggoak-ka, boetai nananakadadaek.