Read Termanu PENGKHOTBAH 10 Bible Online

PENGKHOTBAH 10 - Termanu bible

PENGKHOTBAH 10

¹Pena popon-na tao-na mina kaboomenik boto esa naboo, nggoak faa anak, tao namopo manatee-tenok madema.

²Nandaa, metema hataholi dodole maneu-a, tao malole, ma hataholi nggoak-ka, tao mangalauk.

³Nggoan-na nananitak nai heheo-hihilun lala'en-na dalek, Ma natu'du panganaa-na neu basa hataholi-la.

⁴Metema manakoasa namanasa o soona, boso moke hahae ue-le'dis. Leomae o salam-ma ba'un-na seli boe, metema o dalem-ma tesa-tama ma ta haelai mamanasa fa soona, o hapu ampon.

⁵Au ita tatao-nono'i mangalauk fe'ek nai daebafak-ka, fo nde basa manakoasa manala'o lenak-kala.

⁶Hataholi nggoak-ka hapu nangatutuu mandela-masa'ak, te hataholi nananita-nalelak-ka, ta hapu hata esa boen.

⁷Au ita hai ata-la sa'e ndala te teidalek manafetoana-la, la'o eik sama leo ata.

⁸ See kali bolok soona, neukose ana tu'da seluk leo dalek neu; see hona nakalulutuk papala nanadamak-ka soona, neukose menge malasok-ka kan.

⁹See naue-nale'di nai mamana kali batu soona, neukose lapuka langak fo lakahina. See bia ai soona, nau do ta nau fa, nakahina.

¹⁰Metema o felam-ma pa'an fo ta fofola fan soona, o muse maue-male'di no sosota-mamanguk nanseli. Pake o dudu'a-aafi maneum-ma, fo tutu'u makahuluk nai o dalem dale.

¹¹Metema menge kaa, te ta tao makasufun nenik aidook fa, soona hataholi manamanea menge-a, sosoa-ndandaan ta so

¹²Hataholi dodole maneu-a, kokolan-na tao-nan manafe ha'da-holomata. Tehu hataholi nggoak-ka mopo-mate, nanahu hala-kokolan-nala.

¹³Ana mulai nenik bafa louk biasa, tehu neu mate'en-na, hala-kokolan sama leo hataholi kamulus-sa.

¹⁴Memak, hataholi nggoak-ka bafa maloa. Fai manamaik-ka nananafunik ba'eneu ita basa-basa-tala. Ta hapu hataholi bisa nafa'da ela manada'dik fo nai lelek ita tat-tala so.

¹⁵Ka'da hataholi nggoak-ka nde ta bubuluk enok leo uman neu fa, Naue-nale'di puselaipana no ana ta hahae fa.

¹⁶Soe ba'eneu nusak fo manen-na muli-soluk, ma basa hataholi matua-mademan-nala tao feta-dote le'odae katemak esa.

¹⁷Maua-manalek neu nusak fo manen-na maneni-mafa'dak, fo hataholi matua-mademan-nala la'a nandaa no fain-na, ta nau mafuk ma nakatatak nalelak aoinan-na.

¹⁸Uma punin-na, neukose nabolo, metema ta tao matalole fan, ma mate'en-na po'o uma ndia, hu kande pela-balek-ka.

¹⁹Feta-dote tao hihikak, ma angol-la tao namahoko-seteleek. Tehu paluu doik soaneu baba'en-na.

²⁰Boso masapala manek-ka, leomae ka'da nai dalek-ka dalek. Boso makahehe'dik hataholi kamasu'ik-ka dalen-na leomae ka'da nai kama dale. Fafa'kama manupui esa, namanene o hala-kokolam, boema neu tuin neu hataholi ndia.