Read Termanu PENGKHOTBAH 4 Bible Online

PENGKHOTBAH 4 - Termanu bible

PENGKHOTBAH 4

¹Basa boema, au taoafik seluk neu ta ndoos ma matetuk lala'en fo ala da'di nai daebafak ia. Hataholi nanantuni-ndenik-kala kii, ma ta hapu hataholi nau tulu-fali fas. Ta hapu hataholi esa boen, nau tulu-fali fas, nanahu manatuni-ndenik sila, lanuu koasa matuaina.

²Au ape'da dalek, lelek afandele hataholi manamate dook-kala so, nanahu sila laua-lanale lena neme hataholi bei maso'dak-kala mai.

³Tehu manamaua-manalek lena seluk kande, hataholi fo beita bongi fas, nana sila beita lita tatao-nono'i mangalauk fo manatao-no'ik nai daebafak ia fa.

⁴Au boeo bubuluk ae hataholi daebafak-ka naue-nale'di no puse titik, ka'da hu kande nape'da dalek nai lelek nita uma titia-tatain ue-le'din buna-boan. Basa sila-la manada'di tak, sama leo sanga enok fo usi anin-na.

⁵Hataholi-la lafa'da lae, ka'da hataholi nggoak kande nangatuuk ifa liman-na, fo ana poilotak aoinan-na mate no la'as-sa.

⁶Fafa'kama dede'ak ndia la'en, tehu malole lenak hata-heto faa anak, sama-sama no dale manatesa-tamak-ka, neme naue-nale'di nenik liman duas, losa pusen-na titi ma usi anin-na.

⁷Bei hapu seluk manada'di tak nai maso'dak ia dalek.

⁸Hapu hataholi maso'da mesa-mesa kana, ta no anak do tolanook boen. Leomae leondiak boe, naue-nale'di nakandondoo henin, losa pusen-na titi, tehu dalen-na ta tesa-tama nenik hata-heton fa. Soaneu see kande pusen-na titi, ma ana ta sipok basa namahoko-setelek lala'en-na fa? Ndia boeo manada'di taak ma eno maso'dak esa neni doidosok.

⁹Dua-duak soona, neni nanalak lena neme ka'da hataholi esa mesak-kana. Metema laue-lale'di soona, neukose buna-boan malole lena.

¹⁰Metema esa tu'u neu soona, esak-ka tulu-falin. Tehu metema hataholi esa tu'u neu, te see kona mesak-kana soona, soe ba'eneun, nanahu ta hapu hataholi tulu-fali fan.

¹¹Nai le'odaek fo makalenik-ka, duas sungu lakabubua fo esa nato'bi fe esa, tehu tao leo bee fo hataholi-a aon-na hapu nato'bi metema mesak-kana?

¹²Hataholi dua la'ok lakabubua soona, ala hapu sili-la musu mamain-na, tehu hataholi kisak-ka, mu'dak laiesak-kana ana kala. Tali telu natatalik da'di esa soona, ta mu'dak ketu fan.

¹³Hataholi nuu-taa hata-taak-ka bisa da'di manek, ma hataholi nanahukuk esa, bisa lali leo kandela manek lain neu. Tehu metema, neu fai lasin-na, manek ndia nggoa naseli, soaneu sipo nanoli-nafa'dak, soona ua-nalen mangalaun-na lena neme ta'eanak nuu-taa hata-taak tehu dodole matane.

¹⁵Au dudu'a-dodoo la'eneu basa hataholi manai daebafak ia, boema au ame'da ae tao leo bee-o, nai sila dalek, neukose hapu ta'eanak esa nggati manek-ka.

¹⁶Nauli-nalanga laun-nala, fafa'kama ta leke nala dede'un-nala fa, tehu ana la'o soona, ta hapu hataholi noke makasi soaneu nafandele tatao-nono'i malolen-na fa. Memak, basa-basan manada'di tak, sama leo sanga enok fo usi anin-na.

¹⁷Manea matalolole, metema nau muu leo MANETUALAIN Uman ma. Malole lenak muu leo ndia muu fo manoli neme soaneu fe tutunu-hohotuk, sama leo hataholi nggoa kala taok-ka. Hataholi sila ta hapu mete ko fe'ek bee kande la'en ma bee kande salan fa.