Read Termanu YESAYA 1 Bible Online

YESAYA 1 - Termanu bible

YESAYA 1

¹ Susulak ia isin-na, hala heheluk la'eneu Yehuda ma Yerusalem, fo Manetualain nafa'dan neu Yesaya, fo Amos anan-na, nai lelek Uzia, Yotam, Ahas ma Hizkia, ala paleta lai Yehuda.

²Hai lalai, mamanene leon hai daebafak-ka, taoafik leona! MANETUALAIN nafa'da nae, “Au anang fo Au akabobois-sala, ala lena-la'ban Au paletang-nga so.

³Sapi nalelak lamatuan-na, keledei nalelak mamana nana'an fo lamatuan-na sadiak-ka. Tehu Au anang Israel, ta; ta lalelak-kana fa.”

⁴Soe ba'eneu emi, leoina fo masala-masingok-kala, hataholi fo dale aafi tak-kala, ma manatao tatao-nono'i mangalauk-kala lemin! Emi kosik de emi tu'da, hu kande emi sala-singom-mala. Emi tipa heni MANETUALAIN so, ma emi masadea Manetualain fo Malalao-malalafuk nanseli, fo emi muse sene-do'ok-ka.

⁵Tao le'e de, emi ka'da mase'i makandoo? Ade emi nau huku emi belak-ka seluk bai do? Emi langam-ma bisu-bisu mesan so, emi dalem-ma, ma emi dudu'a-aafim he'dis.

⁶Neme emi langam-ma, losa emi eim-ma, ta hapu so'da-la'dak fa. Emi aom-ma henuk no peta-paek, bisu piik ma bisu mesa-mesan. Emi bisum sila-la, beita nanasafe balisik do nanapopoti-papaluk, ma ta nanapuli-namo'dok nenik mina boen.

⁷Emi nusam-ma, nanatao namopo-namatek so; emi kotam-mala, nanahotu henik. Hataholi nusa dea-la, ho'i-la emi daem-ma, de ala tao lakalulutuk la'iesak-kasa nai emi matam.

⁸Ela ka'da Yerusalem, tehu lakahapi-la seli, de ta nakatatakak so'on, sama leo lalaak-ka nai osi angol dale, do moa nai osi titimupokok dale.

⁹ Leounik-ka, MANETUALAIN Fo Manakoasa, Ana ta fe ita hataholi de'ubee laladeak fa soona, mopo-mate basa ita, sama leo Sodom ma Gomora so.

¹⁰Yerusalem, basa mauli-malangan, ma emi leoinam-ma, da'di sama leo hataholi Sodom ma Gomora so. Mamanene hata fo, MANETUALAIN nafa'dan neu emi; taoafik neu hata fo, ita Manetualain-na, nanolin neu ita.

¹¹ MANETUALAIN nafa'da nae, “Emi maedaenga, Au ahiik basa tutunu-hohotuk fo emi tunu-hotu makandondoo henin fe Au sila-la do? Au malua emi tutunu-hohotu nanatunu bi'ilopom-ma, ma emi sapianam-mala minan-na. Au ta ahiik emi sapi manem, bi'ilopo ma bi'ihiim-mala daan-na fa.

¹²See nadenu emi, fo meni basa tunu-hotuk sila-la lala'en-na, nai lelek emi mai sene-do'ok neu Au? See nadenu emi meu heheta-aa'i Au Uma Malalao-malalafung-nga?

¹³Palsuma la'iesak-kana, emi meni emi tunu-hotum sila-la. Au malua tunu-hotuk sila-la boon-na. Au ta ahiik, ma Au ta akatatakak mete emi tao feta Bula Beuk-ka, fai Sabat-tala ma fai malole-la, boema nakabubua agama-la. Emi tao manggenggeo basa sila-la, nenik emi sala-singom-mala, de nalupa lelepa mabela esa ba'eneu Au; Au sota-mangu no lu'a-lepak-ka so.

