Read Termanu PENGKHOTBAH 8 Bible Online

PENGKHOTBAH 8 - Termanu bible

PENGKHOTBAH 8

¹Hataholi manatee-tenok-ka namahoko-na ba'un-na seli. Ana bubuluk basa dede'ak lala'en-na natataan-na. Manatee-tenok-ka, tao-nan, ana hume nana namahoko nalosa mata-panan napena tataas esa.

²Metema manek-ka po'i paleta soona, tunga leona ma boso makalupu lai-lai tao hehelu-balataak moo Manetualain.

³Manek-ka bisa ho'i nakeketuk tunga dale hihiin-na, metema ana ta nau fa soona, malole lenak madook aoinam-ma neme manek-ka mai.

⁴Manek-ka ho'i nakeketuk tunga koasan-na; ta hapu hataholi napalani se'i fan!

⁵Hataholi manatungan-nana, neukose nee-nee lino-linok ma tetu-temak hataholi dodole maneu-a bubuluk, faihi'da ma tao leo beek fo tunga manek-ka.

⁶Ba'eneu hata lala'en-na hapu fain-na, ma enon-na mesak-kana, tehu ita talelak ka'da faa anak nanaseli!

⁷Ta hapu hataholi esa boen, bubuluk ua-nale beek kande nahani nana fa, ma ta hapu hataholi bisa nafa'da hata fo neukose ana da'di fa.

⁸Ta hapu hataholi esa boen, bisa napanggee, do nakamama'ak mamaten-na fa. Ndia natee-natatik esa, fo ta hapu di'o heni fan. ta bisa nala deak neme mamates-sa mai fa leomae ana sanga enok nenik ke'di-ndiuk do tipu daik boe.

⁹Au ita basa ia-la, nai lelek au taoafik neu manada'dik manai daebafak ia lala'en-na. Nasi'a hataholi daebafak-ka pake koasan-na soaneu tao soe nonoo hataholin-na.

¹⁰Au ita hai hataholi mangalauk-ka maten, de latoi-latonon. Tehu lelek hataholi-la fali leme natoi-natonon mai, te ala koan nai kota fo mamanak ana tao tatao-nono'i managalauk-ka. Da'di ndia boeo manada'di tak.

¹¹Tao le'e de, mu'dak la'iesak-kana, hataholi-a tao tatao-nono'i mangalauk-ka? Hu kande ta fe huhukuk-ka no lai-laik fa.

¹²Leomae hataholi masala-masingok esa, ana tao tatao-nono'i mangalauk natun esa, tehu naso'da nahele, nakalenak teun-na manalu. Hataholi-la lafa'da lae, see tunga Manetualain soona, tao leo bee-o, so'dan-na mu'da-mu'dak mesan.

¹³Nasafalin-na, hataholi mangalauk-ka hapu toto'a-tataak makadotok. So'dan-na sapu-lalo no lai-laik, sama leo salaok-ka. Neukose ana matenulak nanahu ana ta tunga ndia MANETUALAIN-na fa.

¹⁴Tehu basa sila-la bafa louk mesak-kana. Mete ka'da hata fo ana da'di nai daebafak ka: Hapu hataholi kamahehelek-ka nanahukuk sama leo hataholi malelesik. Hapu hataholi mangalauk-ka, hapu ngga'di sama leo hataholi kamahehelek. Da'di, ndia boeo manada'di tak.

¹⁵Au ho'i keke'un nde ia nae: hataholi-a muse namahoko-setelee. Nanahu nai maso'dan nai daebafak-ka ta hapu namahoko fe'ek ba'eneun fa te ka'da na'a ninu ma namahoko-setelee. Ana hapuk-ka ka'da nde ndia nai sosota-mamangun dale, nai fai maso'dan fo Manetualain fen-na dalek.

¹⁶Lelek au sanga enok fo hapu manatee-tenok-ka, ma au taoafik neu manada'dik manai daebafak ia lala'en-na, boema au ame'dan, leomae lele'do-le'odaen ita sota-mate, ta hahaeao-tala faa anak boen,

¹⁷ita ta bisa talelak Manetualain nakeketun-na fa. Ita sanga enok tao leo beek boeo, ita ta hapu talelak-kana makandondook fa. Hataholi dodole maneu-a manaku nae nalelak-kana, tehu tunga ndoon-na, ta nalelak-kana fa.