Read Termanu KIDUNG AGUNG 2 Bible Online

KIDUNG AGUNG 2 - Termanu bible

KIDUNG AGUNG 2

¹Au ka'da bunga mawar neme Saron mai, ma bunga tale nai bafak-kala dalek.

²Sama leo bunga tale nai makatema dila-nggauk tala'da, leondiak boe, au inana susueng-nga nai basa anafe'oanak-kala tala'da.

³Sama leo ai apel-la nai ai manai nula dale-la tala'da, leondiak boe, au inana susueng-nga nai basa touanak-kala tala'da. Au amahoko au sulu nai huun-na, boan-na makeek nanseli.

⁴Noo au leo kama feta dale neu, mata memeten neu au-a, henuk no susue tou-ta'ek.

⁵Tao balakai au nenik angol boa makeek, tao mamopo au maa ma'dang-nga nenik apel-la boan-na, nana au amahe'di he'di ina-anafe'ok.

⁶Lima kiin-na tia-to'ba au langang-nga, lima konan-na holu au.

⁷Maheluk leon, hai ana fe'o anak Yerusalem-mala lemin, no nusa-la ma nusa susula mukuk-kala nai mook ka, mae emi ta mapanggengge susue ina-anafe'ok-ka fa, losa name'da namahokok.

⁸Mamanene te! Au touana susueng-nga mai! Ndia sama leo nusa ana do nusa susula mukuk-ka. Nakaboboku nai letek-kala, Boku-boku nai pupukuk-kala lain. Mitak, napadeik nai papala nanadamak-ka selik, ana sanga nenik matan-na; ana titino neme jendela lelan-nala mai.

¹⁰Mamanene te, au touana susueng-nga kokolak no au. Mai leon fa'ding-ngo, mai leon au mata makeeng-ngonei!

¹¹Mitak, fai makasufuk-ka seli so, fai oefaak-ka seli so.

¹²Bunga-la lakapela lai tina; fai keke'dik-ka losa so; tamanene kateu halak-kala, nai ita dae-oen.

¹³Ai kaak-ka mulai naboa, ai angol-la bunan-na naboomeni. Mai leon fa'ding-ngo, mai leon au mata makeeng-ngonei.

¹⁴Ou au manupui kaluang manai batu lelak-kala, nai mamana nafunik manai masakakalak madema-la, nemen-na, fo au ita o mata-panam, ma amanene o halam-ma, nana o mata-panam makeek ma o halam-ma lolen-na seli.

¹⁵Ho'u-ma busa sila-la leon, busa ana manatao nalutu osi angol-la, nana ami osi angol-la bunan-na besak-ka lakapela.

¹⁶Au touana susueng-nga au nuung, ma ndia nuun au, ana foo bi'ilopon-nala nai bunga tale-la tala'da

¹⁷losa ani lolebalahaak-ka filo-filo fo ana tao namopo makahatu le'odaek-ka. Fali leon au touana susueng-ngonei, sama leo nusa susula mukuk ka, sama leo nusa ana nai letelepak Beter-ra.