Read Termanu AMSAL 6 Bible Online

AMSAL 6 - Termanu bible

AMSAL 6

¹Anang-ngonei, fafa'kama o maheluk hai moo hataholi esa, fo o bae huta-bu'un.

²De bole da'di, o hala-kokolam nakahihi'ik-na o, ma o hala hehelum-ma, nadai o leo bolok dale neu.

³Anang-ngonei, metema tete'ek-ka leondiak soona, o nai hataholi ndia koasan dale so. Tehu enon-na nde ia, fo o bisa maladeak: muu lai-lai leo hataholi ndia muu; fo moken no nakasetik, fo ela ana po'i o.

⁴Boso muu sungu makahuluk, ma boso hahaeaom-ma.

⁵Se'i po'i o aoinam-ma, neme hihi'ik ndia dalek mai, sama leo manupui, do nusa nalai neme hataholi manausik-ka mai.

⁶Hataholi pelatua, muse taoafik neu ne'ek-ka so'dan-na, fo nanoli neme ndia mai.

⁷Ne'ek-ka mauli-malangan ta, manakoasan do manamanean ta,

⁸tehu, nai fai keketu-kokolun-na, nakaduduluk nana'ak, soaneu fai toto'a-tataan-na.

⁹Tou pelatua ndia, ana nau sungu losa faihi'da? Faihi'da, besak-ka ana nau fo'a?

¹⁰ Ana nangatuuk ifa liman-na, fo ana hahaeaon-na, ma nafa'da nae, “Ah, au tekauk, de au sungu ala faa dei.”

¹¹Tehu ana bei sungu-sungu te, toto'a-tataak-ka tunin-nan, ma nuu-taa hata-taak-ka, ana mai sama leo nakodaa manaho'u tafa-sisilo-a.

¹²Hataholi mangalauk-ka, ma hataholi malela ha'da taak-ka, nasapepeko-nasandandali leo mamanak lala'en-na neu.

¹³Nakahehe'de mata, ma ana fe ta'du fo tipu-dai.

¹⁴Dudu'a-aafin kaboo-kabalik, dalen-na henuk no tutu'u eno mangalauk, ma neni nale'a-napilik nai mamanak lala'en-na.

¹⁵Basa sila-la, neukose no kaiboik, neni soe soaneu aoinan-na, fo ana ta fo'a so'on.

¹⁶MANETUALAIN ta hii dede'ak hitu fa, de Ana ta bisa po'ilotak-kana fa: Heheo-hihiluk fo, manakoa-ndaeaok-ka, bafak fo, masapepeko-masandandalik-ka, limak fo, manatao nisa hataholi sala taak-ka, dodolek fo, manatutu'u hata mangalauk-ka, eik fo, lai-lai neu leo mangalauk-ka neu, sakasii fo, nasapepeko-nasandandali nakandondoo henin, ma hataholi fo, nakadada'dik musu nai nonoon-nala dalek.

²⁰Anang-ngala lemin, tao-no'i hata fo emi amam paleta-kala, ma boso masanggango heni emi inam nanoli-nafa'dak-kala.

²¹Mafandendelek mahele hala kokolan-nala, fo pe'da basas lai emi dalem dale.

²²Sila nanolin-nala neukose, le'a-nole emi nai emi leleo-lala'om-mala dalek, lanea emi nai fai susungum-ma, ma ana fe natutu'duk neu emi nai lelek emi fo'a.

²³Emi ina-amam-mala paletan-nala nono'kabai banuk fo mangale'dok-ka; sila kekena-kaka'in-nala latu'du fe emi so'dak-ka heheo-hihilun fo malole.

²⁴No enok ndia nadook emi neme anafe'ok mangalauk-kala, ma fufu'di-oo'dok-ka neme hataholi fe'ek saoinan mai.

²⁵O dalem-ma boso tu'da neu sila mata maketuan-na, boso makadita neu sila matan fo manafufu'di-oo'dok-ka.

²⁶Manasosoa-piaok-ka hapu baen soona, belin-na ba'u nana'ak pingak esa, tehu manahohonge no hataholi fe'ek saoinan-na soona, muse ba'en nenik samanek.

²⁷Hapu hataholi ko'o-ifa ha'i te ta na'a ba'dun-na fa do?

²⁸Hapu hataholi heheta-aa'i ha'i pila manalolopek-ka, te ta na'a ein-na fa do?

²⁹Ndia susa-soen sama leo ana sungu no hataholi fe'ek saoinan. Se tao-no'in soona, neukose ana ta nala huhukuk-ka deak fa.

³⁰Metema hataholi namanako nana'ak, leomae hu ka nde namala'a boeo, neukose lakadadaek-kana.

³¹Ma metema ala ho'u lan soona, muse ana bae falik-kana didikuk la'i hitu; hu ndia de muse basa laiesak hata-heton lala'en-na.

³²Tehu tao leobeek neu hataholi touk manahohongek-ka? Ana tao nalutu ndia aoinan-na mesak-kana! Ndia nggoan-na seli!

³³Neukose nanafefepa-popokok ma nananakadadaek. Neukose na'den-na da'di manggenggeok soaneu losa dodoon-na.

³⁴Nana, nenik ndia tatao-nono'in ndia de, inak ndia saotoun-na da'dik manaholo inak nalosa nasan-na lua ponu-ponu. Ma metema ana balas nape'da dalek soona, neukose ana ta nanuu dalek susue-lalaik fa.

³⁵Ta bisa fufu'din-nan nenik doik fa; Palsen-na de'u leobee boeo, ta bisa tao naloe nasan-na fa.