Read Termanu PENGKHOTBAH 9 Bible Online

PENGKHOTBAH 9 - Termanu bible

PENGKHOTBAH 9

¹Au dodoo basa sila-la no lutu-lutuk. Manetualain ito-ato hataholi malole ma manatee-tenok-ka so'dan-nala nakalenak metema hataholi ndia nakamuu-nakadau do ana sue lai. Ta hapu hataholi bubuluk hata fo ana da'di nai fai makabuin fa.

²Memak, ua-nalek matak esa ana tuni la'e hataholi-a esa-esak; Nau hataholi dale ndoos do hataholi malela ha'da tak-ka, nau hataholi malole do hataholi mangalauk, nau hataholi balisi do hataholi manggenggeok, nau hataholi fo ana tunu-hotu tutunu-hohotuk, do hataholi manatunu-hotu tak-ka boe. Hataholi malole-a, ua-nalen ta malole lena heni hataholi masala-masingok-ka fa, hataholi manasoo-supak-ka, sama no hataholi fo ana ta nau soo-supa fa.

³Da'di ua nalek matak esa, ana tuni la'e basa-basas. De ndia nde been-na dede'ak esa neni dale he'dik, sama leo manada'dik manai daebafak-ka lala'en-nan boe. Nai lelek hataholi daebafak-ka bei nai fai maso'dan-na dalek, dalen-na henuk no tatao-nono'i mangalauk-ka, ma dudu'a-aafin boeo nggoak. Boema no kaiboik natongo no fai mamaten-na.

⁴Tehu lelek bei nai fai maso'dan-na dalek nai lelek ndia hapu namahehehanak. Ade busa maso'dak-ka ta naua-nanale lena neme singa mates-sa mai hetu?

⁵Ta bole nae ta, hataholi maso'dak-ka bubuluk nae mamates-sa nahanin, tehu hataholi manamatek-ka, ana ta bubuluk hata-hata fa. Ta hapu ngga'di do sese'bak ba'eneun fa, ma lafendele heni na'den-na so.

⁶Name'da susue tou-ta'ek ma iina-anafe'ok-ka, nakamuu-nakadauk-ka, ma dale hihiik fo manalua ponu-ponuk-ka, basa-basas mate sama-sama lon. Ana ta ho'i seluk baba'ek hata-hata nai basa manada'dik manai daebafak-ka lala'en-na so'on.

⁷Ayo, ka'da mu'a-minu ma mamahoko-setelee leona, minu o angol-la no namahoko-seteleek. Manetualain nakahe'ik, nakalenak Ana nau.

⁸Nemen-na fo o mata-panan namaneu ma napena.

⁹Mame'da mita maso'dak-ka moo o saoina susue-lalaim nai o fai maso'da manada'di tam fo Manetualain fen neu o nai daebafak-ka. Mame'da mitan tunga fa'ik, leomae sosoa-ndandaan ta boe. Nana o sosota-mamangum ngga'din-na ka'da ndia mesak-kana.

¹⁰Tao-no'i o bela-ba'un lala'en-na nenik o be'i-balakaim lala'en-na. Nana mahani te, ta hapu seluk dudu'a-aafik do ue-le'dis so'on. Ta hapu malelak do manatee-tenok nai hataholi manamatek-kala daebafan-na fa. Ma neukose o muu leo naa muu.

¹¹Nai daebafak ia, au bei ita seluk: nai nakasusu'dik-ka dalek, hataholi manamalai lai-laik-ka, ta neni tataas esa fa, nai natee-natatik-ka dalek, hataholi mabe'i-balakaik-ka, ta sengi tataas esa fa. Hataholi manatee-tenok-ka, ana ta hapu tutunga-sasangak tataas esa fa. Ma hataholi dodole maneu-a, ana ta hapu su'i-betes tataas esa fa. Boeo basa hataholi malelaina-la, ta da'di nananita-nalelak tataas esa fa. Nana ua-nale manada'di tak-ka, tuni la'e su'di see boe.

¹²Hataholi daebafak-ka ta bubuluk faihi'da fain-na losa fa. Sama leo hihi'ik-ka nala manupui-a ma dala nala i'ak-ka, leondiak boe, soe-a tuni la'e hataholi daebafak-ka nai faik fo ana ta bubuluk-kana fa.

¹³Manamaik ia, hapu natutu'duk ese la'en besa-besa, tao leo beek fo hataholi-a so'u laik manatee-tenok-ka:

¹⁴Hapu kota anak esa laun-na lumanak. Faik esa boema, mane matua esa mai sapu-na kota ndia. Nakahapi-nan boema naheheleaon fo ana hona nakalulutuk papala nanadaman-na.

¹⁵Nai kota ndia, hapu hataholi nuu-taa hata-taak manatee-tenok esa. Ana hapu nasala'e-na kota ndia. Tehu hu kande nuu-taa hata-taak de, no lai-laik lafandele heni tatao-nono'i malolen-na, de ta hapu hataholi esa boen, nafandele fan.

¹⁶Da'di, au hahapung-nga la'en nae manatee-tenok-ka lena heni bei-balakaik-ka. Leomae leondiak boe, hataholi nuu-taa hata-taak-ka manatee-tenon-na ta nanataoafik fa. Ta hapu hataholi taoafik neu hala-kokolan fa.

¹⁷Malole lenak nenene hataholi malelaina esa hala-kokola mangana'un-na neme hataholi manakoasa esa eekin-na nai hataholi panganaa-la nakabubuan dale.

¹⁸Manatee-tenok-ka masosoa-ndandaak lena neme tafa-sisilo mai, tehu tauk titik esa tao nalutu kapaoe ullek esa.