Read Termanu PENGKHOTBAH 3 Bible Online

PENGKHOTBAH 3 - Termanu bible

PENGKHOTBAH 3

¹Basa hata lala'en-na nai daebafak ia ana da'di nai faik fo Manetualain naketu basan so.

²Manetualain naketu faik soaneu bongi, ma faik soaneu mate, faik soaneu sele, ma faik soaneu fe'a henin,

³faik soaneu nanisa, ma faik soaneu nakahahaik, faik soaneu ofe henin, ma faik soaneu nafofo'an.

⁴Manetualain naketu faik soaneu kii ma faik soaneu hika, faik soaneu makaleleu ma faik soaneu foti-longe,

⁵faik soaneu hele nakabubua batu, ma faik soaneu tu'u heni batu, faik soaneu holu, ma faik soaneu nakatatakak aoinak-ka.

⁶Manetualain naketu faik soaneu hapu falik-kana, ma faik soaneu namopon, faik soaneu kila-uku, ma faik soaneu didilo-dodolo,

⁷faik soaneu siiba'en ma faik soaneu seu-soo, faik soaneu denge-denge, ma faik soaneu kokolak.

⁸Manetualain naketu faik soaneu sue-lai, ma faik soaneu nape'da dalek, faik soaneu natee-nata'ti ma faik soaneu mole-dame.

⁹Ade, ita sosota-mamangun buna-boan beek?

¹⁰Au bubuluk ae Manetualain fe lelepa mabela neu ita.

¹¹Naketu basa hata lala'en-na nandaa no fain-na. Ana fe ita dalek fo nahiik soaneu bubuluk fai manamaik-ka, tehu ita ta tabe'i soaneu talelak Manetualain tatao-nono'in neme makasososan losa mate'en-na.

¹²Au bubuluk ae ba'eneu ita, ta hapu hata fo malole neme tamahoko-setelee, ma tame'da tita maso'dak-ka nai ita maso'da fai manalun-na dalek.

¹³Malole lenak ita basa-basa-tala ta'a ma tinu, boema tame'da tita ita sosota-mamangun buna-boan. Ndia nde been-na, Manetualain baba'e-babatin basa sila-la.

¹⁴Au bubuluk Manetualain lima tataan lala'en-na, neukose lahele losa dodoon-na. Hataholi daebafak-ka ta hapu popo-tama fan, do tao kulang-ngana fa. Ma Manetualain ho'i nakeketu leondiak, fo ela ita bii-tamata'u neun.

¹⁵Fo besak ia manada'dik-kala, ala da'di ndek makahulun-na so. Fo neukose ana da'di, ana da'di dook-ka so. Manetualain naketu, fo ela manada'di basak-kala, ala da'di seluk.

¹⁶Hapu seluk hata fo au itan nai daebafak ia, fo nde: Nai bee fo muse hapu ndoos ma matetuk-ka, ma tatao-nono'i malole soona, nai ndia hapu tatao-nono'i mangalauk.

¹⁷Au dale dodoong-nga, neukose Manetualain naketu-nala'di, nau hataholi malole do hataholi mangalauk boe, nana nai de'deak lala'en-na, ma tatao-nono'ik lala'en-na, neukose ala da'di nai faik fo Manetualain naketuk-ka.

¹⁸Dede'a keke'un-na nae leo ia: Manetualain fola ita, soaneu natu'du nae ita ua-nalen sama no bana-manu ua-nalen.

¹⁹Leomae leo beek boe, hataholi daebafak-ka ma buna-manu ua-nalen matak esa. Fo neukose mate esa, leondiak boe fe'e-fe'ek-kala. Duas nde been-na, sama-sama mahahaek mesan. Da'di, hataholi daebafak-ka ua-nalen ta lena neme bana-manu mai fa, nana ba'eneu duas, maso'dak ndia manada'di tak.

²⁰Duas leu leo mamanak matak esa leu. Ala da'di leme dae mai, de neukose ala fali leo dae leu.

²¹Ita ta bubuluk, ade hataholi daebafak-ka duladalen-na kae leo lain neu, ma bana-manu duladalen-na kona leo dae dale neu fa.

²²Hu ndia de, au ame'da ae ta hapu hata fo malole lena ba'eneu hataholi daebafak-ka, neme name'da nita ue-le'din buna-boan. Fe'ek neme ndia mai, ta hapu hata fo ana taon fa. Nai lelek maten soona, ana ta bisa bubuluk hata fo neukose ana da'di fa.