Read Termanu YESAYA 10 Bible Online

YESAYA 10 - Termanu bible

YESAYA 10

¹Soe ba'eneu emi fo, manatao hoholo-lalanek fo ta ndoos ma matetuk fa, soaneu tuni-ndeni Au leoinang-nga.

²No enok ndia, emi kena-ka'i hataholi nuu-taa hata-taak-ka soaneu ana hapu sila haak-ka ma ala hapu ndoos ma matetuk-ka, ma emi loso-ma faluina-anamaak-ka hata-heton-nala.

³Neukose emi tao beek nai faik fo, Manetualain huku emi? Ade emi sanga enok tao leo beek, nai lelek fo Ana fe soe-a mai neme nusa dook mai? Neukose emi moke tutulu-fafalik neu see? Neukose emi mafuni emi su'i-betem sila-la nai bee?

⁴Emi ua-nalem, nde ka'da nanataonisak nai natee-natatik dale, ma nanafook da'di leo hataholi nanafook. Tehu MANETUALAIN bei namanasa, de Ana huku nahele.

⁵ MANETUALAIN nafa'da nae, “Soe ba'eneu Asyur! Au pake Asyur da'di leo ue, ma ai kalapu'ak soaneu fepa hataholi fo Au nasa-melung tu'da la'es.

⁶Au haitua Asyur ne'i fo ana sapu-na Au leoinang fo manafali deak-kala, ma manatao-na Au amanasa. Au adenu Asyur ne'i fo, ana bonga uma boema namanako, ma ana heheta-aa'i Au leoinang-nga sama leo afu manai enok lain-na.”

⁷Tehu mane Asyur-ra, nanuu dale tutu'u mesan. Naketu basa nai dalen dale soaneu ana pake balakaik fo ana tao namopo-namate leoina makadotok.

⁸Namatutua-namadedema aoinan-na nae, “Au malanga solda'du manai laing-ngala, manek mesan-mesan!

⁹Au loso-a kota Kalno, ma kota Karkemis, kota Hamat ma kota Arpad-ta. Au loso-a kota Samaria, ma kota Damsyik-ka boe.

¹⁰Au sengi nusa-nusak fo ala sene-do'ok neu sosongo-tatangok fo koasan-nala lena heni sosongo-tatangok manai Yerusalem ma Samaria-la.

¹¹Au tao amopo-amate Samaria no basa sosongo-tatangon-nala so. Neukose au tao leondiak boe, nai Yerusalem no basa sosongo-tatangok nanasene-do'ok manai naa-la.”

¹²Tehu MANETUALAIN nafa'da nae, “Metema hata fo Au sanga taon nai Pupukuk Sion-na ma nai Yerusalem ndia basan soona, neukose Au huku manek Asyur-ra, nanahu manakoao-ndaeaon-na ma namatutua-namadedema aoinan-na.”

¹³Mane Asyur-a kokolak bafa maloa nae, “Au tao basa sila-la nenik au koasa mesang-nga. Au manatee-tenok ma malelak. Au koka heni basa dae too fo manata'da leoina no leoina, ma au loso-a basa hata fo ala sadiak-kala. Au sama leo banteng-nga, fo au heheta-aa'i manapaletak-kala.

¹⁴Leoina manai daebafak-ka, sama leo manupui ndunuk-ka; au ho'i-a sila hata-heton no mudak, sama leo hataholi-a, ana ko'bo manapui tolo nanala'o elak-ka nai ndunun dale. Ta hapu li'da makalalapak, ma mananapook bafan-na, do manakio-kiok fa.”

¹⁵Tehu MANETUALAIN nafa'da nae, “Ade hapu taka namatutua-namadedema aon-na, soaneu hataholi manapaken-nana do? Ade hoholok-ka nanapaluuk lena neme hataholi manapaken-nana mai do? Ai kalapu'ak-ka ta nde so'uk hataholi-a fa, tehu hataholi-a nde so'uk ai kalapu'ak-ka.”

