Read Termanu PENGKHOTBAH 6 Bible Online

PENGKHOTBAH 6 - Termanu bible

PENGKHOTBAH 6

¹Au ita seluk ta ndoos ma matetuk-ka, ana ne'e nahe'di hataholi daebafak-ka nai daebafak ia.

²Nasi'a Manetualain fe hataholi esa su'i-betes, ha'da-holomata ma hata-heto, nalosa ta hapu seluk hata fo nahiik-kana so'on. Tehu Manetualain ta fen loak na'a nita basa baba'e-babatik ndia fa. Nasafalin-na, hataholi fo Ana ta nalelak-kana fa, neukose nde na'a nita su'i-betes ndia. Da'di basa sila la manada'di tak, ma neni dale he'dik.

³Leomae hataholi esa anan natun esa, ma naso'da dook-ka, nalosa namalasi, tehu metema ta name'da nita tetu-temak, ma ta latoi-latonom no malolen-na fa, soona tunga au hahapung-nga, ni'iana beuana nanabongi mates-sa, ua-nalen malole lena neme hataholi ndia mai.

⁴Nana ba'eneu ni'iana beuana ndia ta da'di natatanek, ade nanabongik do ta; neu leo makahatuk dale neu, boema no lai-laik lafandele henin.

⁵Beita nita la'e le'do mahaan-na fa, ma ana beita nalelak maso'dak ia sosoa-ndandaan beek boen, nalosa ana hapu nakandondoo ao no mole-dame.

⁶Ma ndia malole lena neme hataholi fo naso'da teuk 200, tehu ta naua-nanale nita fa. Ade duas ta leu leo mamanak matak esa leu fa do?

⁷Hataholi daebafak-ka naue-nale'di ka'da soaneu na'a, tehu ana ta name'da nae dai so.

⁸Da'di, nanalak hata ba'eneu hataholi dodole maneu-a, metema nakasasamak-kana no hataholi nggoak-ka? Sosoa-ndandaan hata boe, metema hataholi nuu-taa hata-taak-ka ha'da-paliin malole nai laun-na tala'da?

⁹Basa sila-la manada'di tak sama leo sanga enok fo usi anin-na. Malole lenak, ata tame'da dai nenik hata fo ita tanuun, neme tahiik ba'uk-ka seluk tataas esa.

¹⁰Basa hata lala'en manai ia, nai ia neme dook eli mai so. Ita bubuluk tae, hataholi daebafak-ka ta hapu nase'i no hataholi fo balakain-na lena neme ndia mai fa.

¹¹Ana boetai nase'i nala dook-ka, boetai hala-kokolan sosoa-ndandaan ta, nakalenak ana ta hapu nanalak hata esa boen.

¹²Tao leo bee fo hataholi-a hapu bubuluk hata malole nanseli ba'eneun, nai maso'dan fo keke'uanak ma sosoa-ndandaa tak, ma manasapu-manalalok sama leo salaok-ka? Tao leo bee fo hataholi esa, hapu nalelak hata fo neukose ana da'di nai daebafak ia, nai lelek fo tak-kana so?