Read Termanu AMSAL 7 Bible Online

AMSAL 7 - Termanu bible

AMSAL 7

¹Hei anang-ngonei, mafandendelek mahele au hala-kokolang, ma boso mafandeleheni hata fo au paleta-kala neu o.

²Tunga basa au nanoli-nafa'dang lala'en-na, fo ela o so'dam-ma malole. Tunga basa au nanoling-ngala no malolen-na, sama leo manea aom o matade'em-ma.

³Mafandendelek mahele basa au nanoling-ngala, ma pe'da basas lai o dalem dale.

⁴Sama-na leo manatee-tenok-ka da'di leo o tolanom-mala, ma dudu'a-aafi maneua da'di leo o tia-laim-ma.

⁵Hu ka nde manatee-tenok-ka, de inak manasosoa-piaok-kala ladook neme o mai, ma neme inak fo fufu'di-oo'don makee-mamina.

⁶Faik esa boema au mete eme au umang-nga jendelan-na mai.

⁷Boema au ita touanak ba'uk-ka fo bei muli soluk-kala; tehu au mete hehelu ka'da hataholi esa fo nggoan-na seli nai sila tala'da.

⁸Nai fai le'donoson-na nai lelek sanga makahatu soona, touanak ndia la'o-la'o nai enok kaba'ek fo mana neu leo inak ndia uman-na.

¹⁰Inak ndia inak fo ta malole, ana ta nahiik leo nai uman-na fa. Do'dofan-na nai enok-ka su'un-na, nai lapang dale, do napadeik nai enok kaba'ek-ka. Heheo-hihilun napalani ma ana ta bii-mae fa. Au itan kalua no papake ngganggaon sama leo inak manasosoa-piaok-ka, de neu soluk touanak ndia nenik dale-tutu'u fo mangana'uk.

¹³Ana holun-na touanak ndia boema ana de'in. Ana ta bii-mae fa de nafa'da nae leo ia,

¹⁴“Faik ia au muse bae atetu au ala-hehelung-nga, hu ndia de au fe basa tutunu-hohotuk so.

¹⁵Hu ndia de au uu leo deak fo sanga o, fo o mu'a nai au umang-nga. De besak ia au atongo o so!

¹⁶Au mamana pepe'ung-nga au popoti-papalun nenik isparei dula mata-matak-kala neme Masir mai,

¹⁷ma au pisi nenik mina kaboomenik mur, kainituk ma ai louu makeek so.

¹⁸Besak ia mai fo ita tahoholu ao, fo tame'da tita nahiik-ka nai le'odaek ia.

¹⁹Au saotoung-nga ta nai uma fa, te ana bei leo dook-ka neu.

²⁰Ana neni doik ba'uk-ka, de nai mamasok dua dalen ia ana beita fali fa.”

²¹Leondiak Inak ndia fufu'di touanak-ka nenik fufu'di-oo'dok fo mangana'u, de nalosa dalen-na tu'da.

²²Ana ta pake dudu'a naluk fa, te ana tunga inak ndia sama leo sapi-a nanafok leo mamana dodon-na neu ma sama leo hataholi nanahukuk fo loon soaneu sipo huhukun-na fo nanasadiak ba'eneu hataholi dudu'a-aafi taak-ka;

²³Do'dofa te kokou isik-ka neukose tola sapiselik dalen-na. Touanak ndia ta name'da fa, te samanen-na doi-doso samaleo manupui laa nasale leo hihi'ik-ka neu.

²⁴Hu ndia anang-ngala lemin, mamanenen neu au. Taoafik neu au nanoling-ngala.

²⁵Boso po'ilotak inak matak leondiak-ka fufu'di-oo'do o dalem-ma; boso meu sangan,

²⁶nana ana tao nakalulutuk touk ba'uk-ka so'dan-na so. Ta leke-na manamate-manamopok-ka dede'un-na fa nana hu ndia.

²⁷Ma muu leo uman-na neu soona, sosoan-na nae ho'i enok keke'uk leo mamates-sa.