Read Termanu YESAYA 13 Bible Online

YESAYA 13 - Termanu bible

YESAYA 13

¹ Manetualain hala-hehelun la'eneu Babel-la nde ia, de Amos anan Yesaya nde sipon-nana.

²Masa'e dedeo natee-natatik-kala neu pupuku na'u tak-kala poin-na! Maloo bou-bou neu basa solda'du-la, ma so'uk emi limam-mala, fo ela ala sapu-la kota manakoao-ndaeaok ndia lelesuinan-nala.

³MANETUALAIN naloo basa Ana hele palani ta'ti batu la so. Hataholi sila aon-nala makadelek, palani, ma Ana bisa namaheles. MANETUALAIN fes bela-ba'uk fo ala huku hataholi fo nasa-melun la'es.

⁴Mamanene halak-kala lakalupu lai letelepak-ka, sama leo hataholi makadotok nanseli, halan-nala. Mamanene nusak-kala ma leoina fo bei lakabubua, hala nakalupun-nala. MANETUALAIN Fo Manakoasa, palisak solda'du matee-mata'tik-kala.

⁵Ala mai leme nusa dook fo manai daebafak-ka bu'u-bu'un-nala mai. MANETUALAIN pakes nai nasa-melun-na dalek, fo ala tao lamopo-lamate daebafak-ka lala'en-na.

⁶ Kii-makaleleu leona, nana MANETUALAIN fain-na deka so, fo nde MANETUALAIN fe fai momopo-mamatek-ka.

⁷Neukose basa hataholi-la lame'da mate liman-nala, ma mopo palanin-nala.

⁸Neukose bibii-namata'uk-ka ho'un-nalas, ma ua-kakalun-nala lakapii fo lita he'dis, sama leo inak-kala sanga bongi. Neukose, esa mete esa no bibii-namata'uk, ma mata-panan-nala pilas, hu kande mamaek-ka.

⁹Neukose, MANETUALAIN fain-na losa, fo nai faik ndia, MANETUALAIN nasa-melun lua ponu-ponu. Neukose, daebafak-ka da'di moo na'u tak, ma basa hataholi masala-masingok-kala, neukose mopo-mate.

¹⁰ Neukose basa nduuk ma nduu bubuak-kala ta lasalaa fa; neukose le'do ta nasalaa nai lelek ana tii, ma neukose bulak-ka ta nasalaa so'on.

¹¹MANETUALAIN nafa'da nae, “Neukose, Au huku daebafak-ka nanahu tatao-nono'i mangalaun-na, ma hataholi tatao-nono'i mangauk-kala nanahu sala-singon-nala. Neukose, Au akadadaek basa hataholi manakoao-ndaeaok-kala, ma neukose Au huku hataholi fo namatutua-namadedema aoinan-na, ma hataholi fo ha'da hataholi taak-ka.

¹²Hataholi nanasoi-tefak-ka lumanak nanseli, ta hapus makandondook fa, lena heni neme sanga lilo isik-ka.

¹³Neukose, Au tao-a lalai-a dele, ma daebafak-ka keko neme mamanan-na, nai faik fo Au, MANETUALAIN Fo Manakoasa, atu'du Au nasa-melung.

¹⁴Hataholi nusa dea manaleo nai Babel-la, neukose ala tapasasala, fo esa-esak nalai fali leo nusan-na neu. Sila sama leo nusa, fo nalai neme manafuli-danga mai, do bi'ilopo bubuak fo manafoon ta.

¹⁵Su'di see fo nanaho'u nak soona, neukose nanapau nisak.

¹⁶Neukose lita matan, ni'iana bongi beun-nala nanalulumu-eesek, nakodaa-la bonga uman-nala, ma ala sungu loo saoinan-nala.”

¹⁷MANETUALAIN nafa'da nae, “Au hoka leoina Madai, fo ala sapu-la Babel. Ta bisa solo hataholi sila-la dalen-na nenik lilofulak do lilopilas fa.

¹⁸Neukose, ala kou lisa hataholi muli-soluk-kala nenik sila kokoun-na. Ala ta sue ni'iana bongi beuk-kala, ma dalen-nala ta sue-lai neu ni'iana-la fa.

¹⁹ Neme basa nusak lala'en-na mai, Babel ndia nde mana'ahiik nanseli, ma ana da'di namatutua dalek ba'eneu laun-nala. Tehu Au, fo MANETUALAIN, neukose tao akalulutuk-kana, sama leo Au tao Sodom ma Gomora.

²⁰Neukose ta hapu hataholi esa boen, ana leo seluk nai naa fa. Ta hapu hataholi Arab manaleu-laak, fo neukose napadedeik lalaa teman-na, nai mamanak ndia fa, ma neukose ta hapu manafoo, ana foo bi'ihii bi'ilopon-nala leu la'a na'u nai ndia fa.

²¹ Neukose bana fuik-kala leo nai mamanak ndia. Neukose ko'donaok-kala landunu lai sila uman-nala dalek, ma manupui onta-la, neukose leo lai naa. Bi'ihii fuik-kala, neukose lakaboboku lai batu manandefak-kala tala'da.

²²Busa fuik-kala, neukose ala nggoo lai uma manek Babel-la. Fai nakalulutun-na, sanga losa so, de ta nakadedeak fain-na so'on.”