¹⁵Metema, emi so'uk emi limam-ma, fo emi hule-haladoi soona, Au ta nau taoafik neu fan. Au ta paluu emi huhule-haladoim dede'un-na de'ubee fa, ma Au ta nau amanene fan, nana emi manisa la'i ba'uk-ka nenik emi limam ndia so.

¹⁶Safe emi aoinam-ma, losa balisi. Hahae basa tatao-nono'i mangalauk fo emi tao-no'ik sila-la. Hei, boso boe tao tatao-nono'i mangalauk seluk bai,

¹⁷fo manoli tao tatao-nono'i malole leona. Mapadedeik matetu ndoos ma matetuk-ka, ma tu'u-tapa heni tuni-ndenik-ka; fe anamaak-kala haak, ma masala'e inafalu-la dede'an-na.”

¹⁸MANETUALAIN nafa'da nae, “Mai fo ata taketu-tala'di dede'ak ia. Leomae emi sala-singom pilas sama leo kaisuma, te neukose Au safe-a emi da'di fulak sama leo abas-sa. Leomae emi sala-singom makadotok ma belak-ka, te neukose Au fe do'o do ampon neu emi.

¹⁹Metema, emi nau tunga Au soona, neukose emi hapu basa hata malole manai emi nusam-ma.

²⁰Tehu metema, emi lena-la'ban Au soona, neukose emi mate nai natee-natatik dale. Au fo MANETUALAIN, nde manakokolak-ka.”

²¹Kota fo makahulun-na ana lilineka, besak ia sama leo ina manasosoa-piaok-ka! Makahulun-na laun-nala ndoos ma matetuk, ma ta lasapepeko-lasandandali fa, tehu besak ia, kanisak-kala leo lai dalek.

²²Yerusalem, makahulun-na o sama leo lilofulak-ka, tehu besak ia, o belim ta so. Makahulun-na o sama leo angol mala'da hiik-ka, tehu besak ia, o ka'da oe mesak-kana.

²³Basa o mauli-malangam-mala manala'ban paleta, ma ala da'di nakodaa-la lima-ein; ala hii ka'da sipo bua palsen, ma tali-doi sosolo dalek. Ala ta nau lasala'e anamaak-kala nai manakee-manafula matan fa; ala ta nau lamanene faluina-la, hala kalaan-nala fa.

²⁴Hu ndia de MANETUALAIN Fo Manakoasa, fo Israel Manetualain-na, nafa'da nae, “Hai, Au musung-ngala lemin, neukose Au balas emi nenik nape'da dalek, fo emi ta tao susa Au so'on.

²⁵Neukose Au ho'i nakeketuk soaneu emi. Neukose Au fola emi, sama leo hataholi-a fola liti-a; Neukose Au lose heni basa manggenggeok lala'en-na neme emi mai.

²⁶Neukose Au fe seluk emi manakee-manafula, ma manamanoli-mafa'dak sama leo makahulun-na. Soona neukose Yerusalem nanafoik na'de kota fo, ndoos ma matetuk, ma manalilinekak.”

²⁷MANETUALAIN ndoos ma matetuk, boema Ana soi-tefa-na Yerusalem, ma hataholin fo manasale dalek-kala.

²⁸Tehu hataholi masala-masingok fo manalena-la'ban Ndia paletan-na, neukose Ana tao namopo-namates, ma basa manala'o ela Manetualain-na, neukose Ana tao namopo-namates.

²⁹Neukose ala hapu mamaek, nanahu ala sene-do'ok neu ai ina-la, ma ala fe hehelik lamatua daebafak-kala osi-lutu.

³⁰Neukose ala da'di sama leo aihuu matuaina, fo doon-na male, ma sama leo osi fo, oe ta leo dalek neu fa.

³¹Sama leo ha'ikaa anak esa, ana hotuheni ha'deaik-ka, leondiak boe, hataholi mana koasa-la, neukose sila tatao-nono'i mangalaun-nala, nde tao lamopo-lamates-sala, de ta hapu hata esa boen, bisa tao nate'e nakalulutuk ndia fa.