Read Termanu KIDUNG AGUNG 4 Bible Online

KIDUNG AGUNG 4 - Termanu bible

KIDUNG AGUNG 4

¹O mata makeek, au susueng-ngo teta'ek-ka, o mata makeek o matam-ma, nai o lalaa langam dale, sama leo manupui kalua; o langadoom-ma, sama leo bi'ihii bubuak manakona leme pupukuk Gilead-tala mai.

²O nisim-ma fulak, sama leo bi'ilopo bubuak fo besak-ka nggute bulun-na ma nadiu basa oe; dua-dua sama leo bi'ilopo ana takalapak-kala, ta mopo esa boen.

³O difadoom-ma, sama leo tema pilas bibiak esa, ma o bafam-ma mana'ahiik. O nasebu'um-ma, sama leo dalima boa seselik, nafuni nai o lalaa langam dale.

⁴O botolim-ma, sama leo Dauk uma puni mademan-na fo nananafo'ak soaneu pe'da tafa-sisilo. O henum-ma, sama leo babaa fanak lifun esa, basa palani ta'tibatu-la aitete'en-nala.

⁵O su'um-ma, sama leo nusa ana 2, nusa ana susula muku takalapak-ka, bei na'a na'u nai bunga tale-la tala'da.

⁶Au hii u leo letek laluteik-ka u, leo pupuku boomenik-ka u, losa anin lolebalahaak-ka filo-filo mai, fo tao namopo makahatu le'odaek-ka.

⁷O mana'ahiik manseli au susueng-ngo, ta hapu bu'u-ba'ek nai o fa.

⁸Au saoinang-ngonei, mai fo ata kona teme Libanon mai, mai fo ata kona teme Libanon mai. Kona teme letek Amana poin-na mai leon, neme letek Senir ma letek Hermon-na po'in-na mai, fo meoasu ma singa mamana leleon-na.

⁹O tao matu'da au daleng-nga fa'ding-ngo, au saoinang-ngo, o tao matu'da au daleng-nga nenik o mata mametem-ma, nenik poemata mana'ahiik manai o henum-ma.

¹⁰O susuem-ma la'dan-na seli, fa'ding-ngo, au saoinang-ngo, la'dan-na lena heni angol-la O minam-ma naboomeni, lena heni basa bumbu mata-matak lala'en-na.

¹¹O hala-kokolam makeek au saoinang-ngo sama leo fanioe ma kapoe isik-ka. O papake-ngganggaom naboomeni sama leo Letek Libanon-na.

¹²Au inaana susueng-nga nde been-na osi mapapala nanadamak, osi mapapala nanadamak-ka, oemata nanaggoe nisak.

¹³Ai dalima-la moli nai naa, boan-nala mala'da hiik nanseli. Bunga pacar ma narwastu,

¹⁴narwastu, kunik, ai lou makeek ma tefu, no ai boomenik mata-matak-kala. Ai daa tuuk ma gaharu, no bumbu nanahelek mata-matak-kala.

¹⁵Oemata manai au osing dale-a, ana faa oe maso'dak fo ana faa neme Libanon mai!

¹⁶Hai anin kii, fo'a leona, hai anin kona, mai leona! Filo-filo nai au osing dale, nemen-na, fo naboomeni. Sa'di tao leo bee fo au inaana susueng-nga neu leo osin dale neu, fo na'a ai boa mala'da hiin-nala.