¹⁶Hu kande hataholi Asyur-ra, lamatutua-lamadedema aoinan-nala so, de neukose MANETUALAIN Fo Manakoasa, neukose Ana fe he'di-laus-sa mai, soaneu huku malanga solda'du ao makadelek sila-la. Neukose ala hapu he'di sumaik manalope-lopek-ka, sama leo ha'ipilak-ka, nakandondoo henin.

¹⁷Manetualain fo Malalao-malalafuk, fo Israel Masa'an-na, neukose Ana da'di sama leo ha'i pilak-ka, fo na'a heni basa hata lala'en-na ka'da nai faik esa dalen-na, nakalenak basa la'iesak makatema dila-nggauk-kala.

¹⁸Nula matuaina-la ma tina-osi maoe-maisik manai nusa Asyur-ra, neukose nanatao nakalulutuk la'iesak-kasa, sama leo hataholi kamahe'dis fo ana doi-doso losa mate.

¹⁹Neukose ela ka'da ai lumanak, nalosa ni'iana-la boeo, bisa leke-la dede'un-na.

²⁰Neukose fain-na losa, fo bei ela leoina Israel-la hataholin maso'dak-kala, ala ta lamahena seluk neu leoina manakoasa, fo isabain-na ana tao namopo-namate sila, tehu lamahena neu MANETUALAIN fo Israel Manetualain malalao-malalafun-na.

²¹Bei ela leoina Israel-la hataholi lumanan-nala, neukose ala tukatei-saledale neu Manetualain fo ao makadelek ma palani.

²² Leomae besak ia, hataholi Israel-la dede'un-na de'u solokaek manai tasi su'un-na, tehu neukose ka'da sila de'ubee tukatei-saledale. MANETUALAIN huhukun-na deka so, de memak nandaa, ma no ndoos ma matetuk, leoina ndia nanatao namopo-namatek.

²³Hei, MANETUALAIN Fo Manakoasa, neukose Ana tao nakalulutuk nusak-ka lala'en-na; MANETUALAIN nakeketun-na nde ndia, de ta bisa hela falik-kana so'on.

²⁴MANETUALAIN Fo Manakoasa, nafa'da anan manaleo nai Sion-na nae, “Boso bii-mamata'u neu hataholi Asyur-ra, leomae ala tuni-ndeni ma fepa-li'u emi, sama leo makahulun-na hataholi Masir-ra tataon-na.

²⁵Nai fai keke'uanak esa mesan, Au nasa-melung neu emi-a nate'e, boema neukose Au tao amopo-amates.

²⁶Au, MANETUALAIN Fo Manakoasa, neukose Au filuk-kasa nenik ue, sama leo Au anoli hataholi Midian-nala leme lete batu Oreb-pa. Neukose Au huku Asyur, sama leo Au huku Masir.

²⁷Nai lelek ndia, neukose Au soi-po'i emi neme Asyur tuni-ndenin mai, fo ala ta koasa emi so'on.”

²⁸Solda'du Asyur-ra loso-la kota Ayat-ta so. Ala seli Migron so! Ala la'oela tua-lepan-nala nai Mikhmas!

²⁹Ala seli lelenak-ka so, de ala sungu nai Geba! Kota Rama laun-nala dele betoo, ma laun manai kota Gibea, Mane Saul-la kotan-na, lalai so.

³⁰Hai laun Galim-mala lemin! Nggasi leona! Laun Laisya-la mamanene leona. Laun Anatot-tala, mataa leona!

³¹Madmena ma Gebim laun-nala, lalai leo nusak fe'ek leu.

³²Faik ia, musunok-ka nai kota Nob-pa, de nai naa, ala kukumu liman-nala lasale leo Pupuku Sion-na, ma leo kota Yerusalem-ma neu.

³³MANETUALAIN Fo Manakoasa, neukose tao nabuus, sama leo ta'ti heni ai ndanak-ka neme huun-na mai. Fo manadedeo leo lain neu, ma mademaina-la, neukose nanalo'ok ma nanatao nabuuk.

³⁴Neukose MANETUALAIN tao natu'us, sama leo ai nanalo'ok nenik taka, nai nula tala'da. Leomae sila mabe'i-balakaik sama leo ai mateaina manai Libanon-nala, tehu neukose ala tu'u leu boe!